“ИСТЕЪДОД ШОУ” ТЕЛЕТАНЛОВИНИНГ ҲУДУДИЙ БОСҚИЧИ ҒОЛИБЛАРИ АНИҚЛАНДИ

Истеъдодли ёшлар кўп. Лекин уларнинг ўз қобилиятларини амалда намоён этишлари учун етарли шароит яратиб берилмаса, бу истеъдод ғунчалари авайлаб-асралиб, рағбат кўрсатилмаса, худди қуёш нурини ҳис этмаган навниҳол каби униб-ўсмайди, балки сўлиб қолади. Президентимиз томонидан илгари сурилган 5 та муҳим ташаббуснинг бутун мазмун-моҳияти ёш истеъдод эгаларини ҳар томонлама қўллаб-қувватлаш, истеъдодларини камол топтиришга қаратилгани билан ёшлар ҳаётида муҳим аҳамият касб этмоқда.

Бутун мамлакатимизда, шу жумладан туманимизда ҳам 5 та муҳим ташаббус доирасида олиб борилаётган амалий чора-тадбирлар ёш истеъдод эгаларини кашф этиш имконини бермоқда. Шу билан бирга уларнинг  бўш вақтларини мазмунли ўтказишларида алоҳида ўрин тутмоқда.

Туман Маданият бўлими, туман Халқ таълими бўлими, Ёшлар иттифоқи туман Кенгаши ҳамда Амударё телевидениеси томонидан ҳамкорликда ташкил этилган “Истеъдод шоу” телетанлови ҳам нафақат ёшларнинг бўш вақтларини мазмунли ўтказиш, балки уларни санъат масканларига жалб этиш орқали ўз қобилиятларини омма олдида намойиш этиш имконини бермоқда. Мазкур телетанловни ўтказишдан кўзланган мақсад ҳам ёш истеъдод ғунчаларини авайлаб-асраш, уларга зарур шарт-шароитлар яратиш, юксак ватанпарварлик, халқпарварлик туйғуларини мадҳ этувчи куй ва қўшиқлари, рақслари орқали халқимизга танилиши, ўз ижроларини катта саҳналарда намойиш этишлари учун кўмаклашишдан иборат.

Телетанловни ўтказиш бўйича ташкилотчилар томонидан чора-тадбирлар режаси ишлаб чиқилиб, Низом тасдиқланди. Унга кўра, бешта муҳим ташаббуснинг асосий йўналишларидан бири – ёшларни санъат масканларига кенг жалб қилган ҳолда уларнинг ўзлари қизиққан йўналишлар бўйича эгаллаган кўникма ва маҳоратларини омма олдида намоён этишлари ҳамда ушбу жараёнда алоҳида иқтидор эгаларини танлаб олиб, рағбатлантиришга, Амударё телевидениеси орқали чиқишларини намойиш этишга эътибор қаратилди.

Жорий йилнинг 10 март санасида Чойкўл Маданият маркази биносида “Истеъдод шоу” телетанловнинг ҳудудий босқичи бўлиб ўтди. Унда 7-, 22-, 26-, 28-, 32-, 33-, 42-, 59-сонли умумтаълим мактабларининг ёш истеъдод эгалари иштирок этдилар. Туман Маданият бўлимининг ташаббуси билан санъат соҳасининг турли йўналишлари бўйича ҳудудлардаги маданият марказлари тўгаракларида шуғулланаётган туманимиздаги барча умумтаълим мактабларининг 7 ёшдан 18 ёшгача бўлган ёш иқтидор эгалари жалб этилиб, телетанловнинг туман босқичига энг иқтидорли ёшлар танлаб олинди. Телетанлов Низомига мувофиқ ёшларнинг чиқишлари, ижро маҳоратлари туман Маданият маркази бадиий раҳбари М.Ибрагимов, Маданият маркази тўгарак раҳбари З.Файзуллаев ва марказ мутахассиси М.Ибрагимовлар томонидан шаффофлик асосида баҳолаб борилди. Унга кўра, созандалик йўналишида 42-сонли мактаб ўқувчиси Беҳруз Шукуруллаев, сухандонлик йўналишида яна шу мактаб ўқувчиси Қундузой Қодирова, рақс йўналишида 28-сонли мактабнинг рақс жамоаси, актёрлик йўналишида 26-сонли мактаб ўқувчиси Раҳматжон Исмоилов, 33-сонли мактаб ўқувчиси Хосиятхон Сафарбоевалар “Истеъдод шоу” телетанловининг ҳудудий босқичи ғолиблари бўлишди ва телетанловнинг туман босқичига йўлланма  олдилар.

Шунингдек, 20 март санасида “Истеъдод шоу” телетанловининг Қипчоқ ҳудудий босқичи ҳам ўтказилди. Қипчоқ шаҳарчаси, Қангли овули ҳамда Уйшин маҳалла фуқаролар йиғинлари ҳудудидаги 11-, 18-, 24-, 29-, 39-, 47-, 65-, 67-, 69-, 75-сонли умумтаълим мактабларининг ёш истеъдод эгалари иштирок этган  телетанловда Қипчоқ ҳудудидаги энг иқтидорли ёшлар танлов ғолиблари бўлишди. Танловда шаффофлик ва адолат тамойилларига амал қилинишида Анвар Худойберганов, Мурод Ибрагимов ва Қундузой Эшчановалардан иборат ҳакамлар ҳайъати аъзоларининг ҳиссаси катта бўлди. Ҳакамлар ҳайъати хулосасига кўра, созандалик йўналишида Жамшид Оллаёров ва Диёра Жўллибоева, эстрада қўшиқчилиги йўналишида Отабек Ҳасанов, сухандонлик йўналишида Лобар Норбоева, рақс йўналишида 47-сонли мактабнинг “Барчинойлар” рақс жамоаси ва шу мактабнинг 10-синф ўқувчилари рақс дастаси ҳамда цирк санъати йўналишида Фозилбек Қўшмоновлар ғолиб деб топилдилар ҳамда “Истеъдод шоу” телетанловининг туман босқичига йўлланма олдилар.

Ўсиб келаётган ёш авлоднинг иқтидорларини намоён этишларига кўмаклашиш Ватанга муҳаббат, маънавий-маърифий қадриятларимизга ҳурмат-эҳтиром руҳида тарбиялашга қаратилган “Истеъдод шоу” телетанлови Низомига  мувофиқ танловнинг ҳудудий босқичлари мамлакатимиздаги коронавирус эпидемияси билан боғлиқ вазият барқарорлашгач, яна давом эттирилади ва албатта, танловнинг туман босқичи санитария-осойишталик, соғлом ҳаёт тарзи билан шод-у хуррамликда ўтказилади.

Робия ЙЎЛДОШЕВА.