OʻzXDPning “Yoshlarga – koʻmak” loyihasi doirasida uchrashuv oʻtkazildi

Oʻzbekiston Xalq Demokratik partiyasi tuman Kengashi tomonidan “Yoshlarga – koʻmak” loyihasi doirasida yoshlar oʻrtasida huquqbuzarlik va jinoyatchilik sodir etilishining oldini olish masalalariga bagʻishlangan uchrashuv tashkil etildi.

14-mart kuni Amudaryo qishloq xoʻjalik kasb-hunar kollejida boʻlib oʻtgan uchrashuvda Doʻstlik, Yangiobod mahalla fuqarolar yigʻini msaʼullari va faollari, kollej yoshlari, OʻzXDPdan saylangan deputatlar hamda tegishli davlat organlari, idora-tashkilotlar masʼullari qatnashdilar.

Uchrashuvda OʻzXDP tuman Kengashi raisi Maqsud Saʼdullayev, “Oila” ilmiy-amaliy tadqiqot markazi rahbari, deputat Gulshod Yusupova hamda Bekman Allaberganovlar yoshlar oʻrtasida huquqbuzarlik va jinoyatchilik sodir etilishining oldini olishga doir masalalar yuzasidan maʼruza qildilar.

Xalq deputatlari tuman Kengashi OʻzXDP partiya guruhi rahbari Maqsud Saʼdullayev soʻzga chiqib, mamlakatimizda jinoyatchilik va uni keltirib chiqaruvchi shart-sharoitlarni bartaraf etishga qaratilgan kompleks chora-tadbirlar amalga oshirib kelinayotganligi, bu yoʻnalishda yoshlarning huquqbuzarlik yoʻliga oʻtishlarining oldini olishga katta eʼtibor qaratilayotgani haqida gapirdi.

Xususan, oʻtgan davr mobaynida yoshlar oʻrtasida huquqbuzarliklar sodir qilinishining oldini olish boʻyicha tashkiliy va huquqiy choralar belgilash va hal etishda bir qator muammolar mavjudligi aniqlanganini aytib oʻtdi. Ota-onalar tomonidan farzandlarining oliy taʼlim muassasalarida taʼlim olishini pedagogik nazorat qilish darajasi juda sustligi, qishloq joylarda taʼlim muassasalarining yetarli emasligi, yoshlar bilan shugʻullanuvchi davlat va nodavlat tashkilotlarining masʼullik darajasini belgilovchi va ularga majburiyat yuklovchi qonun normalarining yagona tizimi mavjud emasligini ham taʼkidladi.

Haqiqatan ham jamiyatdagi barcha nojoʻya holatlar, jumladan, oiladagi notinchlik, taʼlim muassasalari ishidagi va boshqa sohalardagi kamchiliklar yoshlarning normal rivojlanishiga salbiy taʼsir koʻrsatadi. Huquqbuzarlik sodir etgan yoshlarning 62,2 foizi boʻsh vaqtlarini koʻchada oʻtkazishi maʼlumotlarda koʻrsatib oʻtilgan.

“Oila” ilmiy-amaliy tadqiqot markazi rahbari, deputat Gulshod Yusupova bunday salbiy holatlarning oldini olish uchun, avvalambor, axborot-tahlil ishlarini yoʻlga qoʻyish lozimligini oʻz fikrida bayon etdi. Shuningdek, bu orqali yoshlar tomonidan sodir etilayotgan huquqbuzarliklarning umumiy holati, miqyosi, tarkibi, tabiati va dinamikasi toʻgʻrisida maʼlumotga ega boʻlish mumkinligini ham aytib oʻtdi.

Yoshlar oʻrtasida huquqbuzarliklar sodir qilinishini baholashda ularning yuzaga kelishiga taʼsir etuvchi omillarni inobatga olish, u yoki bu hududda maʼlum bir turdagi, ayniqsa, ogʻir oqibatlarni keltirib chiqaruvchi jinoyatlarning sabablarini tahlil etish muhim ahamiyatga ega. Bu boradagi muhim muammolardan biri shundan iboratki, ular huquqni muhofaza qiluvchi organlar va jamoat tashkilotlarining profilaktik taʼsiri doirasiga asosan huquqbuzarlik sodir etganidan keyin tushadilar. Yoshlarning gʻayriijtimoiy moyilligini dastlabki bosqichda profilaktika qilishga nisbatan yuzaki yondashish hollari ham uchrab turadi. Oʻziga xos profilaktika choralaridan biri bu – huquqbuzarlik sodir etayotgan yoshlarning ota-onalarini, homiy yoki vasiylarini gʻayriqonuniy xatti-harakatlar sodir etilishiga yoʻl qoʻymaslik yuzasidan rasman ogohlantirishdir.

Mazkur uchrashuvda ishtirok etgan Bekman Allaberganov ham oʻz maʼruzasida bu boradagi masalalarga eʼtibor qaratib, yoshlar oʻrtasida profilaktik choralarni amalga oshirishda shaxsning yoshi va boshqa xususiyatlari inobatga olinishi muhim ahamiyat kasb etishini taʼkidladi. Undan tashqari, jinoyatlarning sabablarini aniqlash nafaqat jamoatchilik, balki zarur hollarda turli sohalarning tajribali mutaxassislari yordamiga tayanishni ham taqozo etishini oʻz mulohazalarida keltirib oʻtdi.

Boʻlib oʻtgan uchrashuvda Doʻstlik va Yangiobod mahallalari faollari, yoshlar hamda kollej oʻquvchilari jinoyatchilikning oldini olishda oʻzaro hamjihatlik asosida ish yuritish muhim ahamiyat kasb etishini aytib, bu borada fikrlarini bildirdilar.

R. Yoʻldosheva.