Шимоли-ғарбий ҳарбий округида "Халқлар дўстлиги" фестивали ўтказилди

Миллатлараро тотувлик, ўзаро ҳурмат ва бағрикенглик тамойиллари Янги Ўзбекистон тараққиётининг энг мустаҳкам пойдевори ҳисобланади. Бугунги кунда жонажон юртимизда истиқомат қилаётган турли миллат ва элат вакиллари ягона мақсад – Ватан равнақи, кўп миллатли халқ фаровонлиги ҳамда юрт тинчлиги йўлида аҳил ва иноқликда умргузаронлик қилмоқда. Мамлакатимизда қарор топган ва ҳукм сураётган мана шундай тинчлик ва осойишталик, диний бағрикенглик муҳитини янада мустаҳкамлаш, айниқса, келажагимиз эгалари бўлган ёш авлод қалбида Ватанга муҳаббат, чексиз инсонийлик ва ўзаро ҳамжиҳатлик туйғуларини юксалтириш мақсадида Шимоли-ғарбий ҳарбий округида Халқлар дўстлиги куни муносабати билан дўстлик фестивали ташкил этилди.

Ушбу маънавий-маърифий тадбир том маънода юртимиздаги барқарорликнинг ва дўстликнинг ёрқин ифодасига айланди. Фестиваль доирасида жамиятнинг турли қатламларини кенг қамраб олган кўплаб мазмунли тадбирлар ўтказилди. Хусусан, "Биз ягона Ватан фарзандларимиз", "Ўзбекистон — ягона Ватан" ҳамда "Қўшничилик ва бағрикенглик сабоқлари" мавзуларида ташкил этилган давра суҳбатлари қизғин фикр-мулоҳазаларга бой бўлди.

Мазкур мулоқот майдонларида ҳарбий хизматчилар, турли давлат ва жамоат ташкилотлари вакиллари, кўпни кўрган муҳтарам нуронийлар, умидли ёшлар ҳамда турли миллий маданий марказларнинг фаоллари ўзаро суҳбатлашдилар. Давра суҳбатлари давомида Янги Ўзбекистонда миллатлараро тотувлик ва ўзаро ҳурматни таъминлаш борасида изчиллик билан амалга оширилаётган ислоҳотлар ҳақида атрофлича фикр алмашилди.

Тадбирда сўзга чиққанлар томонидан айнан мана шундай бирдамлик ва ҳамжиҳатлик ришталари мамлакатимиз тараққиётининг энг муҳим омилларидан эканлиги алоҳида эътироф этилди. Ўзбекистон диёрида яшаётган барча фуқаролар миллатидан қатъи назар, юрт равнақи учун муносиб ҳисса қўшаётгани фахр ва ифтихор билан тилга олинди.

Фестивалнинг бадиий қисми тадбир иштирокчиларига унутилмас лаҳзаларни ҳадя этиб, чин маънода улкан дўстлик ва ҳамжиҳатлик байрамига айланиб кетди. Катта саҳнада турли миллат вакиллари томонидан ижро этилган бетакрор халқ куй-қўшиқлари, жозибадор миллий рақслар ҳамда ўзига миллий урф-одатларни акс эттирувчи саҳна кўринишлари барчага манзур бўлди. Бу ранг-баранг маданий чиқишлар миллий қадриятларимизнинг нақадар бойлигини, халқимизнинг бағрикенглигини ва ўзаро ҳурмат тамойилларини яна бир карра ёрқин ифодалаб берди.

Тадбир давомида махсус ташкил қилинган кўргазмалар ҳам барчанинг диққат марказида бўлди. Миллий маданият, бетакрор ҳунармандчилик ва ажойиб амалий санъат намуналаридан иборат мазкур кўргазмалар йиғилганларга юртимизнинг бой маданий мероси билан яқиндан танишиш имконини яратди. Намойиш этилган кўргазмаларда асрлар оша сақланиб келаётган миллий қадриятлар, турли миллатларнинг ўзига хос анъаналари ва гўзалликка бўлган иштиёқлари намоён бўлди. Бу эса меҳмонларда, айниқса, ёш авлод вакилларида катта таассурот қолдирди.

Шунингдек, ёшларнинг бўш вақтини янада мазмунли ўтказиш ва уларни ҳақиқий ватанпарварлик руҳида тарбиялаш мақсадида қатор қизиқарли тадбирлар уюштирилди. Хусусан, ёшлар ўртасида турли спорт мусобақалари, ҳарбий-ватанпарварлик руҳидаги кўргазмали чиқишлар ҳамда турли хил беллашувлар ва интеллектуал танловлар юқори савияда ўтказилди.

Ушбу қизиқарли спорт ва ҳарбий кўргазмали чиқишлар нафақат ёшларнинг жисмоний тайёргарлигини ошириш ва уларни соғлом турмуш тарзига кенг жалб этишга ёрдам берди, балки уларнинг мурғак қалбида Ватанга садоқат, фидойилик ва мардлик хислатларини тоблаб, она юрт ҳимоясига доимо шай туриш руҳида тарбиялашга хизмат қилди.

Фестиваль якунида алоҳида таъкидланганидек, жамиятимиздаги миллатлараро тотувлик, ўзаро ҳурмат ва бағрикенглик муҳити Ўзбекистоннинг энг бебаҳо бойлигидир. Мазкур муқаддас тушунчалар халқимизнинг асл куч-қудрати ҳамда барқарор тараққиётимизнинг мустаҳкам пойдевори бўлиб хизмат қилади.

Мана шундай кенг қамровли маънавий-маърифий тадбирлар жамиятимиздаги илиқ дўстлик ришталарини янада мустаҳкамлашда, ўсиб келаётган ёш авлод қалбида юксак инсоний фазилатларни камол топтиришда ва энг асосийси, Ватан тақдирига дахлдорлик туйғусини кучайтиришда муҳим аҳамият касб этади.

Ягона Ватанимизнинг тинчлиги ва барқарор равнақи, кўп миллатли халқимизнинг бирдамлиги ва ҳамжиҳатлиги бу муқаддас заминда яшаётган барча фуқароларнинг энг улуғ бойлиги, энг юксак қадрияти ҳисобланади. Дўстлик, меҳр-оқибат, диний бағрикенглик ва ўзаро ҳурмат тамойиллари доимо устувор бўлган, одамлари ўзаро елкадош бўлиб яшаётган жамиятда эса тараққиёт бардавом бўлади.