БАРКАМОЛ АВЛОД ТАРБИЯСИ –ТАРАҚҚИЁТ АСОСИ
Юртимизда фарзандларимизнинг мактабгача таълим олишларига жиддий эътибор қаратилиб, мактабгача таълим ташкилотлари сони йилдан-йилга ортиб бормоқда. Бугунги кунда туманимиздаги мактабгача таълим ташкилотлари сони 106 та бўлиб, шундан 50 таси давлат, 3 таси давлат-хусусий шерикчилик асосида ташкил қилинган нодавлат МТТ ва 53 таси оилавий нодавлат МТТлар ҳисобланади. Уларга қамраб олинган болалар сони 9627 нафардан иборатдир. Ҳозирда туманимизда мактабгача ёшдаги болаларни қамраб олиш кўрсаткичи 58,2 фоизга етди.
Инвестиция дастури асо-сида тумандаги 3 та 6-, 20-, 13-сонли МТТларда карантин қоидаларига амал қилган ҳолда реконструкция ишлари амалга оширилмоқда. Шунингдек, Тош ёп овули ҳудудида 100 ўринли давлат хусусий шерикчилик асосида нодавлат мактабгача таълим ташкилотида қурилиш ишлари олиб борилмоқда.
Ҳукуматнинг пандемия сабабли мактабгача таълим ташкилотларида коронавирус инфекциясининг профилактикаси бўйича чора-тадбирларни кучайтириш мақсадида қабул қилинган тегишли қарори билан тумандаги барча турдаги мактабгача таълим ташкилотлари фаолияти вақтинча тўхтатилди.
Туман мактабгача таълим бўлимига қарашли давлат мактабгача таълим ташкилотларида карантин тартибларига амал қилган ҳолда таълим-тарбия ишлари масофавий тарзда йўлга қўйилди.
Тарбиячилар кунлик режа асосида ахборот-коммуникация технологиялари имкониятларидан кенг фойдаланган ҳолда онлайн машғулотлар ўтмоқдалар. Тарбияланувчилар ва уларнинг ота-оналарига кундалик, ҳафталик иш режаси мавзуларидан келиб чиқиб, видеолавҳа орқали машғулотлар ўтиб, вазифалар бериб келинмоқда. Шунингдек, мактабгача таълим ташкилоти ҳамширалари ҳам ота-оналар билан мунтазам равишда алоқада бўлиб, болажонларнинг соғлигидан бохабар бўлиб турмоқдалар.
Юртимиздаги эпидемиологик вазият бироз яхшиланиши билан пандемия шароитида нодавлат мактабгача таълим ташкилотлари фаолиятини қайта ташкил этишга қаратилган чора-тадбирлар асосида тумандаги 3 та давлат-хусусий шерикчилик ҳамда 41 та оилавий нодавлат мактабгача таълим ташкилотлари карантин қоидаларига амал қилган ҳолда фаолиятини қайта тиклади. Гуруҳлардаги тарбияланувчилар сони 15 нафардан оширилмаган ҳолда таълим-тарбия бериб келинмоқда.
Шунинг билан бир қаторда 2020-2021 йилги куз-қиш мавсумига тайёргарлик кўриш ва уни беталофат ўтказиш мақсадида мактабгача таълим ташкилотлари атрофини ободонлаштириш, дарахтларни оқлаш, қозонхоналарни тозалаш, ташқи иситиш трубаларини изоляция қилиш, хоналарни тозалаш, ўйин майдончаларини, озиқ-овқат омборхоналарини янги ўқув йилига тайёр ҳолга келтириш чоралари кўрилди. Шунингдек, 2020-2021 йиллар куз-қиш мавсуми учун мактабгача таълим ташкилотларига 908,5 тонна кўмир етказиб бериш режалаштирилган бўлиб, ҳозирги кунда жами 544,5 тонна кўмир ёнилғиси келтирилди. Шундан 209 тонна кўмир ва 335,5 тонна кўмир брикети билан таъминланди. Кўмир ёнилғиси етказиб бериш ишлари давом этмоқда.
Замонавий таълим-тарбия жамият тараққиётининг муҳим асоси ҳисобланади. Биз эса келажак эгалари бўлган ёш авлодга мана шу таълим-тарбия ишларини амалга оширишга масъулмиз.
Ёш авлод тарбиясига масъул бўлган тарбиячилар, мураббийлар, ўқитувчиларни 1 октябрь – Ўқитувчи ва мураббийлар куни билан самимий муборакбод этаман!
Саида СОДИҚОВА, туман Мактабгача таълим бўлими мудири.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
