ПОК ВА ХАЙРЛИ НИЯТ – ДАВЛАТМАНДЛИК БЕЛГИСИДИР

Ният – динимиздаги энг муҳим амаллардан бири бўлиб, оддий ишлар ҳам ниятни яхшилиги сабабли савобли амалларга айланади ва ниятнинг ёмонлиги туфайли гуноҳ ишлар қаторига киради. Ният – қалб амалидир. Агар қалбдан ният қилиб, уни тилда ҳам зикр этса, янада яхши. Мусулмон киши дунё ҳаётида қилаётган ҳар бир ишини ибодат даражасига кўтаришга ҳаракат қилиши керак.

Шунинг учун ҳар бир банда чинакам маърифатга эришиш учун яхши ният орқали эзгу амалларни кўпайтириши лозим. Дарҳақиқат, биз қиладиган амалларимиз учун ниятимизга кўра ажр-савобга эришамиз. Расулуллоҳ (с.а.в) шундай марҳамат қилганлар:

“Амаллар фақат ниятларга кўрадир. Албатта, ҳар бир кишига ният қилган нарсаси бўлади” (Муттафақун алайҳ).

Имом Аҳмад ибн Ҳанбал ушбу ҳадис ҳақида: “Илмнинг учдан бири – шу  ҳадисда”, – десалар, Имом Шофеъий “Илмнинг ярми – шу ҳадисда”, – деб айтганлар. Имом Абу Довуд эса “Бу ҳадис – Исломнинг мадори бўлган ҳадислардандир”, – деганлар. Мазкур зотлар айтган маълумотларнинг ўзиёқ динимизда ниятга катта аҳамият берилганини кўрсатиб турибди.

Бир киши олимларга айтди: “Менга бир йўл кўрсатингки, у орқали Аллоҳ таолога доимо мақбул амаллар қилай, бутун ҳаётим Аллоҳ учун ибодатга айлансин”. Унга айтишдики: “Яхшиликни ният қил, қўлинган келганича яхши амаллар қилавер, агар ундан толиқсанг ёки амалга ошира олмай қолсанг ҳам уни давом эттиришда ҳиммат кўрсатавер. Албатта, яхши амал қилишга ҳимматли бўлиш – уни бажариш билан баробардир”.

Азизлар,  Рамазон ойида ниятимизни тўғри қилиб, тутган рўзамиз учун ҳам катта ажр, савоблар борлиги, аксинча ниятимизнинг тўғри бўлмаганлиги сабаб тутган рўзамиздан манфаат йўқлиги ҳақида ҳам ҳадиси шарифларда айтилган:

Абу Ҳурайрадан (р.а.) ривоят қилинади: «Расулуллоҳ (с.а.в.): «Ким ишониб ва мукофотини Аллоҳдан умид қилиб, Рамазон рўзасини тутса, ўтмиш гуноҳлари кечирилади», деганлар» (Имом Бухорий ва Муслим ривояти).

Абу Ҳурайрадан (р.а.) ривоят қилинади: «Расулуллоҳ (с.а.в): «Ким ёлғон сўзлашни тарк этмаса ва Аллоҳ қайтарган нарсалардан қайтмаса, рўза тутиб, емай-ичмай қўйгани билан рўзаси қабул бўлмайди, Аллоҳ унга раҳмат назарини ташламайди», деганлар» (Имом Бухорий, Абу Довуд, Термизий ва Насоийлар ривояти).

Демак, дилимизда пок имон ва эътиқод ила, чин кўнгилдан Рамазон рўзасини тутсак, имкони борича атрофимиздагиларга яхши амалларимиз орқали хушнудлик бағишласак, бунинг ажр ва савобларига етишда Аллоҳ бизни қўллагувчидир. Пок ва хайрли ният мўмин мусулмонлар учун чин маънодаги давлатмандликдир.

Р.ҲАБИБУЛЛАЕВ, «Ҳожи эшон бобо» жомъе масжиди имом-хатиби.