Ёш спортчиларга Элёр полвон Машарипов маҳорат дарслари ўтди

Сўнгги йилларда туманимизда спорт соҳасини ривожлантириш, ёшларнинг ўзлари қизиққан йўналишлар бўйича спорт турлари билан шуғулланишлари учун зарур шарт-шароитлар яратишга қаратилаётган эътибор туфайли нуфузли спорт мусобақаларида иштирок этиб, совринли ўринларни эгаллаб келаётган ёшлар сафи ўсиб бормоқда. Бунда, албатта, туман БЎСМ томонидан ҳамкор ташкилотлар билан биргаликда олиб борилаётган саъй-ҳаракатлар муҳим аҳамият касб этмоқда. Хусусан, туман ҳокимлиги ёрдами билан маҳаллалар ва умумтаълим мактаблари ҳамкорлигида ёшларнинг бўш вақтларини мазмунли ўтказиш, уларнинг спорт билан мунтазам равишда шуғулланишларини таъминлаш мақсадида сунъий қопламали спорт майдончалари бунёд этилиб, фойдаланишга топширилмоқда. Натижа эса қувонарли. Айни пайтда туманимиздан етишиб чиқаётган спортчилар орасида Ўзбекистон, Осиё, Жаҳон чемпионати ва кубоклари совриндорлари бор.

Янги 2021 йилнинг илк ҳафтасида, 4 январь куни туман Болалар ва ўсмирлар спорт мактабида ушбу мактабнинг собиқ ўқувчиларидан бири, дзю-до кураши бўйича ёшлар ўртасида Европа очиқ чемпионати, Осиё ўйинлари совриндори, бир неча марта Ўзбекистон чемпиони ва Халқаро мусобақалар совриндори Элёр полвон Машарипов билан туманимиз ёш спортчиларининг учрашуви ўтказилиб, унда туман БЎСМда илк спорт таҳсилини олган, айни пайтда жаҳон спорт ареналарида юртимиз шарафини муносиб ҳимоя қилиб келаётган моҳир спортчи Шарофиддин Болтабоевнинг эришаётган ютуқлари, шу баробарида, дзю-до курашининг сирлари ҳақида мароқли суҳбат уюштирилди.

Таниқли спортчи билан учрашув тадбирини туман Болалар-ўсмирлар спорт мактаби директори Чоршам Тожимуродов очди ва барчани диёримизга кириб келган янги 2021 йил билан самимий муборакбод этди. Шунингдек, Чоршам Тожимуродов ўз сўзида Манғит шаҳрининг Навоий номли маҳалласида туғилиб-ўсган Шарофиддин Болтабоевнинг туман БЎСМда илк машғулот бошлаган йиллари ва спортда эришаётган ютуқлари ҳақида қисқача тўхталиб ўтди. Шундан сўнг, ёшлар ўртасида Европа очиқ чемпионати, Осиё ўйинлари совриндори, бир неча бор Ўзбекистон чемпиони ва халқаро мусобақалар совриндори Элёр Машаррипов ёш спортчиларга юртдошимиз Шарофиддин Болтабоевнинг сабр-матонати, иродаси, кучли спортчи эканлиги хусусида фахрланиб сўзлади. Шу билан бирга Шарофиддин Болтабоевнинг спортдаги ютуқлари хусусида батафсил тўхталди. Хусусан, 2019 йил Бирлашган Араб Амирликларининг Фужайра шаҳрида ўтказилган жаҳон дзю-дочиларининг Осиё чемпионатида 2-ўринни, шу йили Тошкент шаҳрида бўлиб ўтган гран-при мусобақаларида ўз вазн тоифасида фахрли биринчи ўринни эгаллагани, ҳозирги кунда Олимпиа йўлланмасини қўлга киритиш мақсадида жаҳон рейтингида очколар сонини 2993 тага етказиб, рейтингда 15-ўринга кўтарилганини ёшларга фахрланиб сўзлаб берди.

Бундан ташқари, Шарофиддин Болтабоев 2021 йилнинг 11-13 январь кунлари Қатар пойтахти Доха шаҳрида «Masters» сериясидаги йилнинг дастлабки нуфузли мусобақасида Ўзбекистон шарафини ҳимоя қилиш учун жўнаб кетганини,  «Masters»  турнири нуфузи жиҳатидан жаҳон чемпионатидан кейин туришини, бу мусобақада ҳам юртдошимизнинг ғалаба қозонишига ишонч билдириб, Ш.Болтабоевни ёш спортчиларга ибрат қилиб кўрсатди.

Ўз навбатида ёш спортчилар Элёр полвон Машариповга спорт соҳасига оид саволлар билан мурожаат қилдилар. Элёр полвон ёшларга юқори натижаларга эришиш сирлари ҳақида гапириб, уларни қизиқтирган саволларга жавоб берди.

Сермазмун мулоқот, қизиқарли савол-жавоблар билан ўтган учрашувда Элёр полвон Машарипов ёш спортчиларга маҳорат дарсларини ҳам ўтди. Дзю-до курашининг ўзига хос усуллари, сир-синоатлари юзасидан БЎСМ спорт мураббийлари билан ўзининг билим ва тажрибалари, кўникмаларини ўртоқлашди. Мураббийларнинг машғулотларни тизимли олиб боришлари, айниқса, иқтидорли ёшлар билан шуғулланишда машғулотларнинг узвийлигини таъминлаш юзасидан тавсиялар берди.

Робия ЙЎЛДОШЕВА.