Shimoli-gʻarbiy harbiy okrugida "Xalqlar doʻstligi" festivali oʻtkazildi

Millatlararo totuvlik, oʻzaro hurmat va bagʻrikenglik tamoyillari Yangi Oʻzbekiston taraqqiyotining eng mustahkam poydevori hisoblanadi. Bugungi kunda jonajon yurtimizda istiqomat qilayotgan turli millat va elat vakillari yagona maqsad – Vatan ravnaqi, koʻp millatli xalq farovonligi hamda yurt tinchligi yoʻlida ahil va inoqlikda umrguzaronlik qilmoqda. Mamlakatimizda qaror topgan va hukm surayotgan mana shunday tinchlik va osoyishtalik, diniy bagʻrikenglik muhitini yanada mustahkamlash, ayniqsa, kelajagimiz egalari boʻlgan yosh avlod qalbida Vatanga muhabbat, cheksiz insoniylik va oʻzaro hamjihatlik tuygʻularini yuksaltirish maqsadida Shimoli-gʻarbiy harbiy okrugida Xalqlar doʻstligi kuni munosabati bilan doʻstlik festivali tashkil etildi.

Ushbu maʼnaviy-maʼrifiy tadbir tom maʼnoda yurtimizdagi barqarorlikning va doʻstlikning yorqin ifodasiga aylandi. Festival doirasida jamiyatning turli qatlamlarini keng qamrab olgan koʻplab mazmunli tadbirlar oʻtkazildi. Xususan, "Biz yagona Vatan farzandlarimiz", "Oʻzbekiston — yagona Vatan" hamda "Qoʻshnichilik va bagʻrikenglik saboqlari" mavzularida tashkil etilgan davra suhbatlari qizgʻin fikr-mulohazalarga boy boʻldi.

Mazkur muloqot maydonlarida harbiy xizmatchilar, turli davlat va jamoat tashkilotlari vakillari, koʻpni koʻrgan muhtaram nuroniylar, umidli yoshlar hamda turli milliy madaniy markazlarning faollari oʻzaro suhbatlashdilar. Davra suhbatlari davomida Yangi Oʻzbekistonda millatlararo totuvlik va oʻzaro hurmatni taʼminlash borasida izchillik bilan amalga oshirilayotgan islohotlar haqida atroflicha fikr almashildi.

Tadbirda soʻzga chiqqanlar tomonidan aynan mana shunday birdamlik va hamjihatlik rishtalari mamlakatimiz taraqqiyotining eng muhim omillaridan ekanligi alohida eʼtirof etildi. Oʻzbekiston diyorida yashayotgan barcha fuqarolar millatidan qatʼi nazar, yurt ravnaqi uchun munosib hissa qoʻshayotgani faxr va iftixor bilan tilga olindi.

Festivalning badiiy qismi tadbir ishtirokchilariga unutilmas lahzalarni hadya etib, chin maʼnoda ulkan doʻstlik va hamjihatlik bayramiga aylanib ketdi. Katta sahnada turli millat vakillari tomonidan ijro etilgan betakror xalq kuy-qoʻshiqlari, jozibador milliy raqslar hamda oʻziga milliy urf-odatlarni aks ettiruvchi sahna koʻrinishlari barchaga manzur boʻldi. Bu rang-barang madaniy chiqishlar milliy qadriyatlarimizning naqadar boyligini, xalqimizning bagʻrikengligini va oʻzaro hurmat tamoyillarini yana bir karra yorqin ifodalab berdi.

Tadbir davomida maxsus tashkil qilingan koʻrgazmalar ham barchaning diqqat markazida boʻldi. Milliy madaniyat, betakror hunarmandchilik va ajoyib amaliy sanʼat namunalaridan iborat mazkur koʻrgazmalar yigʻilganlarga yurtimizning boy madaniy merosi bilan yaqindan tanishish imkonini yaratdi. Namoyish etilgan koʻrgazmalarda asrlar osha saqlanib kelayotgan milliy qadriyatlar, turli millatlarning oʻziga xos anʼanalari va goʻzallikka boʻlgan ishtiyoqlari namoyon boʻldi. Bu esa mehmonlarda, ayniqsa, yosh avlod vakillarida katta taassurot qoldirdi.

Shuningdek, yoshlarning boʻsh vaqtini yanada mazmunli oʻtkazish va ularni haqiqiy vatanparvarlik ruhida tarbiyalash maqsadida qator qiziqarli tadbirlar uyushtirildi. Xususan, yoshlar oʻrtasida turli sport musobaqalari, harbiy-vatanparvarlik ruhidagi koʻrgazmali chiqishlar hamda turli xil bellashuvlar va intellektual tanlovlar yuqori saviyada oʻtkazildi.

Ushbu qiziqarli sport va harbiy koʻrgazmali chiqishlar nafaqat yoshlarning jismoniy tayyorgarligini oshirish va ularni sogʻlom turmush tarziga keng jalb etishga yordam berdi, balki ularning murgʻak qalbida Vatanga sadoqat, fidoyilik va mardlik xislatlarini toblab, ona yurt himoyasiga doimo shay turish ruhida tarbiyalashga xizmat qildi.

Festival yakunida alohida taʼkidlanganidek, jamiyatimizdagi millatlararo totuvlik, oʻzaro hurmat va bagʻrikenglik muhiti Oʻzbekistonning eng bebaho boyligidir. Mazkur muqaddas tushunchalar xalqimizning asl kuch-qudrati hamda barqaror taraqqiyotimizning mustahkam poydevori boʻlib xizmat qiladi.

Mana shunday keng qamrovli maʼnaviy-maʼrifiy tadbirlar jamiyatimizdagi iliq doʻstlik rishtalarini yanada mustahkamlashda, oʻsib kelayotgan yosh avlod qalbida yuksak insoniy fazilatlarni kamol toptirishda va eng asosiysi, Vatan taqdiriga daxldorlik tuygʻusini kuchaytirishda muhim ahamiyat kasb etadi.

Yagona Vatanimizning tinchligi va barqaror ravnaqi, koʻp millatli xalqimizning birdamligi va hamjihatligi bu muqaddas zaminda yashayotgan barcha fuqarolarning eng ulugʻ boyligi, eng yuksak qadriyati hisoblanadi. Doʻstlik, mehr-oqibat, diniy bagʻrikenglik va oʻzaro hurmat tamoyillari doimo ustuvor boʻlgan, odamlari oʻzaro yelkadosh boʻlib yashayotgan jamiyatda esa taraqqiyot bardavom boʻladi.