“Bobur xotiramizda” deya nomlangan tadbir boʻlib oʻtdi

Butun mamlakatimizda fevral oyida ulugʻ mutafakkir allomalarimiz tavallud sanalari har yili keng miqyosda nishonlanadi. 9-fevral shoirlarning sultoni Alisher Navoiy, 14-fevral shoh va shoir Zahiriddin Muhammad Bobur tavalludi sanalari barcha taʼlim maskanlari qatorida tumanimizdagi umumtaʼlim muassasalarida ham munosib nishonlandi. Ushbu sanalar munosabati bilan maktablarda turli tadbirlar, adabiy-badiiy kechalar tashkil qilinib, mutafakkir bobolarimiz xotirasiga ehtirom koʻrsatildi.

Ana shunday ajoyib tadbir tumanimizdagi 82-sonli umumtaʼlim maktabida ham boʻlib oʻtdi. Nozik qalb sohibi, betakror shoir, Boburiylar sulolasi asoschisi Zahiriddin Muhammad Borbur tavalludining 537 yilligiga bagʻishlangan “Bobur xotiramizda” deya nomlangan tadbir bellashuv tarzida tashkil qilindi. Bellashuvda maktabning 6-“A” va 6-“B” sinf oʻquvchilarining Bobur hayoti va ijodi xususida olgan bilimlari sinovdan oʻtkazildi.

Bahs-munozaraga boy boʻlgan musobaqani maktabning ona tili va adabiyot fani oʻqituvchilari Zulhumor Saparova hamda Shohista Doʻstjanovalar tashkil qildilar. Bellashuv avvalida ustozlar soʻzga chiqib, shoh va shoirning mashaqqatli hayot yoʻli, adabiyot soʻz sanʼatida tutgan oʻrni hamda avlodlarga qoldirgan maʼnaviy merosi xususida gapirib oʻtdilar.

Taʼkidlanganidek, Zahiriddin Muhammad Bobur oʻrta asr Sharq madaniyati, adabiyoti va sheʼriyatida oʻziga xos oʻrin egallagan adib, shoir, olim boʻlish bilan birga yirik davlat arbobi va sarkarda hamdir. Bobur keng dunyoqarashi va mukammal aql-zakovati bilan Hindistonda Boburiylar sulolasiga asos solib, bu mamlakat tarixida davlat arbobi sifatida nomi qolgan boʻlsa, serjilo oʻzbek tilida yozilgan “Boburnoma” asari bilan jahonning mashhur tarixnavis olimlari qatoridan ham joy oldi. Uning nafis gʻazal va ruboiylari turkiy sheʼriyatining eng nodir durdonalari boʻlib, “Mubayyin”, “Xatti Boburiy”, “Harb ishi”, Aruz haqidagi risolalasi esa islom qonunshunosligi, sheʼriyat va til nazariyasi sohalariga munosib hissa boʻlib qoʻshildi.

Shu buyuk siymo tavalludiga bagʻishlangan bellashuvda oʻquvchilar 5 ta shartlar boʻyicha musobaqalashdilar. Xususan, dastlabki shart Bobur hayoti va ijodi haqida maʼlumotlar sharti, ikkinchi shart Bobur ruboiylaridan ifodali qilib aytish shartida oʻquvchilar qiziqarli maʼlumotlar va shoirning purmaʼno ruboiylaridan namunalar keltirdilar. Uchinchi sahna koʻrinishi shartida oʻquvchilar Boburning mashaqqatli hayotidan koʻrinishlarni mahorat bilan ijro qildilar.

Shuningdek, bellashuvning toʻrtinchi savol-javob shartida guruhlarning adabiyot fani hamda Zahiriddin Muhammad Bobur hayoti va ijodi toʻgʻrisidagi bilimlari sinovdan oʻtkazildi. Bellashuv oxirida oʻquvchilarga shoirning rasmini chizish uyga vazifa sifatida berilgan boʻlib, buyuk siymo qiyofasini boʻyoqlarda tasvirlagan oʻquvchilarning rasm chizish qobiliyatlariga baho berildi. Soʻnggi natijalarga koʻra, barcha shartlar boʻyicha har ikkala sinf jamoalarining koʻrsatkichlari teng boʻlib, doʻstlik gʻalaba qozondi. Tadbirda Vatanni madh etuvchi kuy-qoʻshiqlar ham ijro etildi.
Tadbir yakunida oʻquvchilarga esdalik sovgʻalari hamda faxriy yorliqlar topshirildi.

Charos Arslonova.