TURMUShDA MUROSA BOʻLSA TOTUVLIK MUSTAHKAMLANADI

Inson hayotiga mazmun beradigan, mehr-muhabbat, huzur-halovat topadigan maskan bu uning oʻz oilasidir. Oilani baxt makoniga aylantirish esa har kimning oʻziga bogʻliq.  Bu makonning tinch, fayzli, farzandlarning baxtli boʻlishida asosan er-xotinning har ikkisi ham oʻz burchlarini astoydil ado etishga intilishlari muhim sanaladi.

Yangi turmush boshlagan oilaning oyoqqa turib ketishiga esa har ikki tomondagi ota-onalarning koʻmagi kerak. Ular yoshlarga turmushda har xil vaziyatlar, hayot sinovlariga duch kelganda sabrli, bardoshli boʻlishni, bir-birini doim hurmat qilish, qadrlashni oʻrgatishsa yangi oila tobora mustahkamlanib boraveradi.

Nukus tumanida yashovchi Aysuluv (ismlar oʻzgartirilgan) ham Jenisbek bilan turmush qurganida bir olam orzular ogʻushida edi. Ammo turmushdagi sinovlarga sabr qilmadi. Shu xonadonning past-balandiga koʻnikish oʻrniga oʻzgalarning gaplariga quloq tutib, hayotini chigallashtirdi.  Bir farzandli boʻlguniga qadar shunday yashagan Aysuluv oxiri onasining uyiga qaytdi. Uyda ham turmushdan ajrashgan opasi, onasi uni yoʻlga solib qaytarmadi. Aksincha, ajrashishining tarafdori boʻlib, uni qoʻllab-quvvatlashdi. Oʻrtada farzand sarson boʻlishini, unga ota kerakligini oʻylashmadi. Ushbu mojarolar nevarasini koʻrishga uyga qaynonasi Mevagul kelganida yanada kattalashdi.

Nevarasini sogʻingan ayol alamini kelindan olib, ularga bir ikki achchiq gap gapirdi. Jahl otiga mingan  Aysuluvning opasi Marjon uni uydan haydab chiqardi. Shu orada janjal avjiga chiqib, Mevagulni eshikdan qanday itarib yuborganini bilmay qoldi. Muvozanatni yoʻqotgan ayol boʻsagʻadagi betonga boshi bilan yiqilib jarohatlandi. Ichkarida qolgan Aysuluv bilan onasi ham bu mojarodan qon bosimi oshib, hushlaridan ketar ahvolga tushgan edi.

Boshi jarohatlangan Mevagul shifoxonada davolanib chiqdi. Unga shikast yetkazgan Marjonga nisbatan esa Oʻzbekiston Respublikasi Jinoyat kodeksining  109-moddasi 2-qismi bilan jinoyat ishi qoʻzgʻatildi.

Ota-bobolarimizdan kelayotgan murosayu-madora degan chiroyli tushuncha bor. Oilaviy hayotda, turmushda har qanday muammo oʻzaro maslahatlashib, gaplashib, tushuntirib, bir-birini eshitib, bir toʻxtamga kelinsa noxushliklar barham topadi. Shundagina oʻrtada totuvlik boʻladi va oilalar mustahkamlanadi.

Umida Orazboyeva, Nukus shahar IIO FMB  1-son IIB huzuridagi Tergov guruhi tergovchisi, mayor.