Yosh sportchilarga Elyor polvon Masharipov mahorat darslari oʻtdi

Soʻnggi yillarda tumanimizda sport sohasini rivojlantirish, yoshlarning oʻzlari qiziqqan yoʻnalishlar boʻyicha sport turlari bilan shugʻullanishlari uchun zarur shart-sharoitlar yaratishga qaratilayotgan eʼtibor tufayli nufuzli sport musobaqalarida ishtirok etib, sovrinli oʻrinlarni egallab kelayotgan yoshlar safi oʻsib bormoqda. Bunda, albatta, tuman BOʻSM tomonidan hamkor tashkilotlar bilan birgalikda olib borilayotgan saʼy-harakatlar muhim ahamiyat kasb etmoqda. Xususan, tuman hokimligi yordami bilan mahallalar va umumtaʼlim maktablari hamkorligida yoshlarning boʻsh vaqtlarini mazmunli oʻtkazish, ularning sport bilan muntazam ravishda shugʻullanishlarini taʼminlash maqsadida sunʼiy qoplamali sport maydonchalari bunyod etilib, foydalanishga topshirilmoqda. Natija esa quvonarli. Ayni paytda tumanimizdan yetishib chiqayotgan sportchilar orasida Oʻzbekiston, Osiyo, Jahon chempionati va kuboklari sovrindorlari bor.

Yangi 2021-yilning ilk haftasida, 4-yanvar kuni tuman Bolalar va oʻsmirlar sport maktabida ushbu maktabning sobiq oʻquvchilaridan biri, dzyu-do kurashi boʻyicha yoshlar oʻrtasida Yevropa ochiq chempionati, Osiyo oʻyinlari sovrindori, bir necha marta Oʻzbekiston chempioni va Xalqaro musobaqalar sovrindori Elyor polvon Masharipov bilan tumanimiz yosh sportchilarining uchrashuvi oʻtkazilib, unda tuman BOʻSMda ilk sport tahsilini olgan, ayni paytda jahon sport arenalarida yurtimiz sharafini munosib himoya qilib kelayotgan mohir sportchi Sharofiddin Boltaboyevning erishayotgan yutuqlari, shu barobarida, dzyu-do kurashining sirlari haqida maroqli suhbat uyushtirildi.

Taniqli sportchi bilan uchrashuv tadbirini tuman Bolalar-oʻsmirlar sport maktabi direktori Chorsham Tojimurodov ochdi va barchani diyorimizga kirib kelgan yangi 2021-yil bilan samimiy muborakbod etdi. Shuningdek, Chorsham Tojimurodov oʻz soʻzida Mangʻit shahrining Navoiy nomli mahallasida tugʻilib-oʻsgan Sharofiddin Boltaboyevning tuman BOʻSMda ilk mashgʻulot boshlagan yillari va sportda erishayotgan yutuqlari haqida qisqacha toʻxtalib oʻtdi. Shundan soʻng, yoshlar oʻrtasida Yevropa ochiq chempionati, Osiyo oʻyinlari sovrindori, bir necha bor Oʻzbekiston chempioni va xalqaro musobaqalar sovrindori Elyor Masharripov yosh sportchilarga yurtdoshimiz Sharofiddin Boltaboyevning sabr-matonati, irodasi, kuchli sportchi ekanligi xususida faxrlanib soʻzladi. Shu bilan birga Sharofiddin Boltaboyevning sportdagi yutuqlari xususida batafsil toʻxtaldi. Xususan, 2019-yil Birlashgan Arab Amirliklarining Fujayra shahrida oʻtkazilgan jahon dzyu-dochilarining Osiyo chempionatida 2-oʻrinni, shu yili Toshkent shahrida boʻlib oʻtgan gran-pri musobaqalarida oʻz vazn toifasida faxrli birinchi oʻrinni egallagani, hozirgi kunda Olimpia yoʻllanmasini qoʻlga kiritish maqsadida jahon reytingida ochkolar sonini 2993 taga yetkazib, reytingda 15-oʻringa koʻtarilganini yoshlarga faxrlanib soʻzlab berdi.

Bundan tashqari, Sharofiddin Boltaboyev 2021-yilning 11-13-yanvar kunlari Qatar poytaxti Doxa shahrida «Masters» seriyasidagi yilning dastlabki nufuzli musobaqasida Oʻzbekiston sharafini himoya qilish uchun joʻnab ketganini,  «Masters»  turniri nufuzi jihatidan jahon chempionatidan keyin turishini, bu musobaqada ham yurtdoshimizning gʻalaba qozonishiga ishonch bildirib, Sh.Boltaboyevni yosh sportchilarga ibrat qilib koʻrsatdi.

Oʻz navbatida yosh sportchilar Elyor polvon Masharipovga sport sohasiga oid savollar bilan murojaat qildilar. Elyor polvon yoshlarga yuqori natijalarga erishish sirlari haqida gapirib, ularni qiziqtirgan savollarga javob berdi.

Sermazmun muloqot, qiziqarli savol-javoblar bilan oʻtgan uchrashuvda Elyor polvon Masharipov yosh sportchilarga mahorat darslarini ham oʻtdi. Dzyu-do kurashining oʻziga xos usullari, sir-sinoatlari yuzasidan BOʻSM sport murabbiylari bilan oʻzining bilim va tajribalari, koʻnikmalarini oʻrtoqlashdi. Murabbiylarning mashgʻulotlarni tizimli olib borishlari, ayniqsa, iqtidorli yoshlar bilan shugʻullanishda mashgʻulotlarning uzviyligini taʼminlash yuzasidan tavsiyalar berdi.

Robiya YOʻLDOShEVA.