Jayxun ilhomlari

Gina

(hazil)

Bolalikda biroz qobil, shoʻx edim,

Urishsam, akam bor – koʻngil toʻq edim,

Biroq erka,tantiq safda yoʻq edim -

Onam menga aylanayin demabdi ...

 

Kelsam loyga botib,yoqam yirtilib,

Qargʻamabdi qaro yerga bir qilib,

Faqat boshqalarday ming bir oʻrgilib,

Onam menga aylanayin demabdi...

 

Olib oyogʻimga kirgan tikonni,

Qaymoqqa ivitib berardi nonni,

Singillarim fido qilar-u jonni,

Onam menga aylanayin demabdi...

 

“Tengqurlaring chaqib kelma, tayoq yeb,

Yigʻlamaydi yigit degan, bolam”, deb,

Bola orasiga tushmak koʻrmay ep,

Onam menga aylanayin demabdi...

 

“Qattiq qogʻoz” oldi! – maqtanar otam,

Qoʻshnilarga joʻshar misoli Hotam,

Jilmayib, termulib boqib tursa ham,

Onam menga aylanayin demabdi...

 

Debdi kelinlarga: ”Chalpak qil shirin,

Tomboshda qovundan zoʻrin tushiring,

Bolam bugun uyda – goʻmma pishiring!”

Onam menga aylanayin demabdi...

 

Boshimga ish tushsa, sinib, mungʻaydi,

Tepamda shomlarni tongga ulaydi:

“Qoʻy, erkak yigʻlasa, osmon qulaydi!”

Oʻshanda ham aylanayin demabdi...

 

Baʼzan aytib qolar, emishman “aʼlo!”

Bilgan yo Hadisning mazmunin illo:

“Ollohga yaqinroq botiniy duo”.

Onam menga aylanayin demabdi...

 

Oqtiq, chovliq shovqin solar bebosh-da,

Tilda shukur, duo, koʻpchik – yonboshda,

Toʻqsonga kirdilar, men yetmish yoshda,

Hamon menga aylanayin demaydi...

T.Abdullayev.

Oʻquvchilarimga

Birinchi qoʻngʻiroq birinchi sinf,

Jajji bolajonlar koʻzlari oʻtli.

Birisi shoʻx – shaddod, birisi oʻychan,

Sizni sogʻinaman bolajonlarim.

 

Har biri bir dunyo, bir olam erur,

Orzu-umidlari dunyolarga teng.

“Bola” deb qaramang aslo, doʻstginam,

Suhbatin olsangiz kattalarga teng.

 

Savollar beradi, javobin olib,

Koʻzlari porlashin koʻrsangiz edi.

Salgina maqtovdan dillari yonib,

Quvonchdan chehrasi ketar yorishib.

 

Mana toʻrt yil oʻtib ketdi bir zumda,

Quvonchli tashvishlar ila quvlashib.

Oxirgi qoʻngʻiroq jaranglar tinmay,

Xayr, jajji doʻstlar – bolajonlarim...

Goʻzalxon SAPARBOYeVA,

13-sonli maktab oʻqituvchisi.

Ustozlar

Hurmatim cheksizdir siz ustozlarga,

Oq-qorani tanitgan qalbi ummonlarga.

Sabringiz oʻylasam oʻylarim yetmas,

Aqlingiz maqtasam soʻzlarim bitmas.

 

Maqsadi ushalsin oppoq qalblarning,

Quvonchga burkansin shahlo koʻzlaring.

Qalbiga tuygandi shirin xayollar,

Jonini bergandi oʻsha ustozlar.

 

Hayotda yoʻl topsin deb yelib-yugurgan,

Shogirdin Vatanga mehrli qilgan.

Dunyoni yoritgan misli oftoblarga,

Hurmatim cheksizdir, siz ustozlarga.

Surayyo Oʻrozimbetova, Ajiniyoz nomidagi NDPI 4-bosqich talabasi.

Ustozlarga

Bilim olish kelajakka ustundir,

Bilimli xalq istiqboli oydindir.

Ustozlarim, doim omon boʻlingiz,

Mehringizdan olam bagʻri butundir.

 

Biz maktabni jonday aziz bilamiz,

Aʼlo oʻqib, bagʻrida shod kulamiz.

Ustozlar sizlarga qilamiz taʼzim,

Biz ulgʻayib, yurtga xizmat qilamiz.

Tursunoy JIYaNBOYeVA,

27-sonli maktab oʻquvchisi.

Iftixor

Atrof goʻzal juda ham,

Xalqimiz yashar xurram.

Quvonchga toʻla har dam,

Shunday yurtda yashayman!

 

Sarhadlari mustahkam,

Dillarda yoʻq aslo gʻam.

Hech kimdan emasmiz kam –

Shunday yurtda yashayman.

 

Oʻzbekiston – Vatanim.

Erkin qadam tashlayman.

Senga fido jon tanim,

Faqat sen-chun yashayman!

Rayhon Tojiboyeva, 50-sonli maktab oʻquvchisi.

MAJNUNTOL

Ariqchamning chetida,

Maʼyus turar majnuntol.

Suv ichadi shoxlari,

Silab ariq boshini.

 

Ariq joʻshib oqadi,

Unga maʼyus boqadi.

Sira ochmas yuzini,

Koʻrsatmaydi koʻzini.

 

Boshin koʻkka choʻzmaydi,

Taʼzim kanda qilmaydi.

Majnuntolim, Majnuntol,

Turishlaring maʼyus hol.

Kumushoy YOʻLDOShEVA, 46-sonli maktab oʻquvchisi.

USTOZLAR OMON BOʻLSIN!

Yoshi yetmishdan oshdi,

Hali ham oʻqiyapti.

Kitobning ahamiyatin,

Juda koʻp soʻzlayapti.

 

Soʻzlar durdir, soʻz-sehr,

Qudratlidir uqqanga.

Yaxshi gap jon ozigʻi,

Deydi bizni koʻrganda.

 

Toʻgʻri yoʻldan yurganlar,

Yetgaylar murodiga.

Afsus-nadomat bilmas,

Ushbu qisqa  hayotda.

 

Ustoz soʻzi aʼlodir,

Oʻgiti dilimizda.

Yaxshilik zoʻr ibratdir,

Yashaydi qalbimizda.

Z.AHMEDOVA.

USTOZ

Yetaklaydi tutsang qoʻlidan,

Oʻrgatadi yursang yoʻlidan.

Kam koʻrmaydi qiz-u oʻgʻlidan,

Bu buyuk zot ustozdir, ustoz!

 

Uchqun boʻlsang alanga qilar,

Hayotingni gullarga burkar.

Aqling charxlar va dono qilar,

Bu buyuk zot ustozdir, ustoz!

 

Otadayin berar tarbiya,

Yuragingda uygʻotar gʻoya.

Oʻrgatadi sheʼr-u madhiya,

Bu buyuk zot ustozdir, ustoz!

Shokir HAYIT,

 12-sonli maktab oʻquvchisi.