ТУРМУШДА МУРОСА БЎЛСА ТОТУВЛИК МУСТАҲКАМЛАНАДИ
Инсон ҳаётига мазмун берадиган, меҳр-муҳаббат, ҳузур-ҳаловат топадиган маскан бу унинг ўз оиласидир. Оилани бахт маконига айлантириш эса ҳар кимнинг ўзига боғлиқ. Бу маконнинг тинч, файзли, фарзандларнинг бахтли бўлишида асосан эр-хотиннинг ҳар иккиси ҳам ўз бурчларини астойдил адо этишга интилишлари муҳим саналади.
Янги турмуш бошлаган оиланинг оёққа туриб кетишига эса ҳар икки томондаги ота-оналарнинг кўмаги керак. Улар ёшларга турмушда ҳар хил вазиятлар, ҳаёт синовларига дуч келганда сабрли, бардошли бўлишни, бир-бирини доим ҳурмат қилиш, қадрлашни ўргатишса янги оила тобора мустаҳкамланиб бораверади.
Нукус туманида яшовчи Айсулув (исмлар ўзгартирилган) ҳам Женисбек билан турмуш қурганида бир олам орзулар оғушида эди. Аммо турмушдаги синовларга сабр қилмади. Шу хонадоннинг паст-баландига кўникиш ўрнига ўзгаларнинг гапларига қулоқ тутиб, ҳаётини чигаллаштирди. Бир фарзандли бўлгунига қадар шундай яшаган Айсулув охири онасининг уйига қайтди. Уйда ҳам турмушдан ажрашган опаси, онаси уни йўлга солиб қайтармади. Аксинча, ажрашишининг тарафдори бўлиб, уни қўллаб-қувватлашди. Ўртада фарзанд сарсон бўлишини, унга ота кераклигини ўйлашмади. Ушбу можаролар неварасини кўришга уйга қайнонаси Мевагул келганида янада катталашди.
Неварасини соғинган аёл аламини келиндан олиб, уларга бир икки аччиқ гап гапирди. Жаҳл отига минган Айсулувнинг опаси Маржон уни уйдан ҳайдаб чиқарди. Шу орада жанжал авжига чиқиб, Мевагулни эшикдан қандай итариб юборганини билмай қолди. Мувозанатни йўқотган аёл бўсағадаги бетонга боши билан йиқилиб жароҳатланди. Ичкарида қолган Айсулув билан онаси ҳам бу можародан қон босими ошиб, ҳушларидан кетар аҳволга тушган эди.
Боши жароҳатланган Мевагул шифохонада даволаниб чиқди. Унга шикаст етказган Маржонга нисбатан эса Ўзбекистон Республикаси Жиноят кодексининг 109-моддаси 2-қисми билан жиноят иши қўзғатилди.
Ота-боболаримиздан келаётган муросаю-мадора деган чиройли тушунча бор. Оилавий ҳаётда, турмушда ҳар қандай муаммо ўзаро маслаҳатлашиб, гаплашиб, тушунтириб, бир-бирини эшитиб, бир тўхтамга келинса нохушликлар барҳам топади. Шундагина ўртада тотувлик бўлади ва оилалар мустаҳкамланади.
Умида Оразбоева, Нукус шаҳар ИИО ФМБ 1-сон ИИБ ҳузуридаги Тергов гуруҳи терговчиси, майор.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
