МАКТАБЛАPДА ЎҚУВ ЙИЛИ МАСОФАВИЙ PЕЖИМДА ЯКУНЛАНАДИ
Инсонлар жамиятда яшайди. Уларнинг табиат ҳодисалари билан курашишлари табиий ҳол, албатта. Буюк музлик давридан бугунги кунга қадар қарайдиган бўлсак, одамзод кўплаб табиий офатларни бошидан ўтказди. ОAВлардан, интернет тармоқларидан кузатиб хабардор бўламизки, ҳозиргача она сайёрамизнинг қаеридадир гоҳ сув тошқини, гоҳ ўрмонлар ёнғини, зилзилалар, вулқон отилиши каби воқеалар содир бўлишда давом этмоқда. Aммо одамзод енгилаётгани йўқ.
COVID-19 пандемияси таъсирлари ҳам доимий ҳаётимизни бутунлай ўзгартирди. Биз умуман кутилмаган жараёнларнинг гувоҳи бўлдик. Таълим даргоҳларида фаолият юритаётган педагоглар, таҳсил олаётган фарзандларимиз режадан ташқари таътилга чиқарилишини сира ўйлаганмидик...
Сўнгги икки ой давомида масофавий дарс ўрганиш, масофавий таълим бериш, мутахассислигимиз бўйича ижтимоий тармоқлардан фойдаланишни ўргандик. Бу тадбирлардан кейинги ўқув йилида самарали фойдаланишимиз мумкин. Жараёнлар давомида интернет алоқаси ҳудудларимизда яхши йўлга қўйилмаганлигини, ахборот беришда технологияларни етарлича қўллашда билимларимиз камлигини тушундик.
Бизнинг 36-сонли мактабимизда якуний чораклик учун белгиланган мавзулар онлайн, масофавий услубда яхши ташкил қилинди. Дарслар доимий равишда ўқувчиларга етказилди. Махсус тайёрланган аудио, видео машғулотлар сезиларли ижобий натижалар кўрсатди. Ўқувчиларимиз томонидан бажарилган вазифалар ҳар бир синф учун мўлжалланган телеграм каналларида баҳолаб борилди. Фаол қатнашганлар рағбатлантирилиб борилди.
Мана кун сайин май ойи ҳам охирлаб боряпти. Сўнгги қўнғироқ тадбирларига оз қолди. Лекин бу гал ўқувчиларимиз ушбу кунни масофавий режимда нишонлайдилар. Карантин сабабли вазиятга кўра битирувчи синфлар учун якуний давлат имтиҳонларини ташкил этиш бекор қилинди. Бу бўйича Ўзбекистон Pеспубликаси Халқ таълими вазири Шерзод Шерматов зарур топшириқларни берди. Умумий баҳолар ўқувчиларнинг йил давомидаги ўқишларига қараб белгиланади.
Битирувчи синфлар олий таълим даргоҳларига интернет орқали хужжат топширишади. Пандемия сабаб, ОТМларга кириш имтиҳонлари ҳам анча соддалаштирилди. Улар кутилганидек беш фан эмас, балки мутахассисликларига кўра икки фанга оид тестлар билан синовдан ўтказилади.
Ўз нутқларидан бирида Президентимиз айтганларидек, биз бу ташвишларни қудратли мамлакат, жасоратли халқ сифатида енгиб ўтамиз.
Гулистон Бектемирова,
36-сонли мактаб тарих фани ўқитувчиси.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
