УСТОЗЛАР ШАРАФЛАНДИ

Мамлакатимизда халқ таълими соҳасига қаратилаётган эътибор туфайли сўнгги 3-4 йил ичида мактаб ва ўқитувчи-мураббийлар нуфузи янада ошди. Аввало шуни эътироф этиш керакки, мактаб таълимини ривожлантириш, таълим-тарбия ишларини замон талаблари даражасига кўтаришда ўз вазифасига масъулиятли, фидойи  ўқитувчиларнинг ҳиссаси катта. Уларга юксак эҳтиром кўрсатиш мақсадида мамлакатимизда 1 октябрь – Ўқитувчи ва мураббийлар куни, дунё миқёсида эса 5 октябрь – Халқаро ўқитувчилар куни сифатида кенг нишонланади.
Шу муносабат билан 38-сонли умумтаълим мактабида бўлиб ўтган “Устоз меҳнатини қадрлаймиз” мавзусидаги адабий-мусиқий тадбир иштирокчилари ҳам устозлар меҳнатига юқори баҳо бердилар ва ўқитувчиларни жамиятимизда энг илғор фикрли инсонлар, дея таърифладилар.
Ҳақиқатан ҳам ҳали оқ билан қорани ажрата олмайдиган мурғак болани илм йўлларига бошлабгина қолмай, унга ҳаёт сабоғини ҳам берган, ютуғидан энг биринчи қувониб, хатосини ҳаммадан аввал англаган ва кечирган, қийналса, елкасини тутиб, дард-у ғамларига шерик бўлган ўқитувчи ва мураббийлар ҳар бир инсон учун азиз, қадрли.
Бўлиб ўтган тадбирда мактабнинг энг фаол, билимдон ва тажрибали ўқитувчиларининг номлари алоҳида ҳурмат билан тилга олинди. Хусусан, рус тили ва адабиёти фани ўқитувчиси Муҳаббат Отажонова, Калифорния Университети сертификатини қўлга киритган олий тоифали инглиз тили фани ўқитувчиси Юлдуз Рўзметова, Қорақалпоғистон халқ таълими аълочиси Назира Усмонова, шунингдек, билимлар беллашуви ҳамда нуфузли спорт мусобақаларида ўқувчилари доимий равишда юқори натижаларга эришаётган, 2019-2020 ўқув йилини онлайн тарзда муваффақиятли якунлаган 45 нафар ўқитувчи ва мураббийлар ҳомийлар томонидан муносиб тақдирландилар. Олий тоифали бошланғич синф ўқитувчилари Муҳаббат Алламберганова ҳамда Шарофат Саидовалар эришаётган ютуқлар эса алоҳида эътироф  этилди.
Тадбирда “Жайхун илоҳомлари” ННТ раиси, Ўзбекистон Журналистлари ижодий Уюшмаси аъзоси, шоир Ўрозали Рейимов, “Тараққиёт кўзгуси” газетаси махсус мухбири, Қорақалпоғистон Республикасида хизмат кўрсатган журналист Робия Йўлдошева ҳамда “Тараққиёт кўзгуси” ва “Менинг оилам” газеталари суратчи-мухбири Маҳмуджон Шомуродовлар иштирок этишиб, Ўқитувчи ва мураббийларни байрам билан табрикладилар.
“Устоз хизматини қадрлаймиз” деб номланган адабий-мусиқий тадбирда мактабнинг 3-“А” синф ўқувчилари томонидан тайёрланган концерт дастури намойиш этилди.

Раъно АВАЗМУРОДОВА, 38-сонли мактаб ўқитувчиси.