ҚОРАҚАЛПОҚ ДАВЛАТ УНИВЕРСИТЕТИ ЎҚИТУВЧИСИ ОЛИМЖОН ЮСУПОВ ЧОЙКЎЛЛИК ЁШЛАР УЧУН МАҲОРАТ ДАРСЛАРИ ТАШКИЛ ЭТДИ
Мамлакатимизда иқтидорли, билимдон ёшларни қўллаб-қувватлаш, айниқса, интилувчан, ижодкор ёшларнинг алоҳида қобилиятларини юзага чиқаришлари учун шарт-шароитлар яратишга қаратилган чора-тадбирлар туфайли кўплаб ёш иқтидор эгалари шаклланиб, улар орасидан бадиий ҳунармандчилик, рассомлик йўналишлари бўйича етук мутахассислар етишиб чиқмоқда. Бу борада Бердақ номидаги Қорақалпоқ давлат университетининг Санъатшунослик кафедраси илмий жамоаси томонидан амалга оширилаётган ишлар алоҳида эътибор ва эътирофга муносиб.
Мазкур факультет талабалари иштирокидаги илмий-назарий ва амалий машғулотлар, Республика туманларидаги иқтидорли ёшларни қўллаб-қувватлаш мақсадида олиб борилаётган маҳорат дарслари изланувчан, ижодкор ёшларни кашф этиш имконини бермоқда.
Яқинда Амударё тумани Маданият бўлими тасарруфидаги Чойкўл овули ҳудудида жойлашган 36-сонли Амударё маданият марказида Ўзбекистон Республикаси Президентининг 2023 йил 25 декабрдаги “Номоддий маданий меросни муҳофаза қилиш, илмий ўрганиш ва тарғиб қилишни ривожлантиришга оид қўшимча чора-тадбирлар тўғрисида”ги 405-сонли Қарори ижросини таъминлаш мақсадида университетнинг Санъатшунослик кафедраси ўқитувчиси Олимжон Юсупов раҳбарлигида маҳорат дарслари ташкил қилинди.
Тадбир жараёнида Санъатшунослик факультетининг амалий санъат (бадиий кулолчилик), тасвирий санъат ва либослар дизайни йўналишларида таҳсил олаётган талабаларнинг ижодий ишлари бўйича кўргазмалар ташкил қилинди. Кўргазмалар билан танишган чойкўллик ёшларга Олимжон Юсупов университетнинг Санъатшунослик факультети ва унинг битирувчилари эришаётган ютуқлар, хусусан, халқаро миқёсдаги кўрик-танловлардаги совриндорлар, дизайнерлар ва уларнинг муваффақиятлари хусусида батафсил маълумотлар берди.
Шундан сўнг Олимжон Юсупов амалий санъат, тасвирий санъат ва либослар дизайни йўналишларида таҳсил олаётган иқтидорли талабалар билан биргаликда чойкўллик ёшлар учун маҳорат дарсларини ўтказди. Маҳорат дарслари давомида учта асосий йўналиш бўйича амалий машғулотлар ташкил этилиб, ҳар бир йўналиш юзасидан ёшлардан тушган саволларга жавоблар бериб борилди.
Амалий дарс-машғулотлари бадиий кулолчилик, рассомлик ва либослар дизайни йўналишларига қизиқувчи ёшларнинг зарур маълумот ва тушунчаларга эга бўлишларида муҳим аҳамият касб этди.
Тадбир давомида маҳорат дарсларида иштирок этган ёшлар учун Амударё туман Маданият бўлими санъаткорлари томонидан тайёрланган концерт дастури намойиш қилинди.
РОБИЯ ЙЎЛДОШЕВА.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
