ДЎСТЛИК МАҲАЛЛАСИДА СУМАЛАК САЙИЛЛАРИ БОШЛАНДИ, БУ - НАВРЎЗДАН ДАРАК

Баҳор фаслининг ажиб таровати, кўнгилларни яшнатиб, қалбларга ҳузур-ҳаловат бахш этувчи бири-биридан гўзал байрамлари бор. Куни-кеча 8 март – Халқаро хотин-қизлар куни муносабати билан бошланган шукуҳли байрам тадбирлари баҳорнинг хуш таоми - сумалак сайилларига уланиб кетди.

Дарвоқе, сумалак! Бу таомнинг инсон жисмига куч-қувват бахш этувчи хушбўй таъмидан ҳам муҳимроқ, азизроқ жиҳати борки, бу – сумалакка шайланган момоларимизнинг, енг шимариб, тонггача даҳсар қозонларга олов қалаган шижоатли йигитларимизнинг, бири-биридан хуштабиат, пазанда келин-у қизларимизнинг аҳил-у иноқлигида, бир-бирига меҳр-у оқибатида акс этган ва эл-юртни бирлаштиргувчи қудратида намоёндир.

Узун қиш тунларида баҳорни орзиқиб кутган момоларимиз аллақачон Наврўз айёмига тараддудни бошлаб юборганлари-чи! Бугун туманимизнинг қайси гўшасига борманг, албатта, сумалак сайилларига ошно бўласиз. Қиз-у келинчакларни ёнларига олиб, бобомерос қадриятларимиздан сўз очаётган мана бу момоларимизнинг ғайрат-у шижоатларига таҳсин айтмай иложингиз йўқ.

Манғит шаҳрининг Дўстлик маҳалла фуқаролар йиғини раиси Элмирахон Исмоилова маҳалланинг ҳар бир кўчасида дошқозонлар қуриб, сумалак сайлини обод қилаётган маҳалладошларидан мамнун. Маҳалланинг “Чаманзор” кўчаси аҳлини бирлаштириб, сумалак учун буғдой ундирган Ҳабибахон момо Йўлдошеванинг ҳимматидан қўни-қўшниларнинг кайфиятлари баланд. Бир текис униб чиққан буғдой майсалари катта-катта тоғораларга солиниб, Озодбой оға Янгибоевнинг хонадонида дошқозон ўрнатилди. Рафиқаси Дилфузахон ая Эшимбетова қўни-қўшнилари, дугоналари ва Қурбоной момо Камолова, Турсуной опа Бобожонова ҳамда Розажон аяларни, маҳалланинг пазанда келинларини сумалакка чорлади. Ҳамжиҳатлик, ўзаро меҳр-оқибат, диллардаги самимият чўғи барчанинг қалбига илиқлик, хушнудлик бахш этди. Момолар бошлаган ишга келин-у қизлар камарбаста бўлдилар. Бири олиб, бири қўйиб, лапар-у айтишувларга жўр бўлган келинларга йигитлар яқин кўмакдош бўлишди. Буғдой майсаларини келида туйиш, сув етказиб бериш, ўтин ёриш юмушлари ҳам жуда енгил кўчганидан барча мамнун, сумалак тайёрлашга киришдилар. Бири-биридан чаққон келинлар Шириной, Шарофатхон, Малоҳатхон, Зайнабхон, Гулнозахон ҳаммадан асал тилли Шарофатхон, Дилбархон-у маҳалланинг яна бир шарофатли келини Шарофатхонлар барча юмушни бадастир адо этишди.

Озодбой оға бошчилигидаги эпчил ва чаққон йигитлар Баҳром, Мансур, Ихтиёр, Элдорбек ва Кенжабойлар ўтин ёриш баҳсида бири-биридан қолишмадилар.

Сумалак қайнаб, ранги тиниқлашган сари гўё кўнгиллар ҳам тозарди, онахонлар ва келин-у қизлар қалбида куй-қўшиққа мойиллик уйғонди. Буни қарангки, созанда-ю гўянда ҳам ўзларидан чиқди. Муроджон оға Эшмонов рубоб чалди, невараси Валижон бобосига жўр бўлди. Куй-қўшиқ сеҳрига ҳамоҳанг қайнаётган сумалак ҳиди оламга таралди. Ҳамма хурсанд, ҳамма тунги бедорликни, чарчоқни унутди. Дўстлик маҳалласи фуқаролар йиғини раиси Элмирахон Исмоилова маҳалла аҳлининг меҳр-оқибатидан мамнун бўлиб, кекса онахон Қурбоной момонинг бошига рўмол ташлади. Момо эса қўлларини  дуога очиб, маҳалла ёшларига баркамоллик, эл-юртга оғизбирчилик ҳамда омонлик, Ватанимизга тинчлик-осойишталик тилади.

Меҳр ва самимият чўғида олланиб пишган сумалак дастурхонларга тортилганида бутун Дўстлик маҳалласига сумалакнинг хушбўй ифори таралди.

Шу куни маҳалланинг Низомий номли кўчаси аҳолиси ҳам Наврўз байрами арафасида тонгги дастурхонларига қайноққина сумалак тортдилар. Маҳалланинг Дўстлик кўчасидаги ёш келинлар ва йигит-қизлар, нуроний отахон ва онахонлар бошчилигида дошқозон ўрнатиб, сумалак сайлини бошлаб юбордилар.

Бугун Дўстлик маҳалласининг қай бир  кўчасига борманг, аҳолининг бирдамлигига, хурсандлик билан сумалак сайлини бошлаётганига гувоҳ бўласиз. Зеро, амударёликлар қалбини бир мақсад йўлида бирлаштириб, янги деҳқончилик йили бошланадиган қутлуғ кун – Наврўзи олам тантаналари, аввало кексалар дуоси билан ана шундай самимият қулф урган сумадак сайилларидан бошланади. Бу – келаётган янги деҳқончилик йили – Наврўзи оламнинг элга бахш этгувчи баракаси, улуғ насибасидан дарак. Хушбўй, ширин сумалаклар пиширган момоларимизнинг дуолари ижобат бўлмоғига ишора.

Робия ЙЎЛДОШЕВА.