ДОКА PЎМОЛ ҚУPИДИ...

    Эр-хотиннинг уруши – дока  рўмолнинг қуриши. Ҳа, оила борки, ҳаммасида ҳам баъзан келишмовчиликлар, бир-бировни тушунмаслик, бирининг кўнглини бири англамай қолиши натижасида хафагарчиликлар бўлиб туради. Шундай дамларда аёлнинг бир гапдан қолиши ё эрнинг бироз  босиқлик қилиши билан оилавий  ҳаёт яна ўз изига тушади. Момоларимиз оила қураётган ёшларга оила қўрғонининг икки бурчагида бол, икки бурчагида заҳар туради, аччиғига ҳам, чучугига ҳам чидасанг, қўрғонинг мустаҳкам бўлади, деб бежизга насиҳат қилишмайди.

        Ҳар бир оиланинг ўз тутуми, тарозиси бор. Ҳар оила ўз олдига мустақил ҳудуд. Шунинг учун ҳам бир оиланинг қизи келин бўлиб тушган оиласида палак отиб, эл бўлиб кетиши бироз қийин кечади. Бироқ Манғит шаҳрининг маҳаллаларидан бирида яшовчи Шерзод (исмлар ўзгартирилган)  Насиба билан бир ёстиққа бош қўйиб, оила қурганига неча йиллар ўтиб, уч нафар фарзанднинг ота-оналари бўлгунигача ҳам бир-бирига бўйин эгиб, “қўшқанот”, ҳамжиҳат бўлишни ўзларига эп кўрмади. Натижада оилавий жанжалларнинг бирида Шерзод аёлининг юзига қаттиқроқ шапалоқ тортиб юборди. Буни кутмаган аёл  жаҳл устида шифохонага мурожаат қилди ва эридан жабрланганини маълум қилди. Шифохонада унга тиббий ёрдам кўрсатишди ва ҳолат юзасидан ...  белгиланган тартибга кўра туман Ички ишлар бўлимига хабар беришди.

        Эрининг устидан маъмурий иш қўзғатилганида Насиба бу ҳаракатларининг оқибатини чуқур англади ва аллақачон ярашиб олгани учун унга даъвоси йўқлигини билдириб, судга ариза ёзди. Шунинг учун ҳам шу йилнинг 21 май куни туман Маъмурий судида бўлиб ўтган суд мажлисида Шерзод маъмурий жазодан озод қилиниб,  унга огоҳлантириш берилди.

Шу ўринда бир мулоҳаза: биз ҳеч қандай оилавий нотинчликлар, уруш-жанжалларни ёқлашдан, аёл айбдор ёки эр айбдор дейиш фикридан йироқмиз. Лекин кирар эшигингни қаттиқ ёпма  деганларидай, фуқароларимиз ўзаро ҳал қилиши мумкин бўлган масалаларда ҳам бирининг обрўсини бири тўкишга ҳаракат қилишнинг ўрнига ўзаро аҳилликни сақлашса, тинч-тотув яшашга интилишса, мақсадга мувофиқ бўлар эди, деймиз.

              М.Каримбоева, туман Маъмурий суди раиси.

Ойгул Pажабова, журналист.