Фан ойлиги доирасида “Тарихий хотирасиз келажак йўқ” номли тадбир ўтказилди

Тарих — инсониятнинг бутун ўтмиши давомида жамият ҳаётида содир бўлган воқеа, ҳодиса ва жараёнларни яхлит тарзда ўрганади. Тарих фани асрлар мобайнида қўлёзма асарларда ифодаланган ҳаёт, воқеа-ҳодисалар, тарихий шахслар ҳақида ҳикоя қилади ва энг қадимий тарихимиз хусусида маданий ёдгорликлар ва археологик топилмалар ёрдамида маълумот беради.

Тарих ва ҳуқуқ фанлари ойлиги муносабати билан туманимиздаги 36-сонли умумтаълим мактабида ўтказилган “Тарихий хотирасиз келажак йўқ” номли тадбирда мактабнинг юқори синф ўқувчилари қамраб олинди. Ўқувчиларнинг тарих фанидан олган билимларини синовдан ўтказиш мақсадида ушбу тадбирнинг мусобақа тарзида ташкил қилинишида мактабнинг тарих фани ўқитувчилари Сайёра Расулова ҳамда Мунаввар Тўраевалар жонбозлик кўрсатдилар. Мусобақада 8-синф ўқувчиларининг “Aмир Темур” ҳамда “Христофор Колумб”, 9-синф ўқувчиларининг “Тўмарис”, “Темурийлар” ва “Бобурийлар” жамоалари иштирок этдилар. Беллашувнинг 1-шартида ўқувчилар тарих фанига оид қизиқарли маълумотлар, шеърлар билан ўз жамоаларини таништирдилар. Ушбу шартда ўқувчилар тарихга, ўтмишни ўрганишга бўлган меҳрларини намойиш қилдилар.

Беллашувнинг 2-шартида тарих фани бўйича савол-жавоблар билан ўқувчиларнинг олган билимлари синовдан ўтказилди.

Ўқувчиларнинг энг севимли шарти бўлган саҳна кўринишлари шартида “Aмир Темур” жамоаси Тўмарис ва Кир суҳбатини, “Христофор Колумб” жамоаси Муҳаммад Шайбонийхон ва Исмоил Сафавий жангини, “Тўмарис” жамоаси сумалак сайли ва айтишувни, “Темурийлар” жамоаси болага исм қўйиш маросими, “Бобурийлар” гуруҳи сумалак тарихига бағишланган саҳна кўринишларини намойиш қилдилар. Ушбу шарт орқали ўқувчилар ўзларининг аждодлар руҳига юксак ҳурмат ҳамда актёрлик маҳоратларини намойиш қилдилар. Баҳс-мунозарага бой бўлган беллашувнинг 4-шартида жамоалар сардорларининг билимлари синовдан ўтказилди.  
Жамоаларнинг барча шартлардаги иштирокини ҳакамлар – Гулистон Бектемирова, Расул Холмуродов, Омонгул Хидирбоева, Нигора Бозорбоевалар баҳолаб бордилар.

Тарих фани ойлигига бағишлаб ташкил этилган “Тарихий хотирасиз келажак йўқ” деб номланган мусобақанинг якуний натижаларига кўра 8-“A” ҳамда 9-“В” синф ўқувчиларининг кўрсаткичлари барча жамоаларникидан юқори бўлди ва улар фахрли 1-ўринни қўлга киритдилар.
Тадбир якунида барча иштирокчи ўқувчилар мақтов ёрлиғи ҳамда совғалар билан тақдирландилар.

Чарос Арслонова.