IShLAB ChIQAPISh KOOPEPATIVIGA YeP MAYDONI AJPATILDI

Qishloq xoʻjaligi – aholi uchun oziq-ovqat mahsulotlarini yetkazib beruvchi asosiy manbadir. Mamlakatimiz qishloq xoʻjaligi boʻyicha ulkan salohiyatga ega. Bozorlarimiz toʻkin, xalqimiz rizqi moʻl-koʻl boʻlishidan tortib, eksportdan qoʻshimcha daromad topishgacha boʻlgan juda koʻp masalalar shu soha bilan bogʻliq.

Keyingi yillarda qishloq xoʻjaligini isloh qilish va bozor mexanizmlarini joriy etish boʻyicha qator ishlar amalga oshirildi. Paxtachilik va gʻallachilik chinakam daromad manbaiga aylandi.

Qishloq xoʻjaligining asosiy tarmoqlaridan hisoblangan meva-sabzavot yetishtirishda ish unumdorligini yanada oshirish, mahsulot yetishtirishda ishlab chiqaruvchi korxona, tashkilotlar va ishchi-xodimlar oʻrtasida oʻzaro hamkorlikni yoʻlga qoʻyish maqsadida hududlarda ishlab chiqarish kooperativlari tashkil qilinmoqda.

Shunday ishlab chiqarish kooperativlaridan biri tumanimizda ham tashkil qilindi. Bu borada tuman hokimining joriy yil 6-may sanasida qator qonun hujjatlariga asoslangan holda qabul qilgan “Ishlab chiqarish kooperativiga yer maydonlarini ijaraga ajratib berish toʻgʻrisida”gi qarori qabul qilindi. Mazkur qarorga koʻra, Jumur ovul mahallasi hududi Zarbdor massividagi tuman hokimligi zahira yerlaridan “Bunyod-izzat” ishlab chiqarish kooperativiga qishloq xoʻjaligi mahsulotlarini yetishtirishga doimiy egalik qilish uchun yer maydonlarini ajratib berish belgilandi.

Shu oʻrinda aytish joizki, ishlab chiqarishni kooperatsiyalash — ishlab chiqarishni tashkil qilish shakli boʻlib, maʼlum bir mahsulotni hamkorlikda tayyorlash uchun korxonalar oʻrtasida maxsus ishlab chiqarish munosabatlari hisoblanadi. Ijtimoiy mehnat taqsimoti chuqurlashgan sari ishlab chiqarish rivojlanib boradi va u birinchi navbatda, korxonalarning cheklangan turdagi mahsulot, mahsulot qismlarini ishlab chiqarishga ixtisoslashuvida koʻrinadi. Bu jarayon korxonalar oʻrtasida raqobat kurashini ham oshiradi.

Tuman hokimining yuqoridagi qarori bilan “Bunyod-Izzat” ishlab chiqarish kooperativiga qishloq xoʻjaligi mahsulotlari yetishtirishni yanada takomillashtirish maqsadida Zarbdor massivida umumiy maydoni 16,9 gektar, shundan 16,2 gektar ekin yerlar, 0,7 gektar qishloq xoʻjaligida foydalanilmaydigan boshqa yer maydonlari doimiy egalik qilish uchun ajratildi.

Shuningdek, qishloq xoʻjaligi mahsulotlari – meva-sabzavot yetishtirishga ixtisoslashgan “Bunyod-Izzat” ishlab chiqarish kooperativi uchun 111,5 mln. subsidiya ajratilib, hududdagi 50 nafar fuqaroning bandligi taʼminlandi. Ayni paytda kooperativda samarali ishlar yoʻlga qoʻyilmoqda.

Kooperativ aʼzolari dastlab ajratilgan yerlarni shudgorlab tekislashdi va ziroat ekish uchun tayyorlashdi. Endilikda ushbu yerlarga suv keltirib, sugʻorishni boshlashmoqda, turli sabzavot ekinlari va koʻchatlarini ekishga tayyorlashmoqda.  Yerlar qondirib sugʻorilganidan keyin bir qismiga dukkakli ekinlar, boshqa qismiga poliz ekinlari, qolgan qismiga esa toʻqson bosti ekinlar ekish rejalashtirishmoqda.

Shu yilning kuzida esa ajratilgan yerlarning 1,5-2 gektar qismiga turli xildagi mevali darxatlar koʻchatlari ekilib, bogʻ barpo qilish ham maqsad qilinmoqda.

Ishlab chiqarish kooperativ qishloq xoʻjaligi mahsulotlarini yetishtirish, qayta ishlash, sotish bilan birga qonunchilikda taqiqlanmagan boshqa faoliyat turlarini amalga oshiradi. Tumanimizda ham ishlab chiqarish kooperativi tashkil qilingani, ajratilgan yerlarga qayta ishlov berilib, ekin maydoniga aylantirilgani va ehtiyojmand oilalar, ishsiz yoshlarga taqsimlab berilgani ularning daromadi oshishini, bozorlar, el dasturxoni toʻkinligini taʼminlaydi.

Charos Arslonova, tuman hokimligining Axborot xizmati.