DOKA POʻMOL QUPIDI...

    Er-xotinning urushi – doka  roʻmolning qurishi. Ha, oila borki, hammasida ham baʼzan kelishmovchiliklar, bir-birovni tushunmaslik, birining koʻnglini biri anglamay qolishi natijasida xafagarchiliklar boʻlib turadi. Shunday damlarda ayolning bir gapdan qolishi yo erning biroz  bosiqlik qilishi bilan oilaviy  hayot yana oʻz iziga tushadi. Momolarimiz oila qurayotgan yoshlarga oila qoʻrgʻonining ikki burchagida bol, ikki burchagida zahar turadi, achchigʻiga ham, chuchugiga ham chidasang, qoʻrgʻoning mustahkam boʻladi, deb bejizga nasihat qilishmaydi.

        Har bir oilaning oʻz tutumi, tarozisi bor. Har oila oʻz oldiga mustaqil hudud. Shuning uchun ham bir oilaning qizi kelin boʻlib tushgan oilasida palak otib, el boʻlib ketishi biroz qiyin kechadi. Biroq Mangʻit shahrining mahallalaridan birida yashovchi Sherzod (ismlar oʻzgartirilgan)  Nasiba bilan bir yostiqqa bosh qoʻyib, oila qurganiga necha yillar oʻtib, uch nafar farzandning ota-onalari boʻlgunigacha ham bir-biriga boʻyin egib, “qoʻshqanot”, hamjihat boʻlishni oʻzlariga ep koʻrmadi. Natijada oilaviy janjallarning birida Sherzod ayolining yuziga qattiqroq shapaloq tortib yubordi. Buni kutmagan ayol  jahl ustida shifoxonaga murojaat qildi va eridan jabrlanganini maʼlum qildi. Shifoxonada unga tibbiy yordam koʻrsatishdi va holat yuzasidan ...  belgilangan tartibga koʻra tuman Ichki ishlar boʻlimiga xabar berishdi.

        Erining ustidan maʼmuriy ish qoʻzgʻatilganida Nasiba bu harakatlarining oqibatini chuqur angladi va allaqachon yarashib olgani uchun unga daʼvosi yoʻqligini bildirib, sudga ariza yozdi. Shuning uchun ham shu yilning 21-may kuni tuman Maʼmuriy sudida boʻlib oʻtgan sud majlisida Sherzod maʼmuriy jazodan ozod qilinib,  unga ogohlantirish berildi.

Shu oʻrinda bir mulohaza: biz hech qanday oilaviy notinchliklar, urush-janjallarni yoqlashdan, ayol aybdor yoki er aybdor deyish fikridan yiroqmiz. Lekin kirar eshigingni qattiq yopma  deganlariday, fuqarolarimiz oʻzaro hal qilishi mumkin boʻlgan masalalarda ham birining obroʻsini biri toʻkishga harakat qilishning oʻrniga oʻzaro ahillikni saqlashsa, tinch-totuv yashashga intilishsa, maqsadga muvofiq boʻlar edi, deymiz.

              M.Karimboyeva, tuman Maʼmuriy sudi raisi.

Oygul Pajabova, jurnalist.