“ISTEʼDOD ShOU” TELETANLOVINING HUDUDIY BOSQIChI GʻOLIBLARI ANIQLANDI

Isteʼdodli yoshlar koʻp. Lekin ularning oʻz qobiliyatlarini amalda namoyon etishlari uchun yetarli sharoit yaratib berilmasa, bu isteʼdod gʻunchalari avaylab-asralib, ragʻbat koʻrsatilmasa, xuddi quyosh nurini his etmagan navnihol kabi unib-oʻsmaydi, balki soʻlib qoladi. Prezidentimiz tomonidan ilgari surilgan 5 ta muhim tashabbusning butun mazmun-mohiyati yosh isteʼdod egalarini har tomonlama qoʻllab-quvvatlash, isteʼdodlarini kamol toptirishga qaratilgani bilan yoshlar hayotida muhim ahamiyat kasb etmoqda.

Butun mamlakatimizda, shu jumladan tumanimizda ham 5 ta muhim tashabbus doirasida olib borilayotgan amaliy chora-tadbirlar yosh isteʼdod egalarini kashf etish imkonini bermoqda. Shu bilan birga ularning  boʻsh vaqtlarini mazmunli oʻtkazishlarida alohida oʻrin tutmoqda.

Tuman Madaniyat boʻlimi, tuman Xalq taʼlimi boʻlimi, Yoshlar ittifoqi tuman Kengashi hamda Amudaryo televideniyesi tomonidan hamkorlikda tashkil etilgan “Isteʼdod shou” teletanlovi ham nafaqat yoshlarning boʻsh vaqtlarini mazmunli oʻtkazish, balki ularni sanʼat maskanlariga jalb etish orqali oʻz qobiliyatlarini omma oldida namoyish etish imkonini bermoqda. Mazkur teletanlovni oʻtkazishdan koʻzlangan maqsad ham yosh isteʼdod gʻunchalarini avaylab-asrash, ularga zarur shart-sharoitlar yaratish, yuksak vatanparvarlik, xalqparvarlik tuygʻularini madh etuvchi kuy va qoʻshiqlari, raqslari orqali xalqimizga tanilishi, oʻz ijrolarini katta sahnalarda namoyish etishlari uchun koʻmaklashishdan iborat.

Teletanlovni oʻtkazish boʻyicha tashkilotchilar tomonidan chora-tadbirlar rejasi ishlab chiqilib, Nizom tasdiqlandi. Unga koʻra, beshta muhim tashabbusning asosiy yoʻnalishlaridan biri – yoshlarni sanʼat maskanlariga keng jalb qilgan holda ularning oʻzlari qiziqqan yoʻnalishlar boʻyicha egallagan koʻnikma va mahoratlarini omma oldida namoyon etishlari hamda ushbu jarayonda alohida iqtidor egalarini tanlab olib, ragʻbatlantirishga, Amudaryo televideniyesi orqali chiqishlarini namoyish etishga eʼtibor qaratildi.

Joriy yilning 10-mart sanasida Choykoʻl Madaniyat markazi binosida “Isteʼdod shou” teletanlovning hududiy bosqichi boʻlib oʻtdi. Unda 7-, 22-, 26-, 28-, 32-, 33-, 42-, 59-sonli umumtaʼlim maktablarining yosh isteʼdod egalari ishtirok etdilar. Tuman Madaniyat boʻlimining tashabbusi bilan sanʼat sohasining turli yoʻnalishlari boʻyicha hududlardagi madaniyat markazlari toʻgaraklarida shugʻullanayotgan tumanimizdagi barcha umumtaʼlim maktablarining 7 yoshdan 18 yoshgacha boʻlgan yosh iqtidor egalari jalb etilib, teletanlovning tuman bosqichiga eng iqtidorli yoshlar tanlab olindi. Teletanlov Nizomiga muvofiq yoshlarning chiqishlari, ijro mahoratlari tuman Madaniyat markazi badiiy rahbari M.Ibragimov, Madaniyat markazi toʻgarak rahbari Z.Fayzullayev va markaz mutaxassisi M.Ibragimovlar tomonidan shaffoflik asosida baholab borildi. Unga koʻra, sozandalik yoʻnalishida 42-sonli maktab oʻquvchisi Behruz Shukurullayev, suxandonlik yoʻnalishida yana shu maktab oʻquvchisi Qunduzoy Qodirova, raqs yoʻnalishida 28-sonli maktabning raqs jamoasi, aktyorlik yoʻnalishida 26-sonli maktab oʻquvchisi Rahmatjon Ismoilov, 33-sonli maktab oʻquvchisi Xosiyatxon Safarboyevalar “Isteʼdod shou” teletanlovining hududiy bosqichi gʻoliblari boʻlishdi va teletanlovning tuman bosqichiga yoʻllanma  oldilar.

Shuningdek, 20-mart sanasida “Isteʼdod shou” teletanlovining Qipchoq hududiy bosqichi ham oʻtkazildi. Qipchoq shaharchasi, Qangli ovuli hamda Uyshin mahalla fuqarolar yigʻinlari hududidagi 11-, 18-, 24-, 29-, 39-, 47-, 65-, 67-, 69-, 75-sonli umumtaʼlim maktablarining yosh isteʼdod egalari ishtirok etgan  teletanlovda Qipchoq hududidagi eng iqtidorli yoshlar tanlov gʻoliblari boʻlishdi. Tanlovda shaffoflik va adolat tamoyillariga amal qilinishida Anvar Xudoyberganov, Murod Ibragimov va Qunduzoy Eshchanovalardan iborat hakamlar hayʼati aʼzolarining hissasi katta boʻldi. Hakamlar hayʼati xulosasiga koʻra, sozandalik yoʻnalishida Jamshid Ollayorov va Diyora Joʻlliboyeva, estrada qoʻshiqchiligi yoʻnalishida Otabek Hasanov, suxandonlik yoʻnalishida Lobar Norboyeva, raqs yoʻnalishida 47-sonli maktabning “Barchinoylar” raqs jamoasi va shu maktabning 10-sinf oʻquvchilari raqs dastasi hamda tsirk sanʼati yoʻnalishida Fozilbek Qoʻshmonovlar gʻolib deb topildilar hamda “Isteʼdod shou” teletanlovining tuman bosqichiga yoʻllanma oldilar.

Oʻsib kelayotgan yosh avlodning iqtidorlarini namoyon etishlariga koʻmaklashish Vatanga muhabbat, maʼnaviy-maʼrifiy qadriyatlarimizga hurmat-ehtirom ruhida tarbiyalashga qaratilgan “Isteʼdod shou” teletanlovi Nizomiga  muvofiq tanlovning hududiy bosqichlari mamlakatimizdagi koronavirus epidemiyasi bilan bogʻliq vaziyat barqarorlashgach, yana davom ettiriladi va albatta, tanlovning tuman bosqichi sanitariya-osoyishtalik, sogʻlom hayot tarzi bilan shod-u xurramlikda oʻtkaziladi.

Robiya YOʻLDOShEVA.