ЎзХДПнинг “Ёшларга – кўмак” лойиҳаси доирасида учрашув ўтказилди

Ўзбекистон Халқ Демократик партияси туман Кенгаши томонидан “Ёшларга – кўмак” лойиҳаси доирасида ёшлар ўртасида ҳуқуқбузарлик ва жиноятчилик содир этилишининг олдини олиш масалаларига бағишланган учрашув ташкил этилди.

14 март куни Амударё қишлоқ хўжалик касб-ҳунар коллежида бўлиб ўтган учрашувда Дўстлик, Янгиобод маҳалла фуқаролар йиғини мсаъуллари ва фаоллари, коллеж ёшлари, ЎзХДПдан сайланган депутатлар ҳамда тегишли давлат органлари, идора-ташкилотлар масъуллари қатнашдилар.

Учрашувда ЎзХДП туман Кенгаши раиси Мақсуд Саъдуллаев, “Оила” илмий-амалий тадқиқот маркази раҳбари, депутат Гулшод Юсупова ҳамда Бекман Аллабергановлар ёшлар ўртасида ҳуқуқбузарлик ва жиноятчилик содир этилишининг олдини олишга доир масалалар юзасидан маъруза қилдилар.

Халқ депутатлари туман Кенгаши ЎзХДП партия гуруҳи раҳбари Мақсуд Саъдуллаев сўзга чиқиб, мамлакатимизда жиноятчилик ва уни келтириб чиқарувчи шарт-шароитларни бартараф этишга қаратилган комплекс чора-тадбирлар амалга ошириб келинаётганлиги, бу йўналишда ёшларнинг ҳуқуқбузарлик йўлига ўтишларининг олдини олишга катта эътибор қаратилаётгани ҳақида гапирди.

Хусусан, ўтган давр мобайнида ёшлар ўртасида ҳуқуқбузарликлар содир қилинишининг олдини олиш бўйича ташкилий ва ҳуқуқий чоралар белгилаш ва ҳал этишда бир қатор муаммолар мавжудлиги аниқланганини айтиб ўтди. Ота-оналар томонидан фарзандларининг олий таълим муассасаларида таълим олишини педагогик назорат қилиш даражаси жуда сустлиги, қишлоқ жойларда таълим муассасаларининг етарли эмаслиги, ёшлар билан шуғулланувчи давлат ва нодавлат ташкилотларининг масъуллик даражасини белгиловчи ва уларга мажбурият юкловчи қонун нормаларининг ягона тизими мавжуд эмаслигини ҳам таъкидлади.

Ҳақиқатан ҳам жамиятдаги барча ножўя ҳолатлар, жумладан, оиладаги нотинчлик, таълим муассасалари ишидаги ва бошқа соҳалардаги камчиликлар ёшларнинг нормал ривожланишига салбий таъсир кўрсатади. Ҳуқуқбузарлик содир этган ёшларнинг 62,2 фоизи бўш вақтларини кўчада ўтказиши маълумотларда кўрсатиб ўтилган.

“Оила” илмий-амалий тадқиқот маркази раҳбари, депутат Гулшод Юсупова бундай салбий ҳолатларнинг олдини олиш учун, авваламбор, ахборот-таҳлил ишларини йўлга қўйиш лозимлигини ўз фикрида баён этди. Шунингдек, бу орқали ёшлар томонидан содир этилаётган ҳуқуқбузарликларнинг умумий ҳолати, миқёси, таркиби, табиати ва динамикаси тўғрисида маълумотга эга бўлиш мумкинлигини ҳам айтиб ўтди.

Ёшлар ўртасида ҳуқуқбузарликлар содир қилинишини баҳолашда уларнинг юзага келишига таъсир этувчи омилларни инобатга олиш, у ёки бу ҳудудда маълум бир турдаги, айниқса, оғир оқибатларни келтириб чиқарувчи жиноятларнинг сабабларини таҳлил этиш муҳим аҳамиятга эга. Бу борадаги муҳим муаммолардан бири шундан иборатки, улар ҳуқуқни муҳофаза қилувчи органлар ва жамоат ташкилотларининг профилактик таъсири доирасига асосан ҳуқуқбузарлик содир этганидан кейин тушадилар. Ёшларнинг ғайриижтимоий мойиллигини дастлабки босқичда профилактика қилишга нисбатан юзаки ёндашиш ҳоллари ҳам учраб туради. Ўзига хос профилактика чораларидан бири бу – ҳуқуқбузарлик содир этаётган ёшларнинг ота-оналарини, ҳомий ёки васийларини ғайриқонуний хатти-ҳаракатлар содир этилишига йўл қўймаслик юзасидан расман огоҳлантиришдир.

Мазкур учрашувда иштирок этган Бекман Аллаберганов ҳам ўз маърузасида бу борадаги масалаларга эътибор қаратиб, ёшлар ўртасида профилактик чораларни амалга оширишда шахснинг ёши ва бошқа хусусиятлари инобатга олиниши муҳим аҳамият касб этишини таъкидлади. Ундан ташқари, жиноятларнинг сабабларини аниқлаш нафақат жамоатчилик, балки зарур ҳолларда турли соҳаларнинг тажрибали мутахассислари ёрдамига таянишни ҳам тақозо этишини ўз мулоҳазаларида келтириб ўтди.

Бўлиб ўтган учрашувда Дўстлик ва Янгиобод маҳаллалари фаоллари, ёшлар ҳамда коллеж ўқувчилари жиноятчиликнинг олдини олишда ўзаро ҳамжиҳатлик асосида иш юритиш муҳим аҳамият касб этишини айтиб, бу борада фикрларини билдирдилар.

Р. Йўлдошева.