RANGLARDA JILOLANGAN ONA YuRT BAHORI

Prezidentimizning yoshlar kelajagini koʻzlab, ilgari surgan 5 ta tashabbusida belgilangan yoʻnalishlardan biri oʻsib kelayotgan yosh avlodni sanʼat va madaniyat maskanlariga jalb etish, ularning oʻz iqtidorlarini amalda namoyon etishlari uchun zarur shart-sharoitlar yaratishga qaratilganligi bilan muhim ahamiyatga egadir. Chunki sanʼatga, madaniyatga oshno koʻngillarda hamisha ezgu ishlarga ragʻbat uygʻonadi, qalblarida maʼnaviy yetuk tafakkur tuygʻulari shakllanib, vatanparvarlik hamda xalqparvarlik hissi bilan yashashga odatlanadi.

Bu borada bolalar musiqa va sanʼat maktablarining oʻrni katta ahamiyatga ega. Chunki bu maktablardagi iqtidorli bolalar bilan alohida mashgʻulotlar oʻtkazishga moʻljallangan toʻgaraklar, ularda asosiy darslardan tashqari olib boriladigan mashgʻulotlar oʻquvchilar uchun nafaqat qiziqarli, balki oʻzlari tanlagan yoʻnalishlar boʻyicha mustaqil shugʻullanishlari, olgan nazariy bilimlarini amalda mustahkamlashlari uchun imkoniyat yaratadi.

Qipchoq shaharchasidagi 21-sonli Bolalar musiqa va sanʼat maktabida tasviriy sanʼat yoʻnalishi boʻyicha tahsil olayotgan oʻquvchi-yoshlar ham oʻz ustozlari rahbarligida nafaqat dars-rejalari, balki toʻgarak uchun belgilangan mashgʻulotlarni ham puxta oʻzlashtirishib, oʻzlari tanlagan yoʻnalishlar boʻyicha tuman va respublika miqyosidagi turli koʻrik-tanlovlarda muvaffaqiyatli ishtirok etishmoqda.

Shuni alohida qayd etish kerakki, erishilayotgan barcha yutuqlarning asosiy zamini, avvalo, maktabda boʻlib oʻtadigan hisobot koʻrgazmalari va bellashuvlardadir.

 Xalqaro xotin-qizlar kuni hamda Navroʻz – umumxalq bayramiga bagʻishlab oʻtkazilgan “Yurtimda bahor” mavzusidagi  koʻrgazmali koʻrik-tanlovda ham maktabning eng iqtidorli oʻquvchilari oʻz qobiliyatlarini namoyish etdilar.

Tasviriy sanʼat yoʻnalishi boʻyicha tahsil olayotgan oʻquvchilarning yarim yillik hisobot dars-koʻrgazmasi shaklida oʻtkazilgan mazkur koʻrik-tanlovda 1-5-sinf oʻquvchilarining ijodiy ishlari namoyish etildi. Shuningdek, mazkur yoʻnalish oʻquvchilari ishtirokida belgilangan vaqt mobaynida “Yurtimda bahor” mavzusida tabiat manzaralarini chizish vazifasi topshirildi.
Tasviriy sanʼat yoʻnalishi oʻquvchilaridan iborat 82 nafar yosh rassomlar ishtirok etgan koʻrik-tanlovda ona Vatan manzaralari, tobora gullab-yashnayotgan tumanimiz qishloqlari, soʻlim bogʻ-rogʻlari, yam-yashil, bepoyon dalalar tasviri rang-barang boʻyoqlarda tasvirlab berildi.

Hakamlar hayʼati tomonidan eng sara asarlar tanlab olinib, gʻoliblar maktab maʼmuriyati tomonidan faxriy yorliqlar, tasviriy sanʼat darsi uchun zarur  boʻyoqlar, oʻquv qurollari bilan mukofotlandilar.

Tadbir davomida maktabning musiqa yoʻnalishi boʻyicha tahsil olayotgan oʻquvchilari tomonidan kuy va qoʻshiqlar, raqslar ijro etildi hamda drama  toʻgaragi aʼzolari tayyorlagan sahna koʻrinishlari namoyish qilindi.

Tadbirning taassurotlarga boy va qiziqarli oʻtishida 21-sonli Bolalar musiqa va sanʼat maktabi  direktori Ahmad Jumaboyevning xizmati katta boʻldi. Mazkur koʻrik-tanlovda oʻquvchilarning yarim yillik bilimlari yuzasidan hisobot-koʻrgazmasini tashkil etish hamda koʻrik-tanlov gʻoliblarini moddiy va maʼnaviy jihatdan qoʻllab-quvvatlashda maktab rahbari sifatida faollik koʻrsatgani uchun oʻquvchilarning ota-onalari tomonidan Ahmad Jumaboyevga samimiy minnatdorchilik bildirildi.

Boʻlib oʻtgan koʻrik-tanlov oʻquvchilarning oʻzlari tanlagan yoʻnalish boʻyicha olgan bilim va koʻnikmalarini yanada mustahkamladi.

Robiya YOʻLDOShEVA.