СИНОВЛИ КУНЛАРДА ХАЛҚ ҚАЛБИДА ЖЎШ УРГАН ҚАДРИЯТ
Президентимиз жорий йилнинг 20 апрель санасида саноат, қурилиш ва инфратузилма тармоқлари корхоналарининг тўлиқ ишлашини таъминлаш масалаларига бағишланган видеоселектор йиғилишини ўтказди. Давлатимиз раҳбари йиғилишда аҳолининг ижтимоий ҳимояга муҳтож қатламини ҳимоя қилиш масаласига алоҳида тўхталди. Вақтинча ишламаётган, ёрдамга муҳтож оилаларни аниқлаб, уларни манзилли қўллаб-қувватлаш зарурлигини таъкидлади. Шунингдек, Президентимиз Ўзбекистон халқининг тарихий-маънавий қадриятларини, меҳр-оқибат, саховат ва ҳиммат каби юксак инсоний фазилатларини инобатга олган ҳолда мамлакатимизда “Саховат ва кўмак” умумхалқ ҳаракатини йўлга қўйиш ташаббусини илгари сурдилар.
“AMUDARYOTEX” хорижий корхонаси раҳбарияти ҳам “Саховат ва кўмак” умумхалқ ҳаракатига ўз ҳиссасини қўшишга қарор қилди. Айтиш ўринлики, “Саховат ва кўмак” умумхалқ ҳаракати доирасида ҳеч ким меҳр ва эътибордан четда қолмаслиги учун ҳар бир тадбиркор фаоллик кўрсатмоқда. Бу жараёнда вақтинча ишламаётган ва кунлик даромад асосида яшаб келган фуқароларга биринчи навбатда ёрдам кўрсатилмоқда.
Маълумки, мамлакатимизда карантин туфайли чекловлар жорий этилганидан сўнг аҳолига 27 турдаги озиқ-овқат маҳсулотлари арзон нархларда етказиб берила бошланди. Оқ олтин овули аҳолисига ҳам “Қадамбой Амирхон” масъулияти чекланган жамияти томонидан 3 тонна ун маҳсулотлари арзон нархда етказиб берилди. Бу жараён Ўзбекистон Республикаси Бош Прокуратураси ҳузуридаги Иқтисодий жиноятларга қарши курашиш Департаментининг туман бўлими томонидан алоҳида назоратга олинди. Шунингдек, шу куни Бобур номли овул аҳолиси учун ҳам арзон нархларда 3 тонна ун маҳсулоти тарқатилди.
Президентимизнинг “Саховат ва кўмак” умумхалқ ҳаракати ташаббусини қўллаб-қувватлаган Қиличбой овули ҳудудидаги “Амирхон” фермер хўжалиги раиси Отахон Қурбониёзов эса қутлуғ Рамазон ойи арафасида овулдаги 20 та кам таъминланган оиланинг ҳар бирига 50 килограмдан жам 1 тонна буғдой, кундалик эҳтиёжлари учун ёғ, совун, шунингдек тиббий ниқоблар эҳсон қилди. Ушбу маҳсулотларга эҳтиёж сезаётган оилалар уларни етказиб берган фермерга ўз миннатдорчилигини билдирди.
“Саховат ва кўмак” умумхалқ ҳаракати ташаббусини қўллаб-қувватлашни ўз инсонийлик бурчи деб билган халқ депутатлари туман Кенгаши депутати Ҳамро Хўжаев Ўрта қалъа овулидаги 12 та кам таъминланган оилаларнинг ҳар бирига 190 минг, жами 2 млн. 280 минг сўмлик кундалик озиқ-овқат маҳсулотларини ҳомийлик ёрдами сифатида тарқатди. Шунингдек, овулдаги кам таъминланган хонадонларга Ҳомийлик хайрияларини мувофиқлаштириш маркази томонидан ҳар бирига 90 минг сўмлик кундалик озиқ-овқат маҳсулотлари етказиб берилди. Бундан ташқари, депутат Ҳамро Хўжаев раҳбарлик қилаётган “Сув қурилиш бошқармаси” ҳамда “Амударё Манғит юксалиш” масъулияти чекланган жамиятлари
Ўрта қалъа овули ҳудудида ўз фаолиятларини олиб борувчи “Хўжакўл” фермер хўжалиги ҳам ушбу хайрли ташаббусга ҳисса қўшиб, вақтинча ишламаётган ва кунлик даромад асосида яшаб келган фуқароларга 3 ой давомида кундалик истеъмол моллари ҳамда озиқ-овқат маҳсулотларини етказиб беришга бел боғлашган.
Саховатпеша тадбиркорлар орасида “Саховат ва кўмак” умумхалқ ҳаракати ташаббусини қўллаб-қувватлаётганлар талайгина. Хусусан, тадбиркор Дилбар Янгибоева томонидан бешта, “Рам Хайтимбат” фермер хўжалиги томонидан тўртта, “Ергулобод” фермер хўжалиги томонидан учта оиланинг ҳар бирига 60 минг сўмлик озиқ-овқат маҳсулотлари хайрия қилинган бўлса, “Нур” савдо дўкони томонидан овулдаги Олимбой Жуманиёзовнинг 500 минг сўмлик коммунал тўловлари тўлаб берилди. “Юсуфхўжа” фермер хўжалиги томонидан иккита оиланинг ҳар бирига 250 минг сўмлик кундалик озиқ-овқат маҳсулотлари хайр-эҳсон тариқасида етказилди.
Президентимиз томонидан илгари сурилган “Саховат ва кўмак” умумхалқ ҳаракати туманимиз бўйлаб кенг қулоч ёймоқда. Рамазон ойи кириб келган қутлуғ кунларда бошланаётган бу ташаббус синовли кунларда ҳар бир юртдошимиз қалбида янада жўшқинлик касб этмоқда.
Робия ЙЎЛДОШЕВА.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
