Жайхун илҳомлари

Гина

(ҳазил)

Болаликда бироз қобил, шўх эдим,

Уришсам, акам бор – кўнгил тўқ эдим,

Бироқ эрка,тантиқ сафда йўқ эдим -

Онам менга айланайин демабди ...

 

Келсам лойга ботиб,ёқам йиртилиб,

Қарғамабди қаро ерга бир қилиб,

Фақат бошқалардай минг бир ўргилиб,

Онам менга айланайин демабди...

 

Олиб оёғимга кирган тиконни,

Қаймоққа ивитиб берарди нонни,

Сингилларим фидо қилар-у жонни,

Онам менга айланайин демабди...

 

“Тенгқурларинг чақиб келма, таёқ еб,

Йиғламайди йигит деган, болам”, деб,

Бола орасига тушмак кўрмай эп,

Онам менга айланайин демабди...

 

“Қаттиқ қоғоз” олди! – мақтанар отам,

Қўшниларга жўшар мисоли Ҳотам,

Жилмайиб, термулиб боқиб турса ҳам,

Онам менга айланайин демабди...

 

Дебди келинларга: ”Чалпак қил ширин,

Томбошда қовундан зўрин туширинг,

Болам бугун уйда – гўмма пиширинг!”

Онам менга айланайин демабди...

 

Бошимга иш тушса, синиб, мунғайди,

Тепамда шомларни тонгга улайди:

“Қўй, эркак йиғласа, осмон қулайди!”

Ўшанда ҳам айланайин демабди...

 

Баъзан айтиб қолар, эмишман “аъло!”

Билган ё Ҳадиснинг мазмунин илло:

“Оллоҳга яқинроқ ботиний дуо”.

Онам менга айланайин демабди...

 

Оқтиқ, човлиқ шовқин солар бебош-да,

Тилда шукур, дуо, кўпчик – ёнбошда,

Тўқсонга кирдилар, мен етмиш ёшда,

Ҳамон менга айланайин демайди...

Т.Абдуллаев.

Ўқувчиларимга

Биринчи қўнғироқ биринчи синф,

Жажжи болажонлар кўзлари ўтли.

Бириси шўх – шаддод, бириси ўйчан,

Сизни соғинаман болажонларим.

 

Ҳар бири бир дунё, бир олам эрур,

Орзу-умидлари дунёларга тенг.

“Бола” деб қараманг асло, дўстгинам,

Суҳбатин олсангиз катталарга тенг.

 

Саволлар беради, жавобин олиб,

Кўзлари порлашин кўрсангиз эди.

Салгина мақтовдан диллари ёниб,

Қувончдан чеҳраси кетар ёришиб.

 

Мана тўрт йил ўтиб кетди бир зумда,

Қувончли ташвишлар ила қувлашиб.

Охирги қўнғироқ жаранглар тинмай,

Хайр, жажжи дўстлар – болажонларим...

Гўзалхон САПАРБОЕВА,

13-сонли мактаб ўқитувчиси.

Устозлар

Ҳурматим чексиздир сиз устозларга,

Оқ-қорани танитган қалби уммонларга.

Сабрингиз ўйласам ўйларим етмас,

Ақлингиз мақтасам сўзларим битмас.

 

Мақсади ушалсин оппоқ қалбларнинг,

Қувончга буркансин шаҳло кўзларинг.

Қалбига туйганди ширин хаёллар,

Жонини берганди ўша устозлар.

 

Ҳаётда йўл топсин деб елиб-югурган,

Шогирдин Ватанга меҳрли қилган.

Дунёни ёритган мисли офтобларга,

Ҳурматим чексиздир, сиз устозларга.

Сурайё Ўрозимбетова, Ажиниёз номидаги НДПИ 4-босқич талабаси.

Устозларга

Билим олиш келажакка устундир,

Билимли халқ истиқболи ойдиндир.

Устозларим, доим омон бўлингиз,

Меҳрингиздан олам бағри бутундир.

 

Биз мактабни жондай азиз биламиз,

Аъло ўқиб, бағрида шод куламиз.

Устозлар сизларга қиламиз таъзим,

Биз улғайиб, юртга хизмат қиламиз.

Турсуной ЖИЯНБОЕВА,

27-сонли мактаб ўқувчиси.

Ифтихор

Атроф гўзал жуда ҳам,

Халқимиз яшар хуррам.

Қувончга тўла ҳар дам,

Шундай юртда яшайман!

 

Сарҳадлари мустаҳкам,

Дилларда йўқ асло ғам.

Ҳеч кимдан эмасмиз кам –

Шундай юртда яшайман.

 

Ўзбекистон – Ватаним.

Эркин қадам ташлайман.

Сенга фидо жон таним,

Фақат сен-чун яшайман!

Райҳон Тожибоева, 50-сонли мактаб ўқувчиси.

МАЖНУНТОЛ

Ариқчамнинг четида,

Маъюс турар мажнунтол.

Сув ичади шохлари,

Силаб ариқ бошини.

 

Ариқ жўшиб оқади,

Унга маъюс боқади.

Сира очмас юзини,

Кўрсатмайди кўзини.

 

Бошин кўкка чўзмайди,

Таъзим канда қилмайди.

Мажнунтолим, Мажнунтол,

Туришларинг маъюс ҳол.

Кумушой ЙЎЛДОШЕВА, 46-сонли мактаб ўқувчиси.

УСТОЗЛАР ОМОН БЎЛСИН!

Ёши етмишдан ошди,

Ҳали ҳам ўқияпти.

Китобнинг аҳамиятин,

Жуда кўп сўзлаяпти.

 

Сўзлар дурдир, сўз-сеҳр,

Қудратлидир уққанга.

Яхши гап жон озиғи,

Дейди бизни кўрганда.

 

Тўғри йўлдан юрганлар,

Етгайлар муродига.

Афсус-надомат билмас,

Ушбу қисқа  ҳаётда.

 

Устоз сўзи аълодир,

Ўгити дилимизда.

Яхшилик зўр ибратдир,

Яшайди қалбимизда.

З.АҲМЕДОВА.

УСТОЗ

Етаклайди тутсанг қўлидан,

Ўргатади юрсанг йўлидан.

Кам кўрмайди қиз-у ўғлидан,

Бу буюк зот устоздир, устоз!

 

Учқун бўлсанг аланга қилар,

Ҳаётингни гулларга буркар.

Ақлинг чархлар ва доно қилар,

Бу буюк зот устоздир, устоз!

 

Отадайин берар тарбия,

Юрагингда уйғотар ғоя.

Ўргатади шеър-у мадҳия,

Бу буюк зот устоздир, устоз!

Шокир ҲАЙИТ,

 12-сонли мактаб ўқувчиси.