ТОР ЁП ОВУЛИДАГИ 18-СОНЛИ МАКТАБГАЧА ТАЪЛИМ ТАШКИЛОТИДА БАҲОРИЙ БАЙРАМЛАР ДАВОМ ЭТМОҚДА
Юртимиз бўйлаб баҳорий байрамлар бошлаб юборилди. Кўтаринки кайфиятда бошланган шоира Зулфияхонимнинг таваллуд куни ва 8 март – Халқаро хотин-қизлар куни байрамлари барча овул ва маҳаллаларда, муассаса-ташкилотларда кенг нишонланмоқда.
Тор ёп овулидаги 18-сонли мактабгача таълим ташкилотида ҳам баҳор байрамлари муносабати билан турли тадбирлар ташкил этила бошланди. Айниқса, ташкилот тарбиячилари ўртасида ўтказилган “Даврага кел, дугонажон” тадбири жуда қизғин ўтди ва барчага байрамона руҳ бахш этди. Тадбирда иштирок этган фуқаролар йиғини масъуллари тарбиячи-педагоглар ва тарбиялинувчиларни байрамлар билан табриклади.
Тадбирда ташкилотнинг тарбиячи-педагоглари Дилдора Узоқова, Севара Ҳабибуллаева, Насиба Ҳайитбоева, Одила Мадраҳимова, Хуршида Матёқубовалар 5 та шарт асосида беллашишди. Касбим – фахрим, тест саволларига жавоб бериш, қўл меҳнатида ишлаш, баҳрий салатлар тайёрлаш ва эркин мавзу каби шартлар асосида ўз маҳоратлари ва билимдонликлари, чаққонликларини кўрсатишга ҳаракат қилган қизларнинг чиқишлари ҳакамлар томонидан одилона баҳолаб борилди. Беллашув якунида иштирокчиларнинг ҳар бирига номинациялар бўйича ғолиблик берилди ва фахрий ёрлиқлар, совғалар билан тақдирланишди.
Мазкур мактабгача таълим ташкилоти 2016 йилда 140 нафар ўринга мўлжаллаб қурилган бўлиб, ҳозирги кунда 230 нафар кичкинтойларга 13 нафар тарбиячи педагоглар таълим-тарбия беришмоқда. Муассасада мурғак қалбларда миллий ва қадимий урф-одатларимизга ҳурмат, маънавий қадриятларимизни мустаҳкамлаш мақсадида турли машғулотлар ўтказилиб, тадбирлар ташкил этилмоқда. Айниқса, “Зумрадойлар давраси” тўгарагида ҳар куни жажжи қизлар ўртасида мунтазам равишда тарбиявий, маънавий-маърифий ишлар олиб борилмоқда.
Байрам арафасида ташкилотдаги тайёрлов гуруҳи тарбияланувчилари ўртасида “Зумрадойлар давраси” кўрик-танлови ўтказилди. Танловда зукко қизчалардан Ҳуснора Эркинбоева, Ҳилола Мадраҳимова, Ноила Гулмирзаева, Саломат Ўтагеновалар 4 та шарт бўйича беллашишди. Зукко қизчалар ўзини таништириш, онамга совға тайёрлайман, чучвара тугиш ва эркин мавзу шартларини чаққонлик ва моҳирлик билан бажаришга интилишди.
Беллашув давомида тўгаракда тажрибали тарбиячи-педагоглар томонидан ўрганишган кийиниш ва дастурхон одоби, ростгўйлик, ширинсўзлик, ҳозиржавоблик, камтаринлик каби эзгу фазилатларини кўрсатишди. Айниқса, кичкинтойларнинг чучвараларни чиройли тугишга ҳаракат қилишлари, онажонларига чиройли совға тайёрлашгани барчани янада завқлантирди. Танлов якунида жажжи билимдон қизчаларга номинациялар бўйича ғолиблик берилди ва совғалар топширилди.
Ташкилотда байрамлар муносабати билан ўтказилаётган бу каби тадбирлар барчага баҳорий кайфият ва хушнудлик улашмоқда.
О.Худойберганова.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
