Tadbir oʻquvchilarning aniq fanlarni oʻrganishga boʻlgan qiziqishlarini oshirdi

Fevral – matematika, informatika fanlari oyligi deya belgilanishi munosabati bilan tumanimizning barcha maktablarida boʻlgani kabi 38-sonli umumiy oʻrta taʼlim maktabida ham qator tadbirlar oʻtkazildi.
Avvalo oylikni muvaffaqiyatli oʻtkazish yuzasidan fan uslub birlashmasining yigʻilishi oʻtkazilib, fan oʻqituvchilariga vazifalar taqsimlab berildi. Oylik doirasida ochiq oʻquv mashgʻulotlari, turli tadbirlar, bellashuvlar va zakovat oʻyinlarini ham tashkil etish rejalashtirildi.

Shunga koʻra, uslub birlashma aʼzolari Karima Masharipova, Barno  Eshmurodova, Komila Qilicheva, Farida Yusupova, Muhtaram Qozoqboyeva, Inobat Norimovalar tomonidan namunaviy ochiq darslar, seminarlar va turli bellashuvlar oʻtkazildi.
Oylik yakunida esa “Avval matematika, keyin hammasi...” deb nomlangan matematik kecha tashkil etildi. Tadbirda fan oʻqituvchilari dastlab matematika eng qadimiy, aniq mantiqiy mushohadalarga asoslangan bilimlar haqidagi fan ekanligi, uning uzoq rivojlanish tarixini bosib oʻtganligi, dastlabki obʼekti sanoq boʻlgani uchun koʻpincha unga “hisob-kitob haqidagi fan” deb qaralganligi haqida soʻz yuritdilar.

Maktabning 5-,11-sinflari oʻquvchilari ishtirok etgan ushbu yakuniy tadbirning bunday nomlanishining oʻziga xos sabablari bor. Ikkala 7-sinf oʻquvchilari tayyorlab namoyish etgan sahna koʻrinishida bir yigit kasb egallash uchun shogirdlikka olishlarini soʻrab, turli kasb egalariga iltimos qiladi. Qarasaki, maktabda yaxshi oʻqimagan fani matematika duradgorlik, temirchilik, kosiblik kabi kasblarni oʻrganishi uchun ham zarur ekan. U boshqa kasb izlab koʻradi va baribir matematika, geometriyaga oid bilimi pastligi uchun kasb oʻrganolmaydi. Shunda oʻquvchi oʻziga kerakli  ijobiy xulosa chiqarishga muvaffaq boʻladi, avval matematikani oʻrganman, keyin hammasini...

Darvoqe, oʻquvchilar tomonidan namoyish etilgan ushbu sahna koʻrinishi chuqur falsafiy  maʼnoga ega. Chunki turmushimizning barcha jabhalaridagi ijobiy oʻzgarishlar, yangilanishlar zamirida puxta oʻylangan reja, aniq hisob-kitoblar bor.
Tadbirda ulugʻ alloma bobolarimizning matematika fani xususida, fanni oʻrganishning ahamiyati haqida aytgan ibratli soʻzlarini oʻquvchilar mahorat bilan ijro etdilar.

Har bir sinf oʻquvchilari tayyorlagan chiqishlar tomoshabinlar tomonidan qizgʻin kutib olindi. Ayniqsa, sonlarga taʼrif berish, “Charxpalak oʻyini”, kubiklarning tomonlarini bir xil rangda tizish, ikki rangdagi olmalardan foydalanib, shashka oʻynash, shaxmat musobaqasi ham juda hayajonli boʻldi. Albatta, bu oʻyinlarning hammasi aniq hisob-kitobni talab qiladi. Shu boisdan ham oʻquvchilar har bir topshiriqni aniq va tez bajarishga, boshqa sinflardan orqada qolmaslikka astoydil intildilar va mazkur fanni nechogʻlik yaxshi oʻzlashtirayotganliklarini namoyish etdilar.

“Avval matematika, keyin hammasi...” deb nomlangan oylik doirasida oʻtkazilgan tadbir oʻqituvchilarda ham, oʻquvchilarda ham ulkan taassurotlar qoldirdi, aniq fanlarni oʻrganishga boʻlgan qiziqishlarini oshirdi.

Fan oyligining yakunlanishi bayramona ruhda oʻtkazildi. Unda mazkur jarayonda faol ishtirok etgan oʻquvchilar, oʻqituvchilar ragʻbatlantirildi.

Oygul RAJABOVA.