САМАРҚАНД ЁШЛАР ФОРУМИ – ДУНЁ ТАРИХИДА ҚОЛАДИ

Шу йилнинг 12-13 август кунларида қадимий ва ҳамиша навқирон Самарқанд шаҳрида видеоконференция шаклида инсон ҳуқуқлари мавзусида ёшлар форуми бўлиб ўтди. Инсон ҳуқуқлари бўйича Ўзбекистон Миллий Маркази ўтказган ушбу анжуман инсон ҳуқуқлари соҳасида халқаро ва минтақавий ҳамкорликни мустаҳкамлаш масалаларини кенг муҳокама этиш, ёшлар ҳуқуқларини ҳимоя қилиш ва рағбатлантиришга тааллуқли мавжуд халқаро ҳамда минтақавий механизмларни таҳлил қилишга бағишланди.

Эътиборлиси, ушбу форумда БМТнинг Ёшлар ҳуқуқлари бўйича Конвенцияси лойиҳаси биринчи марта жаҳоннинг етакчи экспертлари муҳокамаси учун ҳавола этилди. Конвенция лойиҳаси мамлакатимиз раҳбари Ш.Мирзиёевнинг БМТ Бош Ассамблеясининг 72-сессиясида билдирган таклифларига мувофиқ тайёрланган.

Ушбу анжуманда Бирлашган Миллатлар Ташкилоти, Европа Иттифоқи, Ислом Ҳамкорлик Ташкилоти, Мустақил Давлатлар Ҳамдўстлиги, Африка Иттифоқи тизимидаги ёшлар тузилмалари раҳбарлари, дипломатик корпус вакиллари, инсон ҳуқуқлари бўйича халқаро, минтақавий ва миллий институтлар, фуқаролик жамияти институтлари,  ёшлар ташкилотлари вакиллари, олимлар ва экспертлардан иборат 300 нафардан зиёд киши иштирок этдилар.

Шунингдек, Форумда Олий Мажлис Сенати, Қонунчилик Палатаси ҳузуридаги Ёшлар парламенти, Ёшлар ишлари бўйича агентлик, ёшлар ташкилотлари вакиллари ҳам қатнашдилар.

Шуниси эътиборлики, мамлакатимизда жами аҳолининг 60 фоизини ташкил этувчи ёшларнинг ҳуқуқ ва эркинликлари, қонуний манфаатларини таъминлаш давлат сиёсатининг устувор йўналиши этиб белгиланган. Ёш авлодни ҳар томонлама қўллаб-қувватлашга, уйғун ривожлантиришга, ҳар бири жамиятда ўзининг муносиб ўрнини топишига хизмат қилувчи қонунлар, Президент Фармон ва қарорлари, ҳукумат қарорлари қабул қилинди, Олий Мажлис Палаталари ҳузурида Ёшлар Парламентлари тузилди, Ёшлар ишлари агентлиги, Ёшлар масалалари бўйича идоралараро кенгаш ташкил этилди.

Бугунги кунда дунё миқёсида ёшлар дуч келаётган кўпгина муаммолар – тинчлик ва хавфсизликка таҳдидлар, терроризм ва экстремизм, ирқчилик, иқлим ўзгаришлари ўзаро келишилган глобал ҳамкорликни йўлга қўйишни, буларни ҳал этиш жараёнларига дунё ёшларини фаол жалб этишни тақозо қилаётган эди.

Самарқандда бўлиб ўтган “Ёшлар 2020: глобал миқёсдаги бирдамлик, барқарор тараққиёт ва инсон ҳуқуқлари” мавзусида ўтказилган форумда муҳокамага ташланган БМТнинг Ёшлар ҳуқуқлари бўйича Конвенцияси лойиҳаси ушбу вазифаларни қамраб олгани билан аҳамиятлидир.

Муҳтарам Президентимиз Шавкат Мирзиёев Самарқанд Форуми қатнашчиларига табрик йўллаб, уларни Халқаро ёшлар куни ва ушбу нуфузли анжуман билан қутлади.

Мамлакатимиз раҳбари қутловида ёшларга “... келажакка интилиб яшайдиган ёш авлод сайёрамизда фаровон ҳаёт ва юксак тараққиёт барқарор бўлиши учун янги ғоялар ва ижодий руҳдаги саъй-ҳаракатларни амалга оширадиган беқиёс кучдир” дея баҳо бергани ҳар бир ўзбекистонлик йигит-қизлар кўнглини фахр-ифтихорга тўлдиради.

Юртбошимиз “бугунгидек шароитда ёшларнинг овозига қулоқ тутиш муҳим. Уларнинг долзарб эҳтиёжларини таъминлаш, ҳуқуқ ва қонуний манфаатларини ҳимоя қилишга қаратилган миллий, минтақавий ва глобал стратегия ва дастурларни ишлаб чиқиш ва амалга  оширишда бевосита иштирок этишларига шароит яратиб бериш зарур”, дея таъкидладилар.

Шу билан бирга форум иштирокчиларини бунга хизмат қилувчи БМТнинг Ёшлар ҳуқуқлари бўйича Конвенцияси лойиҳасини қўллаб-қувватлашга ва янги маъно-мазмун билан бойитишга чақирдилар.

Конвенция лойиҳасида, ҳеч муболағасиз айтиш мумкинки, дунё ёшлари келажаги порлоқ бўлишига хизмат қилувчи масалалар чуқур ўрин олган. Келгусида дунё ҳаётида ушбу ҳужжат Самарқанд ёшлар форуми билан боғлиқ ҳолда тилга олинишининг ўзи ўзбекистонлик ёшларга улкан масъулият ҳиссини юклайди.

Севара Исмоилова, ҚДУ талабаси, ёшлар фаоли.