Соғлом танда — сифатли тиббиёт: Амударёлик шифокорлар спорт майдонида!

Инсон саломатлиги йўлида кечаю кундуз хизмат қилаётган тиббиёт ходимларининг нафақат касбий маҳорати, балки жисмоний чидамлилиги ва спортга бўлган иштиёқи ҳам жамият учун муҳим аҳамиятга эга. Зеро, шифокорнинг ўзи соғлом бўлсагина, у ўзгаларга чин маънода намуна бўла олади ва сифатли тиббий хизмат кўрсата олади. Шу мақсадда мамлакатимизда спортни оммалаштириш, соҳа ходимлари ўртасида соғлом турмуш тарзини тарғиб қилишга қаратилган кенг кўламли ислоҳотлар изчиллик билан давом эттирилмоқда.

Ўзбекистон Республикаси Соғлиқни сақлаш вазирлиги, Ўзбекистон касаба уюшмалари Федерацияси, Спорт вазирлиги ҳамда Ёшлар ишлари агентлигининг 2026 йил 24 мартдаги қўшма қарори бу борадаги муҳим қадамлардан бири бўлди. "Беш ташаббус олимпиадаси" доирасида қабул қилинган мазкур ҳужжат тиббиёт тизимида фаолият юритаётган минглаб ходимларни ягона мақсад — соғлом танада соғлом руҳни шакллантириш ва сифатли тиббиётни таъминлаш ғояси остида бирлаштирди.

Ушбу қўшма қарор ҳамда Соғлиқни сақлаш вазирлигининг 2026 йил 30 мартдаги тегишли кўрсатма хати ижросини таъминлаш мақсадида Амударё туманида ҳам катта спорт байрами ташкил этилди. Амударё туман ихтисослаштирилган мактаби зали ҳамда 2-сонли болалар ва ўсмирлар спорт мактаби майдонлари тиббиёт ходимларининг ҳақиқий маҳорат майдонига айланди. "Соғлом танда — сифатли тиббиёт" шиори остида ўтказилган Ўзбекистон касаба уюшмалари Федерацияси кубоги спорт мусобақалари туман тиббиёт бирлашмаси ходимларининг спортга бўлган юксак қизиқишини яққол намоён этди. Бу ерда йиғилган шифокорлар, ҳамширалар ва техник ходимлар ўзларининг кундалик масъулиятли вазифаларидан бир муддат чалғиб, спортнинг турли йўналишлари бўйича куч синашдилар. Мусобақа дастуридан ўрин олган шахмат, шашка, волейбол, стол тенниси ва мини-футбол беллашувлари шиддатли ва қизиқарли воқеаларга бой бўлди.

Айниқса, ақл-идрок ва мантиқий фикрлаш талаб этиладиган шахмат ва шашка баҳсларида тиббиёт ходимлари ўзларининг нақадар кучли стратегик салоҳиятга эга эканликларини исботладилар. Стол тенниси ва волейбол майдонларидаги ҳаракатлар эса иштирокчилардан тезкорлик ва жамоавий ҳамжиҳатликни талаб қилди. Волейбол мусобақасидаги дўстона ва шу билан бирга рақобатга бой муҳит томошабинларда катта таассурот қолдирди. Энг қизғин баҳслар эса шубҳасиз мини-футбол майдонида кечди. Тиббиёт соҳаси вакилларидан ташкил топган жамоаларнинг тўп суришида профессионал спортчиларга хос бўлган иштиёқ ва ғалабага бўлган интилиш сезилиб турди.

Мазкур спорт мусобақалари нафақат жисмоний тарбияни ривожлантириш, балки жамоаларда ички муҳитни соғломлаштириш ва ходимлар ўртасидаги ўзаро ҳурмат ва дўстлик ришталарини мустаҳкамлашга хизмат қилиши билан ҳам аҳамиятлидир. Мусобақа давомида иштирокчилар ўз ҳамкасбларининг янги қирраларини кашф этдилар, бу эса келгусида иш фаолиятида ҳамжиҳатликни таъминлашда муҳим омил бўлади. Таъкидлаш жоизки, тиббиёт тизимида бу каби тадбирларнинг мунтазам ўтказилиши ходимларнинг иш самадорлигини оширишга ва руҳий чарчоқларни чиқаришга ёрдам беради.

Мусобақа якунида ғолиблик шоҳсупасига кўтарилган жамоалар ва якка тартибдаги баҳсларда фахрли ўринларни эгаллаган ходимлар муносиб тақдирландилар. Уларга туман тиббиёт бирлашмаси ва касаба уюшмалари ташкилотлари томонидан фахрий ёрлиқлар ҳамда қимматбаҳо эсталик совғалари топширилди.

"Соғлом танда — сифатли тиббиёт" тамойили асосида ташкил этилган ушбу мусобақа Амударё тумани тиббиёт ходимлари ҳаётида ёрқин саҳифа бўлиб қолди. Бу эса ўз навбатида халқимизга кўрсатилаётган тиббий хизмат сифатини янада юқори босқичга олиб чиқишга замин яратади. Зеро, спорт ва тиббиётнинг уйғунлиги – соғлом келажак гаровидир.