Амударё тумани ҳокими Собир Хўжаметов ўз устозларини байрам билан табриклади

Инсоннинг ҳаётида энг унутилмас сиймо – унинг устози ҳисобланади. Устоз – ҳаётимизга нур таратувчи чироқ, инсонни ҳаёт йўлига бошловчи, қалбига эзгулик уруғини сочувчи буюк шахсдир. Устознинг кўрсатган йўли, берган сабоқлари жамият тараққиётининг, миллат камолотининг асоси бўлиб хизмат қилади.

1 октябрь – Ўқитувчи ва мураббийлар куни байрами сифатида юртимиз бўйлаб кенг нишонланади. Мактабларда, олий таълим муассасаларида, маданият марказларида устоз ва мураббийларга бағишланган байрам тадбирлари, учрашувлар, самимий суҳбатлар ўтказилади.

Байрам санаси муносабати билан Амударё тумани ҳокими Собир Хўжаметов ўз умр йўлида билим бериб, тарбия берган устозларига самимий эҳтиром кўрсатиб, байрам билан табриклади.

Туман ҳокими ёшлик чоғларида илк бора қўлига қалам тутқазган, билимга етаклаган биринчи устозини — Тўлқин овулидаги 33-сонли умумтаълим мактабининг фахрий ўқитувчиси Абдулла Ражабов домланинг хонадонларига ташриф буюриб, у кишини байрам билан қутлади. Самимиятга бой ушбу учрашув устоз-шогирд меҳрини ёдга солди. Домла ҳаётини таълимга, ёш авлод тарбиясига бағишлаган инсон сифатида туман ҳокимининг эҳтиромидан ғурурланиб, дуога қўл очди.

Шунингдек, туман ҳокими Собир Хўжаметов устози билан биргаликда ўзи таҳсил олган мактаб жамоаси билан ҳам учрашиб, ўқувчиларга китоблар, спорт анжомлари ва эсдалик совғаларини тақдим этди. Мактаб ҳовлисида устоз ва шогирд биргаликда дарахт кўчатлари экиб, эзгу анъанани давом этдирдилар. Бу эса авлодлар давомийлигини, ҳаётга умид ва янгиланиш рамзини ифода этди.

Жамиятда ўқитувчи ва мураббийлар ўрнини ҳеч нарса билан ўлчаб бўлмайди. Улар — маънавият пойдеворини қўювчи, қалбларга эзгулик сингдирувчи, ёш авлодни Ватанпарварлик, меҳнатсеварлик, инсонийлик руҳида тарбияловчи фидойи инсонлардир. Бугун мамлакатимиз тараққиёти, эришилаётган ютуқлар, келажак пойдеворининг мустаҳкамлиги ҳам айнан уларнинг заҳматлари, меҳр-муҳаббат билан қилган меҳнатлари эвазига бўлаётгани барчамизга аён.

Муҳтарам Президентимиз таъкидлаганидек, “Устозлик – энг шарафли ва энг масъулиятли касбдир”. Чунки устоз фақат билим бермайди, балки тарбия ҳам беради, инсонни шахс сифатида шакллантиради, жамиятга фойдали инсон бўлиб етишишига йўл кўрсатади.

Туман ҳокими мактаб даврида билим берган фахрий устозларидан бири Гулсара Бобониязовани ҳам байрам билан самимий табриклаб хонадонига ташриф буюрди.

Амударё туманида бўлиб ўтган ушбу самимий учрашув нафақат устоз-шогирд меҳрини, балки ёшларга бўлган эътибор ва таълим-тарбияга берилаётган юксак қадриятларни ҳам яққол намоён этди.

Бугун ёшлар қалбига билим уруғини сепаётган, келажакка ишонч бағишлаётган ўқитувчи ва мураббийларимизнинг шарафли меҳнати ҳар қанча эҳтиром ва қадрлашга лойиқ.

Чарос Арслонова, туман ҳокимлигининг Ахборот хизмати раҳбари.