ЎЗБЕКИСТОН ЁШЛАР ФОРУМИДА ПРЕЗИДЕНТИМИЗ ТОМОНИДАН ИЛГАРИ СУРИЛГАН ФИКРЛАР ТУМАНИМИЗ ЁШЛАРИГА ҚУВОНЧ БАҒИШЛАДИ
Президентимиз Шавкат Миромонович Мирзиёев Ўзбекистоннинг келажак бунёдкорлари бўлган ёшларга катта имтиёзлар яратиш, уларнинг ўқиб, ўз билимларини ошириш, барча жабҳаларда жаҳон ёшлари билан баравар беллашишга қодир интеллектуал салоҳиятга эга инсонлар сифатида шаклланишлари учун ҳар доим умид ва ишонч билдириб келадилар. Шу боис, уларнинг орзу-интилишларига қулоқ тутиш, чин дилдан, самимий мулоқот қилиш мақсадида Ўзбекистон Ёшлар форумида иштирок этиб, мамлакатимизда ёшларга яратиладиган янги шарт-шароитлар ҳақида нутқ сўзлади.
Ўзбекистон Ёшлар форумида кўрилган масалалар, Президентимиз томонидан илгари сурилган янги ташаббус ва фикрларни туманимиз ёшларига етказиш, давлатимиз томонидан яратиб берилаётган имкониятлар, шарт-шароитлардан унумли фойдаланишга даъват этиш мақсадида туман Халқ таълими бўлимининг маънавий-маърифий масалалар бўйича шўъба раҳбари Зафар Абдуллаев ҳамда Азамат Норимматов томонидан 16-сонли умумтаълим мактабида мактабнинг ёш педагог-ўқитувчилари ҳамда юқори синф ўқувчилари иштирокида йиғилиш ўтказилди.
Йиғилишда туман Халқ таълими бўлиминнг маънавий-маърифий масалалар бўйича шўъба раҳбари Зафар Абдуллаев мамлакатимизда ёшларнинг қобилият ва иқтидорларини намоён этишлари учун яратилаётган имкониятлар хусусида батафсил тўхталиб ўтди. Хусусан, “Ёшлар: 1+1” дастури, Ёшлар кичик саноат зоналари, “Ёшлар мурожаати” электрон платформаси, тадбиркорлик йўналишида иш бошлаётган ёшларга ажратилаётган 4 фоизлик имтиёзли кредитлар, ёш оилаларни уй-жой билан таъминлаш борасида амалга оширилаётган кенг қамровли ишлар ҳақида батафсил маълумот берди.
Бундан ташқари, йиғилишда “Ёшлар:1+1” дастури доирасида уюшмаган ёшларни касб-ҳунар ва тадбиркорликка ўқитиш ишлари амалга оширилиши, “Ҳар бир тадбиркор – ёшларга мададкор” тамойили асосида 1 нафар тадбиркорга 1 нафардан ишсиз ёшни бириктириш ташаббуси фаол тадбиркорларимиз томонидан қўллаб-қувватланаётгани алоҳида эътироф этилди.
2021 йилда камида 500 минг нафар ёшни иш билан таъминлаш имконини берадиган бу эзгу ҳаракат давлатимиз раҳбари томонидан маъқуллангани, касб-ҳунар ҳамда тадбиркорлик кўникмаларига ўқитиш орқали сертификат олган ёшларга Марказий банкнинг асосий ставкасидан 4 фоиз паст ставкада микрокредитлар ажратиш бўйича кўриладиган чора-тадбирлар йиғилиш иштирокчилари бўлган ёшлар томонидан мамнуният билан кутиб олинди. Бу кредитлар 7 йил муддатга, 3 йил имтиёзли давр билан берилиши ёшларда катта қизиқиш уйғотди.
Шунингдек, Президентимиз томонидан илгари сурилган яна бир имконият мактабнинг битирувчи синф ўқувчиларига катта қувонч ва келажакдаги орзуларини амалга оширишлари учун ўзларига ишонч бағишлади. Яъни, икки ва ундан ортиқ фарзандлари тўлов-шартнома асосида таълим олаётган оилаларга имтиёзли таълим кредитлари берилиши, кредитни талаба ўқишни битириб, ишга кириб, ўзи пул топиб тўлаши мумкинлигидан, ёшлар мамнун бўлишди.
Шунингдек, йиғилишда ёшларга оилавий тадбиркорликни ривожлантириш мақсадида Қорақалпоғистон Республикаси ва ҳар бир вилоятга 100 млрд. сўмдан зиёд маблағ ажратилиши тадбиркорлик соҳасига қизиқувчи ёшлар учун муҳим янгилик бўлди ва бу борада мактабнинг битирувчи синф ўқувчилари ўз фикр-мулоҳазаларини билдирдилар.
Президентимизнинг Ўзбекистон Ёшлари форумидаги сермазмун маърузаси ва ундан келиб чиқадиган вазифаларга бағишланган мазкур ёшлар билан учрашув йиғилишидан мактаб ўқувчи-ёшлари катта таассуротлар олдилар.
Робия ЙЎЛДОШЕВА.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
