ҲАМ РАҲБАР, ҲАМ ТАДБИРКОР

Нилуфар зиёли оилада туғилиб, вояга етди. Аллоҳ раҳмат қилсин, отаси Илҳом Давлетов ҳаётлигида давлат ва жамоат ишларида кўзга кўринган обрўли инсонлардан эди.
Ана шундай обрўли хонадонда вояга етган Нилуфархон Давлетова умумтаълим мактабида фақат аъло баҳоларга ўқиди. Мактабни тугатгач, 1987-1992 йилларда Республика рус тили ва адабиёти институтида таҳсил олди. У ўзининг илк педагогик фаолиятини 1992-2005 йилларда 31-сонли мактабда рус тили ва адабиёти фани ўқитувчиси вазифасида ишлашдан бошлади. Кейинчалик 64-сонли умумтаълим мактабида ва яна 31-сонли мактабда ўқувчиларга рус тили ва адабиёти фанидан сабоқ берди. Нилуфарнинг дарс ўтиш услубидаги ўзига хослик, феълидаги интилувчанлик ва қатъият, инновацион ғояларни  ўз фанида қўллаш иқтидори туфайли уни ўқув ишлари бўйича директор ўринбосари лавозимига тайинлашди. Унинг тиришқоқлик ва қатъият билан иш юритишига алоҳида эътибор қаратган туман халқ таълими бўлими раҳбарияти уни 2010 йилда ўзи меҳнат қилаётган 31-сонли мактаб директори лавозимига тайинлашди.
Туман Кенгаши депутати сифатида таълим тизимига жорий этилаётган ислоҳотларнинг фаол иштирокчисидан бу ислоҳотларнинг ижрочисига айланган Н.Давлетова мана 10 йилдирки, мактаб директори вазифасини маҳорат билан адо этмоқда. У раҳбар бўлган педагогик жамоада ҳамиша ўзига хос интизомга асосланган меҳнат жараёни ҳоким. Билимлар беллашуви, фанлар олимпиадаларида ва бошқа кўрик-танловларда мактаб ўқувчилари доимо юқори ўринларни забт этишади.
2015 йилда Н.Давлетова умр йўлдоши, туман Тиббиёт бирлашмаси шифокори Озод Матқурбонов билан бамаслаҳат тадбиркорлик соҳасига қўл урди. Қандолат ва сут маҳсулотларини тайёрлаш ва қайта ишлашга ихтисослаштирилган “Жайхун лаззати” оилавий корхонасини ташкил этиш бўйича ўз бизнес-лойиҳасини тайёрлади ва шу йили “Тадбиркор аёлнинг энг яхши лойиҳаси” кўрик-танловининг Қорақалпоғистон Республикаси босқичида “Қишлоқ жойларининг энг яхши лойиҳаси” йўналиши бўйича ғолиб бўлди.
Корхона 2016 йилда кондитер маҳсулотларини ишлаб чиқаришни бошлади. 2017 йилга келиб корхона ўз қаддини анча тиклаб олди ва сут маҳсулотларини қайта ишлаш цехи ишга туширилиб, 10 нафар киши доимий иш билан таъминланди.
–  Кунига 1 тонна сутни қайта ишлаб, экологик тоза ва сифатли маҳсулотлар тайёрлаб, ички бозорга сотувга чиқармоқдамиз, – дейди Нилуфар.
Корхона маҳсулотлари харидоргир. Айни кунда 10 та мактабгача таълим ташкилотларига сметана, творог ва бошқа сут маҳсулотлари етказиб бераётган “Жайхун лаззати” оилавий корхонаси бир маромда фаолият юритиши учун Нилуфарга фарзандлари энг яқин кўмакдош. Катта ўғли Темур Алламберганов корхонанинг ижрочи директори. Бобуржон эса малакали технолог сифатида барча ишга бош-қош. Катта қизи Назокатхон 55-сонли мактабда ўқитувчи, Малоҳатхон эса Тошкент ахборот технологиялари Университети талабаси.
– Фарзандларимдан кўнглим тўқ, – дейди Нилуфар меҳр билан. – Барчаси ўқимишли, ҳунарли. Умр йўлдошим эса ҳамиша бизга яқин маслакдош. Шунинг учун ишларимга бемалол улгураяпман.
Ҳам мактаб раҳбари, ҳам тадбиркор, Н.Давлетованинг фаолият кўлами анча кенг. У халқ депутатлари туман Кенгаши депутати сифатида сайловчилари билан учрашишга, уларнинг ҳаётига доир муаммоларини ўрганиб, депутатлик сўрови билан туман Кенгашига мурожаат этишга, таълим тизимига инновацион лойиҳаларни жорий этишга, тадбиркорлик фаолиятини замон талаблари даражасига кўтаришга вақт топади. Изланишдан, интилишдан асло чарчамайди. Зотан, олдинга интилиб яшаш Нилуфар учун ҳаётдаги олтин қоидадир.

Робия ЙЎЛДОШЕВА.