24-sonli MTTda “Xayr bogʻcham, salom maktab” nomli bayram tadbiri oʻtkazildi

Yoz fasli kelajagimiz egalari boʻlgan jajji bolajonlarning jismoniy va maʼnaviy rivojlanishida, ayniqsa, ularning tabiat bilan uygʻunlikda olamni anglashida eng masʼuliyatli va samarali davr hisoblanadi. Aynan shu bois, maktabgacha taʼlim tashkilotlarida yozgi sogʻlomlashtirish mavsumiga alohida eʼtibor qaratilib, turli xil ekologik va maʼrifiy loyihalar amalga oshirilmoqda. Jumladan, Amudaryo tumanidagi 24-sonli davlat maktabgacha taʼlim tashkilotida ham bu yilgi mavsum “Suvni asraymiz – kelajakni asraymiz” shiori ostida koʻtarinki ruhda oʻtmoqda.

Muassasa direktori Munavvara Turayeva rahbarligida faoliyat yuritayotgan 15 nafar oliy maʼlumotli pedagoglar jamoasi har kuni maskanga qatnaydigan 210 nafar oʻgʻil-qizning ijodiy va intellektual salohiyatini oshirish yoʻlida tinimsiz izlanmoqda. Bolalarda suvning hayotbaxsh xususiyati va tabiat neʼmatlarini asrash tuygʻusini shakllantirish maqsadida qiziqarli didaktik oʻyinlar va amaliy mashgʻulotlar muntazam oʻtkazib kelinyapti. Mazkur yoʻnalishdagi tadbirlarning uzviy davomi sifatida yaqinda muassasada “Xayr bogʻcham, salom maktab” deb nomlangan tantanali bitiruv kechasi tashkil etildi. Ushbu tadbir nafaqat yozgi mavsumning, balki butun oʻquv yilining oʻziga xos sarhisobiga aylandi. Kechaning yuqori saviyada oʻtishida tayyorlov guruhi tarbiyachilari Marjona Davlatboyeva va Zilola Xolmonova, majburiy taʼlim guruhi tarbiyachisi Dilfuza Yuldasheva hamda tarbiyachi yordamchilari Qurbongul Agʻatayeva, Yulduz Usmonova va Hamida Matqurbanovalarning xizmatlari katta boʻldi.

Musiqa rahbarlari Soliy Yeshimbetov va Eldor Xolmirzayev, shuningdek, jismoniy tarbiya yoʻriqchisi Zulfizar Gulmirzayeva boshchiligida tayyorlangan badiiy dastur barcha mehmonlarga manzur boʻldi. Jajji isteʼdod egalari ijrosidagi “Qizlarjon”, “Gulim”, “Lazgi” va “Qamchi bos” kabi raqslar, “Uycha” ertagi asosidagi sahna koʻrinishi hamda “Onajonlar” qoʻshigʻi tomoshabinlar qalbidan chuqur joy oldi. Ayniqsa, “Oʻzbek alifbosini oʻrganamiz” nomli maxsus raqs oʻzining taʼlimiy ahamiyati bilan yigʻilganlarda iliq taassurot qoldirdi. Bir soʻz bilan aytganda, 24-sonli maktabgacha taʼlim tashkilotida olib borilayotgan bunday tizimli ishlar yosh avlodning har tomonlama barkamol, yetuk va vatanparvar insonlar boʻlib yetishishida mustahkam poydevor vazifasini oʻtaydi. Tabiatga mehr va bilimga chanqoqlik tuygʻulari bilan sugʻorilgan bunday tadbirlar orqali jajji oʻgʻil-qizlar maktab ostonasiga katta ishonch va yuksak tayyorgarlik bilan qadam qoʻymoqdalar.