ИШЛАБ ЧИҚАPИШ КООПЕPАТИВИГА ЕP МАЙДОНИ АЖPАТИЛДИ

Қишлоқ хўжалиги – аҳоли учун озиқ-овқат маҳсулотларини етказиб берувчи асосий манбадир. Мамлакатимиз қишлоқ хўжалиги бўйича улкан салоҳиятга эга. Бозорларимиз тўкин, халқимиз ризқи мўл-кўл бўлишидан тортиб, экспортдан қўшимча даромад топишгача бўлган жуда кўп масалалар шу соҳа билан боғлиқ.

Кейинги йилларда қишлоқ хўжалигини ислоҳ қилиш ва бозор механизмларини жорий этиш бўйича қатор ишлар амалга оширилди. Пахтачилик ва ғаллачилик чинакам даромад манбаига айланди.

Қишлоқ хўжалигининг асосий тармоқларидан ҳисобланган мева-сабзавот етиштиришда иш унумдорлигини янада ошириш, маҳсулот етиштиришда ишлаб чиқарувчи корхона, ташкилотлар ва ишчи-ходимлар ўртасида ўзаро ҳамкорликни йўлга қўйиш мақсадида ҳудудларда ишлаб чиқариш кооперативлари ташкил қилинмоқда.

Шундай ишлаб чиқариш кооперативларидан бири туманимизда ҳам ташкил қилинди. Бу борада туман ҳокимининг жорий йил 6 май санасида қатор қонун ҳужжатларига асосланган ҳолда қабул қилган “Ишлаб чиқариш кооперативига ер майдонларини ижарага ажратиб бериш тўғрисида”ги қарори қабул қилинди. Мазкур қарорга кўра, Жумур овул маҳалласи ҳудуди Зарбдор массивидаги туман ҳокимлиги заҳира ерларидан “Бунёд-иззат” ишлаб чиқариш кооперативига қишлоқ хўжалиги маҳсулотларини етиштиришга доимий эгалик қилиш учун ер майдонларини ажратиб бериш белгиланди.

Шу ўринда айтиш жоизки, ишлаб чиқаришни кооперациялаш — ишлаб чиқаришни ташкил қилиш шакли бўлиб, маълум бир маҳсулотни ҳамкорликда тайёрлаш учун корхоналар ўртасида махсус ишлаб чиқариш муносабатлари ҳисобланади. Ижтимоий меҳнат тақсимоти чуқурлашган сари ишлаб чиқариш ривожланиб боради ва у биринчи навбатда, корхоналарнинг чекланган турдаги маҳсулот, маҳсулот қисмларини ишлаб чиқаришга ихтисослашувида кўринади. Бу жараён корхоналар ўртасида рақобат курашини ҳам оширади.

Туман ҳокимининг юқоридаги қарори билан “Бунёд-Иззат” ишлаб чиқариш кооперативига қишлоқ хўжалиги маҳсулотлари етиштиришни янада такомиллаштириш мақсадида Зарбдор массивида умумий майдони 16,9 гектар, шундан 16,2 гектар экин ерлар, 0,7 гектар қишлоқ хўжалигида фойдаланилмайдиган бошқа ер майдонлари доимий эгалик қилиш учун ажратилди.

Шунингдек, қишлоқ хўжалиги маҳсулотлари – мева-сабзавот етиштиришга ихтисослашган “Бунёд-Иззат” ишлаб чиқариш кооперативи учун 111,5 млн. субсидия ажратилиб, ҳудуддаги 50 нафар фуқаронинг бандлиги таъминланди. Айни пайтда кооперативда самарали ишлар йўлга қўйилмоқда.

Кооператив аъзолари дастлаб ажратилган ерларни шудгорлаб текислашди ва зироат экиш учун тайёрлашди. Эндиликда ушбу ерларга сув келтириб, суғоришни бошлашмоқда, турли сабзавот экинлари ва кўчатларини экишга тайёрлашмоқда.  Ерлар қондириб суғорилганидан кейин бир қисмига дуккакли экинлар, бошқа қисмига полиз экинлари, қолган қисмига эса тўқсон бости экинлар экиш режалаштиришмоқда.

Шу йилнинг кузида эса ажратилган ерларнинг 1,5-2 гектар қисмига турли хилдаги мевали дархатлар кўчатлари экилиб, боғ барпо қилиш ҳам мақсад қилинмоқда.

Ишлаб чиқариш кооператив қишлоқ хўжалиги маҳсулотларини етиштириш, қайта ишлаш, сотиш билан бирга қонунчиликда тақиқланмаган бошқа фаолият турларини амалга оширади. Туманимизда ҳам ишлаб чиқариш кооперативи ташкил қилингани, ажратилган ерларга қайта ишлов берилиб, экин майдонига айлантирилгани ва эҳтиёжманд оилалар, ишсиз ёшларга тақсимлаб берилгани уларнинг даромади ошишини, бозорлар, эл дастурхони тўкинлигини таъминлайди.

Чарос Aрслонова, туман ҳокимлигининг Aхборот хизмати.