ИШЧИ ГУРУҲ АЪЗОСИ Г. УББИЕВА АҲОЛИ ХОНАДОНЛАРИГА ТАШРИФ БУЮРДИ

Бутун дунёни ларзага солган коронавирус пандемияси даврида жорий қилинган карантин қоидалари халқимизни нафақат огоҳ яшашга, балки ўз турмуш тарзини ислоҳ қилишга ҳам ўргатди. Ҳар бир хонадон, ҳар бир оила соҳиби учун соғлом ҳаёт сари интилиш олтин қоидага айланди. Бу эса кундан-кунга чирой очиб бораётган обод қишлоқ ва маҳаллалар қиёфасида ўз аксини топмоқда.
Айни кунда туманимизнинг қайси гўшасига борманг, бири-биридан сўлим ва файзли кўчалар, боғ-роғларга бурканган ҳовли-ю хонадонларни кўриб, қалбингиз ҳавасга, фахрланиш туйғусига тўлади. Бутун  мамлакатимиз бўйлаб “Жонажон юртим ободлигига ўз ҳиссамни қўшаман!” шиори остида давом этаётган ободонлаштириш ва кўкаламзорлаштириш тадбирлари туманимиз овул ва маҳаллаларида тобора кенг тус олаётганига гувоҳ бўласиз. Мазкур шиор остида Қорақалпоғистон Республикаси маҳаллаларидаги хонадонларни янада обод ва кўркам қилиш бўйича 2020 йил июнь-август ойларида амалга ошириладиган чора-тадбирлар ижроси билан танишиш мақсадида жорий йилнинг 15-16 июнь кунлари Қорқалпоғистон Республикаси Маҳалла ва оилани қўллаб-қувватлаш вазирлиги бош мутахассиси, ишчи гуруҳ аъзоси Гуласен Уббиева туманимизда бўлиб, овул ва маҳаллалар фуқаролар йиғинлари масъуллари ҳамда аҳоли вакиллари билан учрашди.
Гуласен Уббиева туман Маҳалла ва оилани қўллаб-қувватлаш бўлими бош мутахассиси Гавҳар Чимбойчиева ҳамроҳлигида Дўрман, Қиличбой, Ўрта қалъа овуллари ҳамда Аёқчи, Хизр эли, Манғит шаҳрининг Дўстлик ва Бойовул маҳаллаларида бўлиб, мазкур ҳудудлардаги ободонлаштириш ва кўкаламзорлаштириш бўйича олиб борилаётган ишлар билан яқиндан танишди. Гуласен Уббиева уйма-уй кириб бориб, аҳоли билан мулоқотлар ўтказиш жараёнида кўчаларнинг озодалигига, уйларнинг фасад қисмларида олиб борилган таъмирлаш ва пардозлаш ишларининг сифатига, кўркамлигига, ҳар бир овул ва маҳалладаги намунали кўча, намунали хонадон, энг ораста томорқага аҳолида эътибор берди. Ҳар бир овул ва маҳаллада ана шу каби шинам, файзли, обод хонадонларни кўпайтириш зарурлигини таъкидлади.
Шунингдек, Гуласен Уббиева Маҳалла ва оилани қўллаб-қувватлаш бўлими масъуллари ҳамроҳлигида тумандаги кам таъминланган оилалар аҳволидан ҳам хабар олди. Хусусан, Дўрман овулида яшовчи Гулшод Тожибоева, Гулнора Хўжаметова, Қиличбой овулида истиқомат қилувчи Муқаддас Тажимуродова ҳамда Хизр эли маҳаллалик Боғдагул Машариповаларнинг оилаларида бўлиб, уларни қийнаб келаётган муаммоларни ўрганди. Кам таъминланган оилаларга ҳомий ташкилотлар томонидан озиқ-овқат маҳсулотларини тарқатилди.
Бу синовли кунлар ҳам ортда қолиб, яна аввалги ҳаёт тарзи давом этишига халқимизда умид ва ишонч катта. Шу боис туманимиз аҳолиси ҳам карантин қоидаларига амал қилиб, ўз уйларида томорқа ва бошқа юмушлар билан банд бўлишмоқда.
Пандемия шароитида давлатимиз томонидан берилаётган кўмак, кўрсатилаётган эътибор ва ғамхўрликдан ниҳоятда мамнун бўлган оилалар масъулларга миннатдорлик билдирдилар.

Робия ЙЎЛДОШЕВА.