4-сонли МТТда "Буюкларга эҳтиром" деб номланган тадбир ўтказилди
Мамлакатимизда болаларни мактабгача таълим билан қамраб олиш мактабгача таълим тизимидаги энг долзарб бўлиб турган масалалардан бири. Шу боисдан ҳам янгидан-янги мактабгача таълим ташкилотлари қурилиб фойдаланишга топширилмоқда, фаолият кўрсатиб турган ташкилотларга ғамхўрлик кучаймоқда. Болажонларни мактаб таълимига сифатли тайёрлаш, соғлом овқатлантириш ва жисмоний фаоллигини оширишга алоҳида эътибор қаратилмоқда.
Болаликда олинган билим – тошга ўйилган нақш каби ўчмайди. Аксинча, уларнинг интилишларига қанот бағишлайди.
Туманимизда фаолият юритаётган 4-сонли мактабгача таълим ташкилотида болажонларнинг зеҳнини юксалтирувчи турли фан, спорт тўгараклари, бадиий ҳаваскорлик тўгараклари мунтазам ишлаб турибди. Ташкилотда айни кунда – нафар болажонлар таълим-тарбия олишмоқда. Уларга “Илк қадам” дастури ва бошқада илғор педагогик технологиялардан самарали фойдаланилган ҳолда машғулотлар олиб борилиб, интеллектуал салоҳиятини юксалтиришга эътибор берилаётир.
Шу йилнинг 14 февралида буюк бобокалонларимиз, мумтоз адабиётимизнинг улуғ намояндалари мир Алишер Навоий ва Заҳириддин Муҳаммад Бобур таваллуд кунлари муносабати билан ўтказилган “Буюкларга эҳтиром” деб номланган маънавий-маърифий кечада ҳам болажонларнинг тарбиячиларидан олаётган сабоқларини қай даражада ўзлаштираётганликлари намоён бўлди.
Тадбирда ташкилотнинг мактабга тайёрлов гуруҳи тарбиячиси Дилдора Искандарова тарбияланувчиларига Алишер Навоий ва Заҳириддин Муҳаммад Бобур ҳаёти ва ижоди, уларнинг ақлу-заковати, билимдонликлари, ҳаёти давомида амалга оширган ибратли ишлари ҳақида сўзлаб берди. Шундан сўнг, кичкинтойлар бобокалонларимиз ижодига мансуб ғазал, рубоий ва достонлардан намуналарни ифодали қилиб, ёд айтдилар. Болажонларнинг миллий кийимларда мумтоз адабиётимиз намуналарини ширин забонда ижро этишлари тарбиячиларни ҳам, тадбирга ташриф буюрган ота-оналарни ҳам тўлқинлантириб юборди. Айниқса, болажонлар томонидан театрлаштирилган саҳна кўринишида саркарда Бобур ва сарой аёнлари образилари ифодалангани барчага манзур бўлди.“Нон иси”, “Тандир қура олмаган – уй қура олармиди”, дея номланган саҳна кўринишларини ҳам болажонлар юксак маҳорат билан ижро этдилар.
Тадбир ташкилотнинг мактабгача тайёрлов гуруҳи тарбиячиси Дилдора Искандарова, катта гуруҳ тарбиячилари Манзура Ражабова, Манзура Аҳмедова, Нигора Йўлдошева, мусиқа раҳбарлари Илҳом Худоёров, Нурбек Ражабов, рақс тўгараги раҳбари Назокат Исмоиловалар ҳамкорлигида тайёрланди.
Тадбир болажонларни икки улуғ мутаффакир шоир ҳаёти ва ижоди билан янада яқинроқ таништиришга, буюкларга нисбатан кўнгилларида эҳтиром уйғотишга хизмат қилгани билан аҳамиятли бўлди.
Бу каби маданий-маърифий тадбирлар болажонларда улуғ аждодларимизга эҳтиром, она Ватанга садоқат туйғуларини шакллантиради. Буюк бобомиз асарларида тараннум этилган умуминсоний қадриятлар эса уларнинг ҳар жиҳатдан соғлом, юксак маънавиятли бўлиб улғайишларида муҳим ўрин тутади.
О. Ражабова.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
