“Бобур хотирамизда” дея номланган тадбир бўлиб ўтди

Бутун мамлакатимизда февраль ойида улуғ мутафаккир алломаларимиз таваллуд саналари ҳар йили кенг миқёсда нишонланади. 9 февраль шоирларнинг султони Aлишер Навоий, 14 февраль шоҳ ва шоир Заҳириддин Муҳаммад Бобур таваллуди саналари барча таълим масканлари қаторида туманимиздаги умумтаълим муассасаларида ҳам муносиб нишонланди. Ушбу саналар муносабати билан мактабларда турли тадбирлар, адабий-бадиий кечалар ташкил қилиниб, мутафаккир боболаримиз хотирасига эҳтиром кўрсатилди.

Aна шундай ажойиб тадбир туманимиздаги 82-сонли умумтаълим мактабида ҳам бўлиб ўтди. Нозик қалб соҳиби, бетакрор шоир, Бобурийлар сулоласи асосчиси Заҳириддин Муҳаммад Борбур таваллудининг 537 йиллигига бағишланган “Бобур хотирамизда” дея номланган тадбир беллашув тарзида ташкил қилинди. Беллашувда мактабнинг 6-“A” ва 6-“Б” синф ўқувчиларининг Бобур ҳаёти ва ижоди хусусида олган билимлари синовдан ўтказилди.

Баҳс-мунозарага бой бўлган мусобақани мактабнинг она тили ва адабиёт фани ўқитувчилари Зулҳумор Сапарова ҳамда Шоҳиста Дўстжановалар ташкил қилдилар. Беллашув аввалида устозлар сўзга чиқиб, шоҳ ва шоирнинг машаққатли ҳаёт йўли, адабиёт сўз санъатида тутган ўрни ҳамда авлодларга қолдирган маънавий мероси хусусида гапириб ўтдилар.

Таъкидланганидек, Заҳириддин Муҳаммад Бобур ўрта аср Шарқ маданияти, адабиёти ва шеъриятида ўзига хос ўрин эгаллаган адиб, шоир, олим бўлиш билан бирга йирик давлат арбоби ва саркарда ҳамдир. Бобур кенг дунёқараши ва мукаммал ақл-заковати билан Ҳиндистонда Бобурийлар сулоласига асос солиб, бу мамлакат тарихида давлат арбоби сифатида номи қолган бўлса, сержило ўзбек тилида ёзилган “Бобурнома” асари билан жаҳоннинг машҳур тарихнавис олимлари қаторидан ҳам жой олди. Унинг нафис ғазал ва рубоийлари туркий шеъриятининг энг нодир дурдоналари бўлиб, “Мубаййин”, “Хатти Бобурий”, “Ҳарб иши”, Aруз ҳақидаги рисолаласи эса ислом қонуншунослиги, шеърият ва тил назарияси соҳаларига муносиб ҳисса бўлиб қўшилди.

Шу буюк сиймо таваллудига бағишланган беллашувда ўқувчилар 5 та шартлар бўйича мусобақалашдилар. Хусусан, дастлабки шарт Бобур ҳаёти ва ижоди ҳақида маълумотлар шарти, иккинчи шарт Бобур рубоийларидан ифодали қилиб айтиш шартида ўқувчилар қизиқарли маълумотлар ва шоирнинг пурмаъно рубоийларидан намуналар келтирдилар. Учинчи саҳна кўриниши шартида ўқувчилар Бобурнинг машаққатли ҳаётидан кўринишларни маҳорат билан ижро қилдилар.

Шунингдек, беллашувнинг тўртинчи савол-жавоб шартида гуруҳларнинг адабиёт фани ҳамда Заҳириддин Муҳаммад Бобур ҳаёти ва ижоди тўғрисидаги билимлари синовдан ўтказилди. Беллашув охирида ўқувчиларга шоирнинг расмини чизиш уйга вазифа сифатида берилган бўлиб, буюк сиймо қиёфасини бўёқларда тасвирлаган ўқувчиларнинг расм чизиш қобилиятларига баҳо берилди. Сўнгги натижаларга кўра, барча шартлар бўйича ҳар иккала синф жамоаларининг кўрсаткичлари тенг бўлиб, дўстлик ғалаба қозонди. Тадбирда Ватанни мадҳ этувчи куй-қўшиқлар ҳам ижро этилди.
Тадбир якунида ўқувчиларга эсдалик совғалари ҳамда фахрий ёрлиқлар топширилди.

Чарос Aрслонова.