TOR YoP OVULIDAGI 18-SONLI MAKTABGAChA TAʼLIM TAShKILOTIDA BAHORIY BAYRAMLAR DAVOM ETMOQDA

Yurtimiz boʻylab bahoriy bayramlar boshlab yuborildi. Koʻtarinki kayfiyatda boshlangan shoira Zulfiyaxonimning tavallud kuni va 8-mart – Xalqaro xotin-qizlar kuni bayramlari barcha ovul va mahallalarda, muassasa-tashkilotlarda keng nishonlanmoqda.

Tor yop ovulidagi 18-sonli maktabgacha taʼlim tashkilotida ham bahor bayramlari munosabati bilan turli tadbirlar tashkil etila boshlandi. Ayniqsa, tashkilot tarbiyachilari oʻrtasida oʻtkazilgan “Davraga kel, dugonajon” tadbiri juda qizgʻin oʻtdi va barchaga bayramona ruh baxsh etdi. Tadbirda ishtirok etgan fuqarolar yigʻini masʼullari tarbiyachi-pedagoglar va tarbiyalinuvchilarni bayramlar bilan tabrikladi.

Tadbirda tashkilotning tarbiyachi-pedagoglari Dildora Uzoqova, Sevara Habibullayeva, Nasiba Hayitboyeva, Odila Madrahimova, Xurshida Matyoqubovalar 5 ta shart asosida bellashishdi. Kasbim – faxrim, test savollariga javob berish, qoʻl mehnatida ishlash, bahriy salatlar tayyorlash va erkin mavzu kabi shartlar asosida oʻz mahoratlari va bilimdonliklari, chaqqonliklarini koʻrsatishga harakat qilgan qizlarning chiqishlari hakamlar tomonidan odilona baholab borildi. Bellashuv yakunida ishtirokchilarning har biriga nominatsiyalar boʻyicha gʻoliblik berildi va faxriy yorliqlar, sovgʻalar bilan taqdirlanishdi.

Mazkur maktabgacha taʼlim tashkiloti 2016-yilda 140 nafar oʻringa moʻljallab qurilgan boʻlib, hozirgi kunda 230 nafar kichkintoylarga 13 nafar tarbiyachi pedagoglar taʼlim-tarbiya berishmoqda. Muassasada murgʻak qalblarda milliy va qadimiy urf-odatlarimizga hurmat, maʼnaviy qadriyatlarimizni mustahkamlash maqsadida turli mashgʻulotlar oʻtkazilib, tadbirlar tashkil etilmoqda. Ayniqsa, “Zumradoylar davrasi” toʻgaragida har kuni jajji qizlar oʻrtasida muntazam ravishda tarbiyaviy, maʼnaviy-maʼrifiy ishlar olib borilmoqda.

Bayram arafasida tashkilotdagi tayyorlov guruhi tarbiyalanuvchilari oʻrtasida “Zumradoylar davrasi” koʻrik-tanlovi oʻtkazildi. Tanlovda zukko qizchalardan Husnora Erkinboyeva, Hilola Madrahimova, Noila Gulmirzayeva, Salomat Oʻtagenovalar 4 ta shart boʻyicha bellashishdi. Zukko qizchalar oʻzini tanishtirish, onamga sovgʻa tayyorlayman, chuchvara tugish va erkin mavzu shartlarini chaqqonlik va mohirlik bilan bajarishga intilishdi.

Bellashuv davomida toʻgarakda tajribali tarbiyachi-pedagoglar tomonidan oʻrganishgan kiyinish va dasturxon odobi, rostgoʻylik, shirinsoʻzlik, hozirjavoblik, kamtarinlik kabi ezgu fazilatlarini koʻrsatishdi. Ayniqsa, kichkintoylarning chuchvaralarni chiroyli tugishga harakat qilishlari, onajonlariga chiroyli sovgʻa tayyorlashgani barchani yanada zavqlantirdi. Tanlov yakunida jajji bilimdon qizchalarga nominatsiyalar boʻyicha gʻoliblik berildi va sovgʻalar topshirildi.

Tashkilotda bayramlar munosabati bilan oʻtkazilayotgan bu kabi tadbirlar barchaga bahoriy kayfiyat va xushnudlik ulashmoqda.

O.Xudoyberganova.