Aholi ongida korruptsiyaga nisbatan murosasizlik tuygʻusini shakllantirish yoʻlida

Jamiyatda korruptsiyaga nisbatan murosasizlik muhitini yaratish, yosh avlod ongiga halollik qadriyatlarini singdirish va bu illatga qarshi kurashish nafaqat davlat organlarining, balki jamoat tashkilotlari, ommaviy axborot vositalari va keng jamoatchilikning ham vazifasidir. Shu yoʻnalishdagi ishlarga hissa qoʻshish va bu borada amalga oshirilayotgan ishlarni keng targʻib qilish maqsadida “Taraqqiyot koʻzgusi” gazetasi tahririyati Oʻzbekiston Respublikasi Oliy Majlisi huzuridagi Fuqarolik jamiyati institutlarini qoʻllab-quvvatlash jamoat fondining grant tanloviga oʻz loyihasini taqdim qilgan edi. Parlament komissiyasining qaroriga koʻra  “Biz korruptsiyaga qarshimiz!” mavzusidagi mazkur loyiha fond tomonidan moliyalashtirildi va ayni kunlarda grant loyihasi muvaffaqiyatli amalga oshirilmoqda.

Loyiha ish rejasiga asosan jamiyatda korruptsiyaga nisbatan huquqiy immunitetni shakllantirishga qaratilgan qator amaliy ishlar qilinmoqda. Xususan, aholi ongida korruptsiyaga nisbatan murosasizlik tuygʻusini shakllantirish maqsadida gazeta sahifalarida va uning veb-saytida, ijtimoiy tarmoqlardagi kanallarida muntazam ravishda maqolalar va suhbatlar eʼlon qilinmoqda. Qolaversa, mahallalarda huquqshunoslar va jamoatchilik faollari bilan ochiq uchrashuvlar oʻtkazilib, aholi oʻrtasida tushuntirish-targʻibot ishlari olib borilmoqda. Bu kabi uchrashuvlar fuqarolarning huquqiy bilimlarini oshirishda muhim ahamiyat kasb etmoqda.

Yaqinda loyiha koordinatorlari tumanning Yangiobod mahallasi hududidagi davlat tashkilotlari va muassasalarida boʻlib, aholi bilan bevosita muloqot qildilar. Tadbir davomida aholi ongida korruptsiya nisbatan murosasizlik tuygʻusini shakllantirish maqsadida davlat xizmatlaridan foydalanuvchilarga bukletlar va boshqa tarqatma materiallar tarqatildi.

Loyiha koordinatorlari aholiga korruptsiyaning salbiy oqibatlari xususida atroflicha maʼlumot berib, pora olish-berish va unga vositachilik qilishda ishtirok etgan shaxslarga qonunchilikda koʻzda tutilgan qatʼiy jazo choralari haqida tushunchalar berdilar. Agar fuqarolar tamagirlik va korruptsiya holatlariga duch kelsa, darhol vakolatli davlat organlariga murojaat qilishi lozimligi taʼkidlandi. Davlat xizmatlaridan foydalanuvchilarga mazkur vakolatli organlarning "Ishonch telefon"lari hamda "Call-markazlari" yozilgan maxsus bukletlar tarqatildi.

Loyiha koordinatorlari faqat aholi bilan cheklanib qolmay, davlat muassasalarida faoliyat yuritayotgan davlat xizmatchilari bilan ham uchrashuvlar oʻtkazdilar. Ularga korruptsiyaga qarshi qonunchilikda koʻzda tutilgan jazo choralari va bu illatning salbiy ijtimoiy oqibatlari haqida maʼlumotlar berildi. Shuningdek, ularga korruptsiyaga qarshi kurashish boʻyicha milliy qonunchilikdan koʻchirmalar tarqatilib, har bir davlat xizmatchisi oʻz faoliyatida halollik va shaffoflik tamoyillariga qatʼiy amal qilishi lozimligi taʼkidlandi.

Tahririyat xodimlari “Biz korruptsiyaga qarshimiz!” nomli grant loyihasi doirasida joylarda oʻtkazayotgan bu kabi tadbirlar orqali jamiyatda nafaqat huquqiy ongni yuksaltirish, balki shaxsiy masʼuliyat tuygʻusini ham shakllantirishga hissa qoʻshishni maqsad qilganlar. Zero, korruptsiyaga qarshi kurashish faqat davlat organlarining vazifasi boʻlibgina qolmay, har bir shaxsning fuqarolik burchidir. Ana shu burch va masʼuliyatni yurtdoshlarimizga anglatish esa loyihaning bosh maqsadi sanaladi.