POK VA XAYRLI NIYaT – DAVLATMANDLIK BELGISIDIR

Niyat – dinimizdagi eng muhim amallardan biri boʻlib, oddiy ishlar ham niyatni yaxshiligi sababli savobli amallarga aylanadi va niyatning yomonligi tufayli gunoh ishlar qatoriga kiradi. Niyat – qalb amalidir. Agar qalbdan niyat qilib, uni tilda ham zikr etsa, yanada yaxshi. Musulmon kishi dunyo hayotida qilayotgan har bir ishini ibodat darajasiga koʻtarishga harakat qilishi kerak.

Shuning uchun har bir banda chinakam maʼrifatga erishish uchun yaxshi niyat orqali ezgu amallarni koʻpaytirishi lozim. Darhaqiqat, biz qiladigan amallarimiz uchun niyatimizga koʻra ajr-savobga erishamiz. Rasululloh (s.a.v) shunday marhamat qilganlar:

“Amallar faqat niyatlarga koʻradir. Albatta, har bir kishiga niyat qilgan narsasi boʻladi” (Muttafaqun alayh).

Imom Ahmad ibn Hanbal ushbu hadis haqida: “Ilmning uchdan biri – shu  hadisda”, – desalar, Imom Shofeʼiy “Ilmning yarmi – shu hadisda”, – deb aytganlar. Imom Abu Dovud esa “Bu hadis – Islomning madori boʻlgan hadislardandir”, – deganlar. Mazkur zotlar aytgan maʼlumotlarning oʻziyoq dinimizda niyatga katta ahamiyat berilganini koʻrsatib turibdi.

Bir kishi olimlarga aytdi: “Menga bir yoʻl koʻrsatingki, u orqali Alloh taologa doimo maqbul amallar qilay, butun hayotim Alloh uchun ibodatga aylansin”. Unga aytishdiki: “Yaxshilikni niyat qil, qoʻlingan kelganicha yaxshi amallar qilaver, agar undan toliqsang yoki amalga oshira olmay qolsang ham uni davom ettirishda himmat koʻrsataver. Albatta, yaxshi amal qilishga himmatli boʻlish – uni bajarish bilan barobardir”.

Azizlar,  Ramazon oyida niyatimizni toʻgʻri qilib, tutgan roʻzamiz uchun ham katta ajr, savoblar borligi, aksincha niyatimizning toʻgʻri boʻlmaganligi sabab tutgan roʻzamizdan manfaat yoʻqligi haqida ham hadisi shariflarda aytilgan:

Abu Hurayradan (r.a.) rivoyat qilinadi: «Rasululloh (s.a.v.): «Kim ishonib va mukofotini Allohdan umid qilib, Ramazon roʻzasini tutsa, oʻtmish gunohlari kechiriladi», deganlar» (Imom Buxoriy va Muslim rivoyati).

Abu Hurayradan (r.a.) rivoyat qilinadi: «Rasululloh (s.a.v): «Kim yolgʻon soʻzlashni tark etmasa va Alloh qaytargan narsalardan qaytmasa, roʻza tutib, yemay-ichmay qoʻygani bilan roʻzasi qabul boʻlmaydi, Alloh unga rahmat nazarini tashlamaydi», deganlar» (Imom Buxoriy, Abu Dovud, Termiziy va Nasoiylar rivoyati).

Demak, dilimizda pok imon va eʼtiqod ila, chin koʻngildan Ramazon roʻzasini tutsak, imkoni boricha atrofimizdagilarga yaxshi amallarimiz orqali xushnudlik bagʻishlasak, buning ajr va savoblariga yetishda Alloh bizni qoʻllaguvchidir. Pok va xayrli niyat moʻmin musulmonlar uchun chin maʼnodagi davlatmandlikdir.

R.HABIBULLAYeV, «Hoji eshon bobo» jomʼe masjidi imom-xatibi.