Хотира: ДИЛКАШ ДЎСТ ВА ДИЛБАР ШОИРА ЭДИ

Халқимиз орасида “тақдири азал” деган ибора жуда кўп ишлатилади. Инсон тақдири Аллоҳнинг иродаси билан яралиб, қаерга ризқ-насибаси сочилган бўлса, ўша ерда униб-ўсиши ҳам балки ана шу “тақдири азал”дандир... Аллоҳ иродаси билан битилган бу тақдир ёзиғини ўзгартиришнинг имкони бўлмагани учун инсонни ҳаёт йўллари ўзи ўйламаган сўқмоқлар томон етаклаб кетиши ҳам шунданмикан?..

Аллоҳ раҳмат қилсин, Инобатхон Отажонова ўзи ҳаётлигида бу ҳақда жуда кўп гапирардилар: “агар менинг тақдиримни улуғ Эгам амударёлик инсон билан боғламаганида етти иқлимга донғи кетган Самарқанддай азим гўшадан Манғит элга келармидим, мени бу юртга муҳаббат сўқмоқлари етаклаб келди”, - дердилар доим.

Дилкаш, самимий дўст, жонкуяр устоз, оиласида пазанда рафиқа, меҳрибон она, адолатли қайнона, невараларига парвона бувижон ва моможон эдилар. У кечагина ёнимизда эди, давраларнинг гули бўлиб шеърлар ўқирди. Шогирдларига куюнчаклик билан инглиз тилини ўргатарди. Бемаврид ўлим уни орамиздан олиб кетганини, ҳатто билмай ҳам қолдик. Афсусдамиз, юрагимиз айрилиқдан забун.

Инобат Отажонова 1964 йил 20 январда Самарқанд вилоятининг Пайариқ туманида туғилди. Умумтаълим мактабини, 1987 йилда эса Тошкент Давлат Чет тиллар институти (ҳозирги ЎзЖТУ)ни инглиз-француз тили йўналиши бўйича тамомлади. Маълум муддат Самарқанд вилоятининг Челак туманидаги мактабларда  ўқувчиларга инглиз тили фанидан дарс берди. Киришимли, самимий бўлган Инобатхон Отажонова 1988 йилда Манғитга келин бўлиб тушди. Қарийб 32 йил давомида туман Халқ таълими бўлимига қарашли умумтаълим мактабларида фаолият юритди. Гоҳ ёшлар етакчиси, гоҳ куни узайтирилган гуруҳ тарбиячиси, лаборант, 1997 йилнинг сентябрь ойидан эътиборан 38-сонли мактабда инглиз тили фани ўқитувчиси вазифаларида фаолият юритди. У қаерда, қайси вазифани бажаришидан қатъий назар, зиммасидаги масъулиятни чуқур ҳис этган ҳолда ўзини камтарин ва самимий дўст, куюнчак устоз сифатида намоён қилди.

Ҳаётдан олган хулосаларини, орзу-умидларини шеърий сатрларга жойлади. Шоиртабиат, жўшқин феъл-атворли Инобатхон Отажонова ижодкор ўқитувчи сифатида туман ва республика матбуоти орқали ўз мухлисларига эга шоира сифатида танилди, лирик шеърлари “Тараққиёт кўзгуси” ва “Менинг оилам” газеталари саҳифаларида, республика миқёсидаги “Устозлар” журналида чоп этилганди. Амударёлик ижодкорларни бирлаштирган “Жайхун илҳомлари” ННТнинг фаол аъзоси сифатида туманда ўтказилган маънавий-маърифий тадбирларнинг доимий иштирокчиси эди.

Инобатхон Отажонованинг орзулари кўп эди. У шеърларини тўплам ҳолида чоп қилдириш ниятида алоҳида тараддудлар қилиб юрганди. Афсус, бемаврид ўлим дилкаш ва самимий дўст, жўшқин табиатли шоирани орамиздан анча эрта олиб кетди. Ундан Инобатхонни яхши кўрган, билган дўст-у биродарлари, мухлислари, фарзандлари учун турли хил газета нашрларида чоп этилган дилбар шеърият, гўзал хотиралар, бири-биридан ақлли, зебо неваралар, фарзандлар қолди. 38-сонли мактаб педагогика жамоасида ўз ўрни, ўз сўзига эга фидойи устоз, шоира ва барчага бирдай меҳрибон инсон Инобатхон Отажонованинг ёрқин хотирасини  ҳамиша қалбларида асровчи барча ҳамкасблари номидан

Раъно АВАЗМУРОДОВА, 38-сонли мактаб ўқитувчиси.