24-сонли МТТда “Хайр боғчам, салом мактаб” номли байрам тадбири ўтказилди

Ёз фасли келажагимиз эгалари бўлган жажжи болажонларнинг жисмоний ва маънавий ривожланишида, айниқса, уларнинг табиат билан уйғунликда оламни англашида энг масъулиятли ва самарали давр ҳисобланади. Айнан шу боис, мактабгача таълим ташкилотларида ёзги соғломлаштириш мавсумига алоҳида эътибор қаратилиб, турли хил экологик ва маърифий лойиҳалар амалга оширилмоқда. Жумладан, Амударё туманидаги 24-сонли давлат мактабгача таълим ташкилотида ҳам бу йилги мавсум “Сувни асраймиз – келажакни асраймиз” шиори остида кўтаринки руҳда ўтмоқда.

Муассаса директори Мунаввара Тураева раҳбарлигида фаолият юритаётган 15 нафар олий маълумотли педагоглар жамоаси ҳар куни масканга қатнайдиган 210 нафар ўғил-қизнинг ижодий ва интеллектуал салоҳиятини ошириш йўлида тинимсиз изланмоқда. Болаларда сувнинг ҳаётбахш хусусияти ва табиат неъматларини асраш туйғусини шакллантириш мақсадида қизиқарли дидактик ўйинлар ва амалий машғулотлар мунтазам ўтказиб келиняпти. Мазкур йўналишдаги тадбирларнинг узвий давоми сифатида яқинда муассасада “Хайр боғчам, салом мактаб” деб номланган тантанали битирув кечаси ташкил этилди. Ушбу тадбир нафақат ёзги мавсумнинг, балки бутун ўқув йилининг ўзига хос сарҳисобига айланди. Кечанинг юқори савияда ўтишида тайёрлов гуруҳи тарбиячилари Маржона Давлатбоева ва Зилола Холмонова, мажбурий таълим гуруҳи тарбиячиси Дилфуза Юлдашева ҳамда тарбиячи ёрдамчилари Қурбонгул Ағатаева, Юлдуз Усмонова ва Ҳамида Матқурбановаларнинг хизматлари катта бўлди.

Мусиқа раҳбарлари Солий Ешимбетов ва Элдор Холмирзаев, шунингдек, жисмоний тарбия йўриқчиси Зулфизар Гулмирзаева бошчилигида тайёрланган бадиий дастур барча меҳмонларга манзур бўлди. Жажжи истеъдод эгалари ижросидаги “Қизларжон”, “Гулим”, “Лазги” ва “Қамчи бос” каби рақслар, “Уйча” эртаги асосидаги саҳна кўриниши ҳамда “Онажонлар” қўшиғи томошабинлар қалбидан чуқур жой олди. Айниқса, “Ўзбек алифбосини ўрганамиз” номли махсус рақс ўзининг таълимий аҳамияти билан йиғилганларда илиқ таассурот қолдирди. Бир сўз билан айтганда, 24-сонли мактабгача таълим ташкилотида олиб борилаётган бундай тизимли ишлар ёш авлоднинг ҳар томонлама баркамол, етук ва ватанпарвар инсонлар бўлиб етишишида мустаҳкам пойдевор вазифасини ўтайди. Табиатга меҳр ва билимга чанқоқлик туйғулари билан суғорилган бундай тадбирлар орқали жажжи ўғил-қизлар мактаб остонасига катта ишонч ва юксак тайёргарлик билан қадам қўймоқдалар.