SAMARQAND YoShLAR FORUMI – DUNYo TARIXIDA QOLADI

Shu yilning 12-13-avgust kunlarida qadimiy va hamisha navqiron Samarqand shahrida videokonferentsiya shaklida inson huquqlari mavzusida yoshlar forumi boʻlib oʻtdi. Inson huquqlari boʻyicha Oʻzbekiston Milliy Markazi oʻtkazgan ushbu anjuman inson huquqlari sohasida xalqaro va mintaqaviy hamkorlikni mustahkamlash masalalarini keng muhokama etish, yoshlar huquqlarini himoya qilish va ragʻbatlantirishga taalluqli mavjud xalqaro hamda mintaqaviy mexanizmlarni tahlil qilishga bagʻishlandi.

Eʼtiborlisi, ushbu forumda BMTning Yoshlar huquqlari boʻyicha Konventsiyasi loyihasi birinchi marta jahonning yetakchi ekspertlari muhokamasi uchun havola etildi. Konventsiya loyihasi mamlakatimiz rahbari Sh.Mirziyoyevning BMT Bosh Assambleyasining 72-sessiyasida bildirgan takliflariga muvofiq tayyorlangan.

Ushbu anjumanda Birlashgan Millatlar Tashkiloti, Yevropa Ittifoqi, Islom Hamkorlik Tashkiloti, Mustaqil Davlatlar Hamdoʻstligi, Afrika Ittifoqi tizimidagi yoshlar tuzilmalari rahbarlari, diplomatik korpus vakillari, inson huquqlari boʻyicha xalqaro, mintaqaviy va milliy institutlar, fuqarolik jamiyati institutlari,  yoshlar tashkilotlari vakillari, olimlar va ekspertlardan iborat 300 nafardan ziyod kishi ishtirok etdilar.

Shuningdek, Forumda Oliy Majlis Senati, Qonunchilik Palatasi huzuridagi Yoshlar parlamenti, Yoshlar ishlari boʻyicha agentlik, yoshlar tashkilotlari vakillari ham qatnashdilar.

Shunisi eʼtiborliki, mamlakatimizda jami aholining 60 foizini tashkil etuvchi yoshlarning huquq va erkinliklari, qonuniy manfaatlarini taʼminlash davlat siyosatining ustuvor yoʻnalishi etib belgilangan. Yosh avlodni har tomonlama qoʻllab-quvvatlashga, uygʻun rivojlantirishga, har biri jamiyatda oʻzining munosib oʻrnini topishiga xizmat qiluvchi qonunlar, Prezident Farmon va qarorlari, hukumat qarorlari qabul qilindi, Oliy Majlis Palatalari huzurida Yoshlar Parlamentlari tuzildi, Yoshlar ishlari agentligi, Yoshlar masalalari boʻyicha idoralararo kengash tashkil etildi.

Bugungi kunda dunyo miqyosida yoshlar duch kelayotgan koʻpgina muammolar – tinchlik va xavfsizlikka tahdidlar, terrorizm va ekstremizm, irqchilik, iqlim oʻzgarishlari oʻzaro kelishilgan global hamkorlikni yoʻlga qoʻyishni, bularni hal etish jarayonlariga dunyo yoshlarini faol jalb etishni taqozo qilayotgan edi.

Samarqandda boʻlib oʻtgan “Yoshlar 2020: global miqyosdagi birdamlik, barqaror taraqqiyot va inson huquqlari” mavzusida oʻtkazilgan forumda muhokamaga tashlangan BMTning Yoshlar huquqlari boʻyicha Konventsiyasi loyihasi ushbu vazifalarni qamrab olgani bilan ahamiyatlidir.

Muhtaram Prezidentimiz Shavkat Mirziyoyev Samarqand Forumi qatnashchilariga tabrik yoʻllab, ularni Xalqaro yoshlar kuni va ushbu nufuzli anjuman bilan qutladi.

Mamlakatimiz rahbari qutlovida yoshlarga “... kelajakka intilib yashaydigan yosh avlod sayyoramizda farovon hayot va yuksak taraqqiyot barqaror boʻlishi uchun yangi gʻoyalar va ijodiy ruhdagi saʼy-harakatlarni amalga oshiradigan beqiyos kuchdir” deya baho bergani har bir oʻzbekistonlik yigit-qizlar koʻnglini faxr-iftixorga toʻldiradi.

Yurtboshimiz “bugungidek sharoitda yoshlarning ovoziga quloq tutish muhim. Ularning dolzarb ehtiyojlarini taʼminlash, huquq va qonuniy manfaatlarini himoya qilishga qaratilgan milliy, mintaqaviy va global strategiya va dasturlarni ishlab chiqish va amalga  oshirishda bevosita ishtirok etishlariga sharoit yaratib berish zarur”, deya taʼkidladilar.

Shu bilan birga forum ishtirokchilarini bunga xizmat qiluvchi BMTning Yoshlar huquqlari boʻyicha Konventsiyasi loyihasini qoʻllab-quvvatlashga va yangi maʼno-mazmun bilan boyitishga chaqirdilar.

Konventsiya loyihasida, hech mubolagʻasiz aytish mumkinki, dunyo yoshlari kelajagi porloq boʻlishiga xizmat qiluvchi masalalar chuqur oʻrin olgan. Kelgusida dunyo hayotida ushbu hujjat Samarqand yoshlar forumi bilan bogʻliq holda tilga olinishining oʻzi oʻzbekistonlik yoshlarga ulkan masʼuliyat hissini yuklaydi.

Sevara Ismoilova, QDU talabasi, yoshlar faoli.