ЎҚИШ ФАНИДАН ЎТКАЗИЛГАН ОЧИҚ ДАРС ЎҚИШНИ ЎРГАНГАН БОЛАЛАРДА КИТОБХОНЛИККА ИХЛОС УЙҒОТДИ
Бошланғич синфларда ўтказиладиган очиқ дарслар ўқувчиларнинг билим савиясини оширишга қаратилгани билан аҳамиятлидир. Шунингдек, уларнинг дунёқараши шаклланиб, ўтилаётган дарс мавзусининг инсон камолотида тутган ўрни ҳақида тасаввур уйғотиб, бола нутқининг ривожланишига ёрдам беради.
Айни кунларда умумтаълим мактабларининг “Алифбе” китобини пухта ўзлаштириб олган 1-синф ўқувчилари учун янада қизиқарли дарс жараёнлари давом этмоқда. Ўқиш китобида берилган турли хил мавзулардаги ҳикоялар, эртак ва шеърлар болажонлар тасаввурида янги-янги дунёларни кашф этишларига имкон яратаётгани ўқиш фани бўйича ўтказилаётган очиқ дарс машғулотларида ўз ифодасини топмоқда.
Туманимиздаги 16-сонли ихтисослаштирилган давлат умумтаълим мактабининг 1-“Б”синфида ўқиш фанидан синф раҳбари Матлуба Раҳимова томонидан ўтказилган очиқ дарс машғулоти ўзининг инновацион ғояларга асослангани билан ўқувчиларнинг фаоллигини янада оширди.
Ёзувчи Ғиёс Комиловнинг буюк бобокалонимиз, шоҳ ва шоир, матонатли саркарда, этнограф, тарихчи ва географ, доришунос ҳамда серқирра адабиётшунос олим Заҳириддин Муҳаммад Бобурнинг ёшлиги ҳақида ҳикоя қилувчи “Она сабоғи” асари асосида ташкил этилган очиқ дарс машғулотини Матлуба Раҳимова маҳорат билан олиб борди. Дарс машғулотида ахборот технологиялари имкониятларидан самарали фойдаланилди. Хусусан, Заҳириддин Муҳаммад Бобурнинг ёшлик ва камолот даври ҳақида ҳикоя қилувчи слайдлар орқали ўқувчилар буюк бобокалонимизнинг болалик орзулари, интилишлари, ватанпарварлик туйғуларига ошно кечган беором ҳаёти ҳақида чуқур тасаввурга эга бўлдилар.
Машғулот давомида буюк аждодимиз Заҳириддин Муҳаммад Бобурнинг бебаҳо илмий-бадиий асарлари жаҳон илм-фани, адабиёти ривожида муҳим аҳамият касб этгани таъкидланди. Бобур ва бобурийлар ҳаёти, ижодий меросини ўрганиш, тарғиб этиш борасида амалга оширилаётган ишлар хусусида ҳам ўқувчиларга маълумотлар берилди. Шунингдек, Бобур ғазалларидан, рубоийларидан намуналар ўқилди. Дарс жараёнида бошланғич синф ўқитувчиси ва синф раҳбари сифатида Матлуба Раҳимова кўргазмали қуроллардан фойдаланган ҳолда дарс ўтиш бўйича ўз услубига эга ўқитувчи эканлигини намоён эта олди. Ўтилаётган машғулот мавзусидан келиб чиқиб, ўқишни ўрганган болаларнинг матнни тутилмай, ифодали ўқишлари, мавзуни тўлиқ ўзлаштиришларини таъминлаш мақсадида ташкил этилган дам олиш дақиқалари очиқ дарс машғулотидан кўзланган асосий мақсад – ҳар бир ўқувчининг қизиқиш билан мавзуни чуқур ўзлаштиришига имкон яратди. Шу билан бирга 1-синф ўқувчилари ўртасида китобхонликка ихлос муҳитини юзага келтирди.
Дарс машғулоти давомида ўқувчилар мавзу юзасидан берилган топшириқларни аъло даражада уддаладилар. Ўқитувчи томонидан янги мавзуни мустаҳкамлаш мақсадида берилган саволларга ҳам равон жавоб бердилар. Ундан ташқари, ўқувчиларнинг дарсдан олган таассуротлари ҳам тингланди. Улар улуғ аждодимиз Бобур ҳаёти ва ижодидан олган таассуротларини эркин ҳикоя қилиб беришди.
Бўлиб ўтган очиқ дарс машғулотида бошланғич синф ўқувчиларига шоҳ ва шоирнинг ўзига хос фазилатлари очиб берилди. Ўқувчилар ҳам ўз навбатида ушбу дарс мобайнида маънавий баҳра олдилар.
Р.ЙЎЛДОШЕВА.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
