РАНГЛАРДА ЖИЛОЛАНГАН ОНА ЮРТ БАҲОРИ

Президентимизнинг ёшлар келажагини кўзлаб, илгари сурган 5 та ташаббусида белгиланган йўналишлардан бири ўсиб келаётган ёш авлодни санъат ва маданият масканларига жалб этиш, уларнинг ўз иқтидорларини амалда намоён этишлари учун зарур шарт-шароитлар яратишга қаратилганлиги билан муҳим аҳамиятга эгадир. Чунки санъатга, маданиятга ошно кўнгилларда ҳамиша эзгу ишларга рағбат уйғонади, қалбларида маънавий етук тафаккур туйғулари шаклланиб, ватанпарварлик ҳамда халқпарварлик ҳисси билан яшашга одатланади.

Бу борада болалар мусиқа ва санъат мактабларининг ўрни катта аҳамиятга эга. Чунки бу мактаблардаги иқтидорли болалар билан алоҳида машғулотлар ўтказишга мўлжалланган тўгараклар, уларда асосий дарслардан ташқари олиб бориладиган машғулотлар ўқувчилар учун нафақат қизиқарли, балки ўзлари танлаган йўналишлар бўйича мустақил шуғулланишлари, олган назарий билимларини амалда мустаҳкамлашлари учун имконият яратади.

Қипчоқ шаҳарчасидаги 21-сонли Болалар мусиқа ва санъат мактабида тасвирий санъат йўналиши бўйича таҳсил олаётган ўқувчи-ёшлар ҳам ўз устозлари раҳбарлигида нафақат дарс-режалари, балки тўгарак учун белгиланган машғулотларни ҳам пухта ўзлаштиришиб, ўзлари танлаган йўналишлар бўйича туман ва республика миқёсидаги турли кўрик-танловларда муваффақиятли иштирок этишмоқда.

Шуни алоҳида қайд этиш керакки, эришилаётган барча ютуқларнинг асосий замини, аввало, мактабда бўлиб ўтадиган ҳисобот кўргазмалари ва беллашувлардадир.

 Халқаро хотин-қизлар куни ҳамда Наврўз – умумхалқ байрамига бағишлаб ўтказилган “Юртимда баҳор” мавзусидаги  кўргазмали кўрик-танловда ҳам мактабнинг энг иқтидорли ўқувчилари ўз қобилиятларини намойиш этдилар.

Тасвирий санъат йўналиши бўйича таҳсил олаётган ўқувчиларнинг ярим йиллик ҳисобот дарс-кўргазмаси шаклида ўтказилган мазкур кўрик-танловда 1-5-синф ўқувчиларининг ижодий ишлари намойиш этилди. Шунингдек, мазкур йўналиш ўқувчилари иштирокида белгиланган вақт мобайнида “Юртимда баҳор” мавзусида табиат манзараларини чизиш вазифаси топширилди.
Тасвирий санъат йўналиши ўқувчиларидан иборат 82 нафар ёш рассомлар иштирок этган кўрик-танловда она Ватан манзаралари, тобора гуллаб-яшнаётган туманимиз қишлоқлари, сўлим боғ-роғлари, ям-яшил, бепоён далалар тасвири ранг-баранг бўёқларда тасвирлаб берилди.

Ҳакамлар ҳайъати томонидан энг сара асарлар танлаб олиниб, ғолиблар мактаб маъмурияти томонидан фахрий ёрлиқлар, тасвирий санъат дарси учун зарур  бўёқлар, ўқув қуроллари билан мукофотландилар.

Тадбир давомида мактабнинг мусиқа йўналиши бўйича таҳсил олаётган ўқувчилари томонидан куй ва қўшиқлар, рақслар ижро этилди ҳамда драма  тўгараги аъзолари тайёрлаган саҳна кўринишлари намойиш қилинди.

Тадбирнинг таассуротларга бой ва қизиқарли ўтишида 21-сонли Болалар мусиқа ва санъат мактаби  директори Аҳмад Жумабоевнинг хизмати катта бўлди. Мазкур кўрик-танловда ўқувчиларнинг ярим йиллик билимлари юзасидан ҳисобот-кўргазмасини ташкил этиш ҳамда кўрик-танлов ғолибларини моддий ва маънавий жиҳатдан қўллаб-қувватлашда мактаб раҳбари сифатида фаоллик кўрсатгани учун ўқувчиларнинг ота-оналари томонидан Аҳмад Жумабоевга самимий миннатдорчилик билдирилди.

Бўлиб ўтган кўрик-танлов ўқувчиларнинг ўзлари танлаган йўналиш бўйича олган билим ва кўникмаларини янада мустаҳкамлади.

Робия ЙЎЛДОШЕВА.