Тадбир ўқувчиларнинг аниқ фанларни ўрганишга бўлган қизиқишларини оширди

Февраль – математика, информатика фанлари ойлиги дея белгиланиши муносабати билан туманимизнинг барча мактабларида бўлгани каби 38-сонли умумий ўрта таълим мактабида ҳам қатор тадбирлар ўтказилди.
Аввало ойликни муваффақиятли ўтказиш юзасидан фан услуб бирлашмасининг йиғилиши ўтказилиб, фан ўқитувчиларига вазифалар тақсимлаб берилди. Ойлик доирасида очиқ ўқув машғулотлари, турли тадбирлар, беллашувлар ва заковат ўйинларини ҳам ташкил этиш режалаштирилди.

Шунга кўра, услуб бирлашма аъзолари Карима Машарипова, Барно  Эшмуродова, Комила Қиличева, Фарида Юсупова, Муҳтарам Қозоқбоева, Инобат Норимовалар томонидан намунавий очиқ дарслар, семинарлар ва турли беллашувлар ўтказилди.
Ойлик якунида эса “Аввал математика, кейин ҳаммаси...” деб номланган математик кеча ташкил этилди. Тадбирда фан ўқитувчилари дастлаб математика энг қадимий, аниқ мантиқий мушоҳадаларга асосланган билимлар ҳақидаги фан эканлиги, унинг узоқ ривожланиш тарихини босиб ўтганлиги, дастлабки объекти саноқ бўлгани учун кўпинча унга “ҳисоб-китоб ҳақидаги фан” деб қаралганлиги ҳақида сўз юритдилар.

Мактабнинг 5-,11-синфлари ўқувчилари иштирок этган ушбу якуний тадбирнинг бундай номланишининг ўзига хос сабаблари бор. Иккала 7-синф ўқувчилари тайёрлаб намойиш этган саҳна кўринишида бир йигит касб эгаллаш учун шогирдликка олишларини сўраб, турли касб эгаларига илтимос қилади. Қарасаки, мактабда яхши ўқимаган фани математика дурадгорлик, темирчилик, косиблик каби касбларни ўрганиши учун ҳам зарур экан. У бошқа касб излаб кўради ва барибир математика, геометрияга оид билими пастлиги учун касб ўрганолмайди. Шунда ўқувчи ўзига керакли  ижобий хулоса чиқаришга муваффақ бўлади, аввал математикани ўрганман, кейин ҳаммасини...

Дарвоқе, ўқувчилар томонидан намойиш этилган ушбу саҳна кўриниши чуқур фалсафий  маънога эга. Чунки турмушимизнинг барча жабҳаларидаги ижобий ўзгаришлар, янгиланишлар замирида пухта ўйланган режа, аниқ ҳисоб-китоблар бор.
Тадбирда улуғ аллома боболаримизнинг математика фани хусусида, фанни ўрганишнинг аҳамияти ҳақида айтган ибратли сўзларини ўқувчилар маҳорат билан ижро этдилар.

Ҳар бир синф ўқувчилари тайёрлаган чиқишлар томошабинлар томонидан қизғин кутиб олинди. Айниқса, сонларга таъриф бериш, “Чархпалак ўйини”, кубикларнинг томонларини бир хил рангда тизиш, икки рангдаги олмалардан фойдаланиб, шашка ўйнаш, шахмат мусобақаси ҳам жуда ҳаяжонли бўлди. Албатта, бу ўйинларнинг ҳаммаси аниқ ҳисоб-китобни талаб қилади. Шу боисдан ҳам ўқувчилар ҳар бир топшириқни аниқ ва тез бажаришга, бошқа синфлардан орқада қолмасликка астойдил интилдилар ва мазкур фанни нечоғлик яхши ўзлаштираётганликларини намойиш этдилар.

“Аввал математика, кейин ҳаммаси...” деб номланган ойлик доирасида ўтказилган тадбир ўқитувчиларда ҳам, ўқувчиларда ҳам улкан таассуротлар қолдирди, аниқ фанларни ўрганишга бўлган қизиқишларини оширди.

Фан ойлигининг якунланиши байрамона руҳда ўтказилди. Унда мазкур жараёнда фаол иштирок этган ўқувчилар, ўқитувчилар рағбатлантирилди.

Ойгул РАЖАБОВА.