ПЕДАГОГ-ТАРБИЯЧИЛАР УЧУН “МЕТОДИК МАҲОРАТ СОАТИ” ЎҚУВ-СЕМИНАРИ ЎТКАЗИЛДИ
Мамлакатимизда мактабгача таълим ташкилотлари фаолиятини жаҳон андозалари даражасида такомиллаштириш, соҳага илғор хорижий тажрибаларни, шу билан бирга давлат мактабгача таълим ташкилотларида фаолият олиб борувчи юқори малакали педагог-тарбиячиларнинг намунали инновацион ғояларини кенг жорий этиш орқали тарбияланувчиларнинг қобилият ва иқтидорларини ривожлантиришга алоҳида эътибор қаратилмоқда.
Бу борада Амударё туман Мактабгача ва мактаб таълими бўлими тасарруфидаги давлат мактабгача таълим ташкилотларида “Методик маҳорат куни” доирасида амалга оширилаётган ишлар ўзининг ижобий самарасини бермоқда.
Хусусан, Ўзбекистон Республикаси Мактабгача ва мактаб таълими Вазирлигининг 2025 йил 2 сентябрь кунги буйруғи ижросини таъминлашга қаратилган чора-тадбирлар туфайли тумандаги таянч мактабгача таълим ташкилотларида малакали тренер-менторлар томонидан инновацион тренинглар, ўқув-семинар машғулотлари олиб борилмоқда.
Жорий йилнинг 7 октябрь санасида тумандаги 40-сонли ва 5-сонли таянч мактабгача таълим ташкилотларида “Методик маҳорат куни” доирасида "Методик маҳорат соати” ўқув-семинари ташкил этилди. Ўқув-семинарини туман Мактабгача ва мактаб таълими бўлимининг бош услубчиси Ҳулкар Бабажанова очди ва мактабгача таълим тизимига илғор хорижий тажрибаларни кенг жорий этишнинг афзалликлари хусусида батафсил сўз юритди.
Мазкур ўқув-семинари 40-сонли ва 5-сонли давлат мактабгача таълим ташкилотларида ўтказилиб, ҳар бирида 27 нафардан педагог-тарбиячилар иштирок этишди ва уларга малакали тренерлар томонидан соҳага оид қимматли маслаҳат ва тавсиялар берилди.
“Мактабгача ёшда когнитив ривожланишни қўллаб-қувватлаш” мавзусида ўтказилган “Методик маҳорат соати” ўқув-семинари юқори савияда ташкиллаштирилди. Ҳар иккала давлат мактабгача таълим ташкилотида ўтказилган ўқув-семинари аввалида малакали тренерлар – 40-сонли давлат мактабгача таълим ташкилоти директорининг ўринбосари Альбина Эсназарова ҳамда 5-сонли давлат мактабгача таълим ташкилоти директорининг ўринбосари Гулчеҳра Юлдашевалар тадбирнинг мақсади ва кутилаётган натижалари юзасидан зарур маълумотлар бердилар. Улар “Мактабгача ёшда когнитив ривожланишни қўллаб-қувватлаш” мавзусидаги маърузалари орқали соҳага хорижий тажрибаларни кенг жорий этиш бўйича ҳар бири 3 соатлик кўргазмали дарс-машғулотларини олиб бордилар.
Мактабгача ёшдаги болаларда когнитив ривожланишни қўллаб-қувватлаш Сингапурча ёндашув бўлиб, бунда болаларда элементар математик кўникмаларни ривожлантириш, ўқитиш ёндашуви, савол-жавоблар ва тадқиқотга асосланган ўқувнинг дастлабки босқичида болага ҳисоблашни ўргатиш муҳим эканлиги алоҳида таъкидланди.
Айнан ана шундай асосда олиб борилган таълимий ва тарбиявий ишлар боланинг барқарор ривожланишини таъминлайди ва эслаб қолиш қобилияти, таълимий машғулотларни ўзлаштириш кўникмалари, иқтидори шаклланади.
Юқори ишчанлик руҳида ўтказилган ўқув-семинар машғулотлари иштирокчилар учун қизиқарли таассуротларга бой, савол-жавоблар ва ўзаро тажриба алмашувлар асосида ўтгани билан муҳим аҳамиятга эга бўлди. Мазкур тадбир орқали ўқув-семинар иштирокчилари нафақат хорижий тажрибаларни, балки миллий-маънавий қадриятларга асосланган инновацион ғояларни амалиётга жорий этиш бўйича қимматли маълумотларга эга бўлдилар.
РОБИЯ ЙЎЛДОШЕВА.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
