ҲАP БИP ИШДА ҲАҚҚОНИЙЛИК ВА ШАФФОФЛИК ТАЪМИНЛАНАДИ

Мамлакатимизда Маъмурий жавобгарлик тўғрисидаги қонун ҳужжатлари фуқароларнинг ҳуқуқ ва эркинликлари, мулк, давлат ва жамоат тартиби, табиий муҳитни муҳофаза  қилиш, ижтимоий адолат ва қонунийликни таъминлашга хизмат қилади. Шунингдек, ушбу ҳужжатлар асосида ҳуқуқбузарликлар тўғрисидаги ишлар ўз вақтида ва объектив кўриб чиқилади.

Ҳозирги пайтда маъмурий суд идораларининг халқ билан яқинлигини таъминлаш, судларда кўриладиган маъмурий ишларни ўз вақтида кўриб чиқиш, шаффофликка риоя этишга алоҳида эътибор қаратилаётгани фуқароларнинг  маъмурий суд органларига ишончини тобора мустаҳкамламоқда. Бунда, албатта, фуқаролар ўртасида олиб борилаётган ҳуқуқий-тарғибот тадбирлари ҳамда сайёр қабулларнинг аҳамияти катта.

Ўтган 2019 йил давомида туман Маъмурий суди томонидан 75 марта бевосита маҳаллалар кесимида 1297 нафар фуқаролар иштирокида ҳуқуқий-тарғибот мавзуларида давра суҳбатлари ташкил этилди. Жамоат ташкилотлари ва фуқаролар йиғинлари масъуллари билан ҳамкорликда 852 маротаба сайёр суд мажлислари ўтказилди. Ушбу сайёр суд мажлисларида кўрилган маъмурий ишларнинг жамиятга, шахснинг ўзига зарари нечоғлик моддий ва маънавий зарар етказиши мумкинлиги ҳаётий мисоллар орқали халққа етказилди.

Шундай бўлса-да, туманимизда 2019 йил давомида 1678 нафар шахсга нисбатан 1465 та маъмурий ҳуқуқбузарлик тўғрисида ишлар очилиб, судда кўриб чиқилди. Шундан 1246 нафар шахсга нисбатан 1068 та иш бўйича маъмурий жазо қўлланилди. Яъни, 956 та иш бўйича 1246 нафар шахсга жарима, 113 нафар шахсга эса маълум ҳуқуқдан маҳрум этиш  жазоси қўлланилди. Ачинарли томони шундаки, 105 та иш бўйича 106 нафар шахсга маъмурий қамоқ жазоси тайинланди. Жазо чораларини қўллашда МЖтКнинг тегишли моддалари бўйича 122 нафар шахсга нисбатан қўшимча жазо чоралари тайинланди.

Бундан ташқари, туман Маъмурий судида кўрилган жами ишлардан 956 таси бўйича 1133 нафар шахс жарима жазосига тортилиб, улардан суд қарори билан 1 млрд. 139 млн. 44 минг 777 сўм маблағ давлат фойдасига ундириб олинди.

Туман Маъмурий судига оммавий-ҳуқуқий муносабатлар бўйича келиб тушган мурожаатлар ҳам ўз вақтида судда кўриб чиқилиб, шаффофлик ва ҳаққонийлик таъминланишига эришилмоқда. Хусусан, ўтган 2019 йил давомида 60 та оммавий-ҳуқуқий муносабатлар юзасидан келиб тушган мурожаатлар атрофлича ўрганилиб, шундан 50 иш қаноатлантирилди. Қолган 7 та иш бўйича маъмурий иш қўзғатиш ҳолати бўлмаганлиги учун рад этилиб, 2 та иш эса тугатилди. 1 та иш судда кўрилмасдан қолдирилди.

Ҳар бир мурожаат, ариза ва шикоят ортида, албатта, инсон тақдири бор. Судга келиб тушаётган мурожаатлар билан танишиш жараёнида ишга ана шу нуқтаи назардан келиб чиқиб ёндашилади. Фуқароларнинг ҳуқуқ ва эркинликларига дахл қилмаган ҳолда иш олиб борилади.
Мақсадимиз – ҳар бир фуқаронинг шахсий ҳуқуқ ва манфаатларини таъминлаш, судлар билан фуқаролар ўртасидаги бюрократик тўсиқларга барҳам бериш ҳамда судда кўрилаётган ҳар бир ишда ҳаққонийлик ва шаффофликка  амал қилишдир.

Мунаввар КАPИМБОЕВА,
туман Маъмурий суди раиси.