“Жайхун илҳомлари” ННТ томонидан кам таъминланган оилаларга 1000 туп кўчат тарқатилди

Бугунги кунда атроф-муҳит муҳофазаси ва аҳолининг экологик маданиятини юксалтириш нафақат давлат ташкилотларининг, балки фуқаролик жамияти институтларининг ҳам асосий вазифаларидан бирига айланди. Хусусан, нодавлат нотижорат ташкилотларининг ижтимоий шериклик асосида амалга ошираётган лойиҳалари ҳудудлардаги экологик вазиятни барқарорлаштириш ҳамда аҳоли турмуш фаровонлигини оширишда муҳим аҳамият касб этмоқда.

Яқинда “Жайхун илҳомлари” нодавлат нотижорат ташкилоти Ўзбекистон Республикаси Олий Мажлиси ҳузуридаги Фуқаролик жамияти институтларини қўллаб-қувватлаш жамоат фонди томонидан эълон қилинган грант танловида иштирок этиб, ғолибликни қўлга киритди. “Аҳолининг экологик онги ва маданиятини юксалтириш ва соҳада амалий ишларни тарғиб қилиш” йўналиши бўйича тақдим этилган "Экологик маданият – соғлом келажак асоси" лойиҳаси комиссия томонидан юқори баҳоланиб, молиялаштирилди. Бу эса Қорақалпоғистоннинг Амударё туманида кенг кўламли хайрли ишларни бошлаш учун ҳуқуқий ва молиявий замин яратди.

Мазкур грант лойиҳаси доирасида амалга оширилаётган илк йирик тадбирлардан бири — "Оиламиз боғини яратамиз!" акцияси бўлди. Таъкидлаш жоизки, ушбу ташаббус шунчаки кўчат экиш тадбири эмас, балки аниқ мақсадга йўналтирилган ижтимоий қўллаб-қувватлаш лойиҳасидир. Амударё тумани Маҳаллалар уюшмаси ҳамда “Инсон” ижтимоий хизматлар маркази билан ҳамкорликда ташкил этилган акция давомида тумандаги ижтимоий ҳимояга муҳтож, кам таъминланган ва “Ижтимоий ҳимоя” ягона реестрига киритилган оилалар танлаб олинди.

Лойиҳа доирасида туман бўйича 50 та эҳтиёжманд оиланинг ҳар бирига 20 тупдан, жами 1000 туп сара мевали дарахт кўчатлари бепул тарқатилди. Жараённинг шаффоф ва манзилли бўлишини таъминлаш мақсадида кўчатлар “Инсон” ижтимоий хизматлар марказининг жойлардаги ходимларига топширилди. Ижтимоий ходимлар эса ўз навбатида нафақат кўчатларни эгаларига етказиб бериш, балки уни экиш ишларига ҳам яқиндан кўмаклашадилар.

Оролбўйи минтақасида, хусусан, Амударё туманида яшилликни кўпайтириш, ҳаво мусаффолигини таъминлаш ва тупроқ шўрланишининг олдини олишда ҳар бир туп дарахтнинг ўрни беқиёс. 1000 туп янги дарахт экиш — бу келажакда тоза ҳаво манбаи ва мўътадил микроиқлимга кичик бўлсада ҳисса қўшиш деганидир. Шу ўринда лойиҳанинг иқтисодий самарадорлигини ҳам унутмаслик керак. Мевали дарахтлар бир неча йилдан сўнг ҳосилга киргач, ушбу оилалар учун қўшимча даромад манбаига айланади. Бу “камбағалликни қисқартириш” умуммиллий ҳаракати билан ҳамоҳанг бўлиб, аҳолининг томорқадан самарали фойдаланиш кўникмасини шакллантиради ва оила бюджетига фойда келтиради.

Лойиҳа фақат кўчат экиш билан чекланиб қолмайди. Унинг доирасида аҳолининг экологик ҳуқуқий саводхонлигини оширишга қаратилган тизимли ишлар ҳам режалаштирилган. Хусусан, овул ва маҳаллаларда фуқаролар билан учрашувлар ўтказилиб, унда экология ва атроф-муҳитни муҳофаза қилишга оид қонунчилик янгиликлари тушунтирилади.

Ёш авлод тарбияси ҳам лойиҳанинг диққат марказида бўлади. "Ёш эколог" тўгараги аъзолари учун табиат бағрига саёҳатлар уюштириш ҳам кўзда тутилган бўлиб, бу болаларда она табиатга меҳр уйғотишнинг энг самарали усулидир. Шунингдек, умумтаълим мактаблари ўқувчилари ўртасида "Яшил табиатни асраш – ўз қўлимизда" мавзусида иншолар танлови, турли ижодий ишлар, шеър ва расмлар танловларини ўтказиш режа қилинган. Бу тадбирлар ёшларда экологик онгни шакллантиришга, уларни табиатга нисбатан масъулиятли бўлишга ундайди.

Хулоса ўрнида айтганда, “Жайхун илҳомлари” нодавлат нотижорат ташкилоти томонидан амалга оширилаётган мазкур лойиҳа давлат ва жамоат ташкилотлари ҳамкорлигининг ёрқин намунасидир. У бир вақтнинг ўзида ҳам ижтимоий, ҳам экологик муаммолар ечимига хизмат қилиши билан аҳамиятлидир.