OʻQISh FANIDAN OʻTKAZILGAN OChIQ DARS OʻQIShNI OʻRGANGAN BOLALARDA KITOBXONLIKKA IXLOS UYGʻOTDI

Boshlangʻich sinflarda oʻtkaziladigan ochiq darslar oʻquvchilarning bilim saviyasini oshirishga qaratilgani bilan ahamiyatlidir. Shuningdek, ularning dunyoqarashi shakllanib, oʻtilayotgan dars mavzusining inson kamolotida tutgan oʻrni haqida tasavvur uygʻotib, bola nutqining rivojlanishiga yordam beradi.

Ayni kunlarda umumtaʼlim maktablarining “Alifbe” kitobini puxta oʻzlashtirib olgan 1-sinf oʻquvchilari uchun yanada qiziqarli dars jarayonlari davom etmoqda. Oʻqish kitobida berilgan turli xil mavzulardagi hikoyalar, ertak va sheʼrlar bolajonlar tasavvurida yangi-yangi dunyolarni kashf etishlariga imkon yaratayotgani oʻqish fani boʻyicha oʻtkazilayotgan ochiq dars mashgʻulotlarida oʻz ifodasini topmoqda.

Tumanimizdagi 16-sonli ixtisoslashtirilgan davlat umumtaʼlim maktabining 1-“B”sinfida oʻqish fanidan sinf rahbari Matluba Rahimova tomonidan oʻtkazilgan ochiq dars mashgʻuloti oʻzining innovatsion gʻoyalarga asoslangani bilan oʻquvchilarning faolligini yanada oshirdi.

Yozuvchi Gʻiyos Komilovning buyuk bobokalonimiz, shoh va shoir, matonatli sarkarda, etnograf, tarixchi va geograf, dorishunos hamda serqirra adabiyotshunos olim Zahiriddin Muhammad Boburning yoshligi haqida hikoya qiluvchi “Ona sabogʻi” asari asosida tashkil etilgan ochiq dars mashgʻulotini Matluba Rahimova mahorat bilan olib bordi. Dars mashgʻulotida axborot texnologiyalari imkoniyatlaridan samarali foydalanildi. Xususan, Zahiriddin Muhammad Boburning yoshlik va kamolot davri haqida hikoya qiluvchi slaydlar orqali oʻquvchilar buyuk bobokalonimizning bolalik orzulari, intilishlari, vatanparvarlik tuygʻulariga oshno kechgan beorom hayoti haqida chuqur tasavvurga ega boʻldilar.

Mashgʻulot davomida buyuk ajdodimiz Zahiriddin Muhammad Boburning bebaho ilmiy-badiiy asarlari jahon ilm-fani, adabiyoti rivojida muhim ahamiyat kasb etgani taʼkidlandi. Bobur va boburiylar hayoti, ijodiy merosini oʻrganish, targʻib etish borasida amalga oshirilayotgan ishlar xususida ham oʻquvchilarga maʼlumotlar berildi. Shuningdek, Bobur gʻazallaridan, ruboiylaridan namunalar oʻqildi. Dars jarayonida boshlangʻich sinf oʻqituvchisi va sinf rahbari sifatida Matluba Rahimova koʻrgazmali qurollardan foydalangan holda dars oʻtish boʻyicha oʻz uslubiga ega oʻqituvchi ekanligini namoyon eta oldi. Oʻtilayotgan mashgʻulot mavzusidan kelib chiqib, oʻqishni oʻrgangan bolalarning matnni tutilmay, ifodali oʻqishlari, mavzuni toʻliq oʻzlashtirishlarini taʼminlash maqsadida tashkil etilgan dam olish daqiqalari ochiq dars mashgʻulotidan koʻzlangan asosiy  maqsad – har bir oʻquvchining qiziqish bilan mavzuni chuqur oʻzlashtirishiga imkon yaratdi. Shu bilan birga 1-sinf oʻquvchilari oʻrtasida kitobxonlikka ixlos muhitini yuzaga keltirdi.

Dars mashgʻuloti davomida oʻquvchilar mavzu yuzasidan berilgan topshiriqlarni aʼlo darajada uddaladilar. Oʻqituvchi tomonidan yangi mavzuni mustahkamlash maqsadida berilgan savollarga ham ravon javob berdilar. Undan tashqari, oʻquvchilarning darsdan olgan taassurotlari ham tinglandi. Ular ulugʻ ajdodimiz Bobur hayoti va ijodidan olgan taassurotlarini erkin hikoya qilib berishdi.

Boʻlib oʻtgan ochiq dars mashgʻulotida boshlangʻich sinf oʻquvchilariga shoh va shoirning oʻziga xos fazilatlari ochib berildi. Oʻquvchilar ham oʻz navbatida ushbu dars mobaynida maʼnaviy bahra oldilar.

R.YOʻLDOShEVA.